Zmed Mudićof i Laceka gradovoga v drvene iže, ne v ove ka je sad na dvorišću, živela je Barić, reklo se Kolarova, prva Lacekova žena, z materum kaj su je govorili Anička. Anička je navek, bez obzira je li leto ili zima, imala oblečen zimski kaput. Ž nemi je živel, za Barića prižejnen Franc Lacković, zmudičke, ki je posle drugoga rata bil partijec i višeletni direktor OPZ Velika Mlaka. Dok je on bil direktor, zadruge je nekak išlo. Delalo se, ni kak sad kad se samo trguje. Franc ni bil preveć načitan čovek ali je bil dober i pošten. Od potomstva su imali čer Bareka ka je zela Jakopa Medveda, ki takaj ni bil načitan ali je po partijaške linije došel do položaja predsednika općine Velika Gorica. Živeju na Gorice i imaju sine. Na gruntu je ostal Ivek, Baričev sin z braka z mernikom Anićem ki je za stare Jugoslavije komaseral i zemlu premerjeval po Gorice.

Odumiranjem familije Krupić teru kniževnik Šenoa (na slike desno) opisuje v Zlatarevom zlatu, grunt polek Aničkinoga nasledili su Mudići.

Kad sem prošli put spomenul Mudiće da su negda bili moćni, mislil sem na Iveka Mudićevoga teroga se još puno ludi seća a i žena mu Bara je još živa. Oni sad živeju v iže kaj su zezidali na druge strane, vuz Grad. Imali su puno zemle ali mi se čini da su sve resprodali. Jedinec sin Števek se priženil v Svetu Klaru, k Kunetićom. Mlad je mrl, obesil se. Prezime Mudić (Modić) još drži jedino Jadranko, sin gospona Ivice kaj mu veliju Bombek. Ivica je sin Matićev a mati Kata je bila z Mičevca, od Ruleka.

Strova su je govorili. Matić ili Matlenkač kak su mu po špotu govorili, po pripovedajnu je v mladosti bil huncut i fakin a ja ga se sećam koj selskoga najavlivača masovne sastankov i govedine, ak se komu krava napaše napuhnula. Bil sem dečec kad je gospon Ivica z vojske dopelal lepu gospođu Anku v malu drevenu ižicu ka je bila ozde kak je sad iža Jožeka Pepeka Makovićevoga. Puno kešneje, 1964.g. sem i ja služil vojsku v Rajlovcu pri Sarajevu i obišel rodno mesto gospođe Anke, Butmir. Dojnega se dojde s trajvanom ki vozi za Ilidžu. Osim Ivice ki je bil legenda ZET-a imali su i čer tera žive v Zagrebu i sina Joška ki se oženil z Marum Sovininum ze Šilakovine. Dok je v ižice bilo života je živela, a kad su Matić i Kata pomrli a dečki se rezišli, ižica se zrušila a zemlicu su prodali. Gospon Ivica Bombek sad žive na Glagolićevom, vuz moju sestru Zlatu Makovićevu, na zemle ku je kupil od Števe mesara z Dolenca. Tu je Števa imal zezidanu mesnicu.

Vuz vuličku poke se išlo k Matlenkaču je bila drvena iža z dvemi staremi ženami kemi se imena ne sećam, a vuku se vlezlo od dvorišća. Tu se priženil moj bratić Pepek, od Rože i Lovreka Makovićevoga sin. On i žena mu Barić od Majanka sestra tu živeju ze sinom Jurekom i snejum Višnicum, a imaju i dva nuke. Jurek je bil dober nogometaš, rekli su da je krtica i fleten. Sad već negvi dečki igraju, još bole.

Z drvene iže vuz Števića Glagolićevoga ku pametim a tere više ni, po mamimnom su se pripovedajnu rezišli tri brati Glagolić: Miško, Jurko i Peter. Miško je imal sina Franca po špotu Bigar, Lacka ki je otišel v Ameriku i čeri, Lubu i Marića. Bigara se još ludi sećaju koj dobroga vatrogasca i govoranđiju na masov ne sastanke.