Mam prek puta, vuz Jurića Lesičinoga je iža Mikića Sarinoga. To, Sarinoga, je zmišleno v detinstvu. Negda ni kak vezda bilo igračke za kupiti, bar na selu, nek su je deca sama delala i tak si pamet rezvijala. Tak su Mikić Sarin i moj pokojni vujec Mikić Glagolićev skup s Francom Išćevem Brenzarom po špotu, napravili mala kolica. Vujec Mikić je bil kojn Moder, a kobila Sara je bil Mikić i to ga je potlem celi život pratilo. Mikić Sarin je bil ožejnen z Janićom Mudićevom tera je imala brata Iveka kaj mu se reklo Čučuriček i sestru Jelu, babicu po zanimajnu. Oni su imali sina Jureka, jedinca, teromu su priuštili lagodnu mladost. Priženil se na Blato, tak da sad taj grunt ide k propasti. Najnem nima nikoga.

Med Mikićem i negvem bratićom Jankićom Štefovem je bila praznina kak je i sad. Jankić je imal sina Ivića komu se reklo Rojček i čer Janisu kaj je zela Juristu. Rojčekova žena je bila z Rašć i mi se čini da je još za negvoga života skup s čeri i zetom zmenila veru i otišla v Jehove. Spomenuti Jurista je prije nek je napravil ižu ozde de sad žive s čerju Šteficum i zetom Ivekom Klafurićom z Lomice, živel na grunteku ki je bil kak je sad štreka. Polek Juriste je bil brat mu Miško kaj su mu govorili Pajuta, a oženil se od Korilofčanovoga Đivana, oca Mijeka koga zoveju Črni, Lubice pokojnoga Žireka z Dolenca i Gučeka kaj je igral violinu dok je s kravum išel napašu. Jurista, Pajuta i Štević teroga sem spomenul zadnji put su imali sestru Dragu kaj se udala za Joška Arbanasa komu su govorili Lajić, a živeli su pri Kovaču.

Vuz plemenitaša Čoveka Juričinovoga je bila stisnuta ižica Imbre Črjnakovoga (brata raneje opisanoga Martina) i žene mu Milke po prezimenu Petreković. To prezime je odumrlo. Ižica im je bila mala, ali blagoslovna. Imbra i Milka su fajn dece imali. Janić je bila udata za Prahirovoga trajbara Marijana. Lubica ka ima muža Fehima žive na tem gruntu, Barek sje zela Mikića Martinkovića kaj su mu govorili Lelec.

Vuz Pavcovu hižu je bila iža Ive šepavoga i Bareka ka je bila od nekud s Posavine, a imali su samo jednoga sina Jandreka. Jandrek je bil drobni čovek, ali je bil poznat koj dober kosec i selski zidar. Mijek pl. Trumbetaš po špotu Pidi se kuliko ja znam z mlekarstvom bavil, a bil je ožejnen z Judum od Mudića, z drvene iže ka je još i sad vuz Pepeka Makovićevoga. Nijova čer Marica je pri Imbreku Makovićevomu, Katek v Rašču pri Korenike, Ančica pri Rokanu Išćevomu, navek betežna Jelica je vmrla bez potomstva, a sin Štević je na gruntu i z ženum Klaricum od Koprnjaka z Rašć ima sine Iveka i Božeka i čer Šteficu, vane vdatu.

Gore spomenuti Stepanić Marko se priženil za jedinicu Đjaneka i imali su sina Miškeca i čer Doreka ka je zela slatkoga Jankeka od Levakov, z Gorice. Miškec i žena mu Roža od Bradašića su imali sine Števića Ikca kaj je zel Rožicu Miška i Magdice Štefanove i Jurića Bradaška ki nima potomstva. Sused jem je bil Mika, Pilek po špotu ki je Barića dal k Petru Juričinovomu i sina Mijicu kaj je Rezu od Išćeve oženil. Moj japa stari Jankić Glagolićev jem je bil vujec. Oni su imali samo sina Števića ožejnenoga za Barića od Bradašića, sestru Rože Miškecove, a imali su sina Jureka ki je z ženum Nadicum z Jakuševec i decum sad na tem gruntu, i doktoricu, zubaricu Maricu ka je zela Čedeka Cundekovića. Na žalost, mlada, v 41 letu je vmrla. Vuz Čarugu je bil gruntek Vladeka Novosela ki je imal sestre Janića ka je v zamužu bila pri Jure Kolaričkinomu, Barića pri Bačaniju na Gorice i Števića ki je vučil za popa i prešel komunističko zlo, a vmrl je negde v Križevce.

Na vuskom grunteku do Vladeka živel je Miško Novosel ki je bil ožejnen s Katićom, sestrum Franceka Bajsmenovoga. Katić i čer Božica sad živeju v negdašne Wajngetarove štale. Sused jem je bil Novosel Mija, brat Jankića Štefovoga i Pavla, oca Mikića Sarinoga. Negva je žena bila Rožica od Ivića Drobakovoga sestra, a imali su sine: Jurića kaj mu se govorilo Žirek, Ivića Ipeka i čer Dragicu ku su zvali Piđaga, a zela je Iveka Japinoga pri križnom drevu. Žirek je zel Lubicu Đivana Kurilofčanovoga, a Ipek Bareka Vladekovoga. Negve čeri Đurđica i Mirjana vuz mali broj Dolenčice redovito idu k meše. Dolenčani idu slabo. Najbrojniji grunt v Dolencu je bil Popin. To su bila deca Jose Novosela i Magdice od Glagolića, z grunta de je sad gospon Ivica Modić–Bombek: Jura komu se govorilo fakata ožejnen z Marom od Pinturića z Rašć, Števa Mesar ožejnen z Marekom od Čačkovića, Joža, Dragec i Ivić nežejne, Milka pri Žmike Crniću Kovačevomu; Đurđa pri Krilčiću v Daruvaru sad na Gorice, Janić na Jagodno i Lubica. Dest se skupa. Zajdni u nizu Novoselov je bil čovek kaj se oženil od Jagnića z Rašć i imal je Melkicu, Pepeka, Rožicu i Rezicu tera je imala či Anđelicu, a sad je na tem gruntu prezime Ciboci.