U to vreme, oko polovice XX stoleća na Mlake se točno znalo do kam spada. Plemeniti su išli v šumu v Lug Turopolski i skupnu Dragu, a vrbarci samo v Erdelsko. To je bil i kriterij za prepoznavajne stališa. I obleču je imal saki drukčeju, ali su se ipak poštuvali i skup živeli. V cirkvu su išli slabo, i prvi i drugi. I dale mislim da su živeli duhovnije neg mi denes.

To je vreme moja dečja pamet zapamtila, a sad to pišem vuz pomoć maminu, kaj bu v lipnju zašla v 90. leto. Čez taj put u povijest moguće je stvoriti sliku ondašne Mlake, ka je od vulic imala samo Dolenec i Gorenec. Televizora, radija i novin ni bilo, ali je za nas decu bilo zabavno to, kaj se saki dan negdo z nekem karal. Radi ničesa. Tek tak. To je bil besplatni zabavni program. Posle toga programa i večerne obiteljske molitve išlo se spat. Mi smu, ja i sestra Janica, sve dok nismu zaspali, v postele zbrajali velikomlačka prezimena. Od Štefca v Dolencu do Števića Zvonarovoga i od Mikića Blaževoga pri Pažulu do Zmudičkanof na ceste. Sestra Zlata je spala v prve hiže, i morala je rano iti spat radi zdiganja na cug petak, jer je nosila mleko v Zagreb.

Naša bi pripovest navek počimala od Števca Trumbetašovoga.

Negva mama Kata je bila od Tome Išćevoga sestra, ozde kak je sad Anka Brenzarova. Oca mu ne pametim. Števec i žena Milka su imali Drageca, Anđelu i Iveka.

Milka je rodom Špektorova ki su bili kak je sad vulica Sv. Barbare, prek puta Števića Bunceka, a vuz Čeveka i Rošku. Na Štefčevom gruntu je sad Dragec z familijom. Dragec je slikar, i jako je po svetu poznat. Anđela i Ivek su vane, mislim v Nemačke. Mam polek Štefca je ižu imal Petar Trumbetaš, kaj su mu govorili i Juričinov. On i žena mu Barić, pilekovoga Mijice sestra, imali su sine Iveka po špotu črlenoga, Števića po špotu Teja i najmlajšega Jožeka – Jodeka. Čer Barić kaj je zela Štaprčoka z Rašć ja nis poznal, jer su oni živeli na Trešnevke v Zagrebu. Ivek Črleni se oženil z raščankum Maricum Korenikovum kem se reklo Sibrekovi. Ivek je vmrl. Marica je živa. Nimaju potomstva. Teja se oženil z Rožicum Marka Glagolićevoga. Imaju troje dece: Šteficu kaj je pri Papeku Korilofčanovomu, Jureka ki se priženil nekam na Posavinu i Anđelicu. Jodek se je oženil z Orlof (župa Veleševec), i rezišel. Dok je koj mernik delal na komasacije v Dubrajncu, upoznal je jednu dobru učitelicu Mariju, s terom se oženil i imal curicu. Učitelica je puno let vučila v Mlačke škole i imali su ju đaki jako rad. I Jodek i žena su mrli.

Do Petra Juričinovoga vuz cestu je živel Luka Majerov po prezimenu Filipančić, z ženum. Nezinoga se imena ne sećam. Mama veli da se zvala Kata. Sećam se da su bili niskoga rasta i drobni. Pri njemi smo pili vodu s pumpe kad smu išli z Podlazine ili Tratine de smu kopali kukuruzu. Oni su imali dva dečke kaj sem ih ja poznal. Pepu i Ivu. Ne znam zakaj su jem govorili Majerovi. Pepa je z ženum Zorum, Mraclinčicum, imal jednu čer Nadu. Nada je zela podoficera Borojevića Neđu, pravoga Srbijanca. Za kratko vreme kak je rodila dečeca mrla je od leukemije. Dečeca su otranili Pepa i Zora. Ali ga je srbijansko seme za rata 1992. godine z oficeri srbijanskemi odvleklo nekam v Bosnu. Iva Majerov, brat Pepin ni imal nikakvoga potomstva, živel je dugo Francuske i domom je došel samo mreti. Navek je nosil škrlak na jen kraj i rad je peval. Tak je loza Filipančićof za navek z Mlake zbrisana.