Mlajša sestra Jureku, Vince i Mariću je bila Katek ili po domaće Škatlek, ka je zela Jurića Capakovoga, Krilčića, z Bradašićeve vulice. Jurićev otec stari Capak je bil šepav i nagajnal je nas decu po grabe Mlake, pri cirkve, de je sad park za decu. On je kravu pelal napašu a mi smu zagazili travu dok smu s prjnkačum loptum igrali nogomet. To ga je srdilo, pak nas je klel i špotal. Ojdne, od Capaka je drvenu ižu i grunt v Bradašićeve vulice kupil g. Tačković, z Vrhovlja. Jurić i Katek (Škatlek) su imali jedinca Števeka ki se oženil z Ivankum, od Kramarića. Svi su pomrli. Števek i Ivanka su za života imali dvoje dece: Mladena ki ima bertiju Orion i Biserku ka ima bertiju Sinfonija. Mi se čini da su se zemle uglavnom resprodali.

Špetrova loza je završila dost tužno. Najmlajši mu se sin Štević obesil. Na gruntu zmed Bigara i Janeka Glagolićevoga je živel stric Štević, ki se oženil z prve iže, z tetum Lubum od Grge Glagolićevoga. Imali su čer Kateka, ka žive z sinom Jurekom i snejum Gordanum. To sem već opisal. Stric Štević je imal brate Tončeka i Imbrića. Tonček je živel i mrl v Amerike, a Imbrić je živel tu i ostavil lepo potomstvo. Nijednoga ja poznal nis. To pišem kak mi je mama pripovedala. Imbričeva deca su bili: Martin, Luba, Dora, Matić, Roža i Štević-Tičica po špotu, čija je Janek ku sem gore spomenul. Martina se dobro sećam. Negva žena Janić je bila z Rakarja od Jurenića pak je se reklo Jurenićka. Imali su sina Imbricu ki se oženil s Plesa, z Marum Trbićevum ka je mrla dost mlada. Imali su čer jedinicu, Đurđicu. Mnogi ki delaju na erodromu moreju ne zafaliti. Ona ima dvoje dece. Imbrica ima i tri sestre: Jelića ka je otišla v zamuž na Ruglicu, Marića-Pasu ka je zela Majanka Šnajderovoga i Milkicu. Baš se ne sećam kad je Jelić išla na Rugvicu i Marić k Majanku. Marić-Pasa i pokojni Majanko su imali jedinicu, Bareka, ka se sad preziva Keler.

Najmlajša od Martinove i Jureničkine dece je bila Milkica ka je za ono vreme kad se ze sela ni išlo v nikakve škole završila Farmacetski fakultet. Radni vek je počela i završila, kak i Lubica z melena, v Sisku. Mi se čini da sad žive na Gorice. Ni išla vzamuš, nima potomstva. Martinova sestra Luba ka je zela Imbriju-Graničarovoga, Smolčića, je mlada mrla, a sestra Roža ke su govorili Sosa, je otišla vzamuš na Rakarje, k Klariću, i imala je jedinca sina Iveka koga ja poznam. On je zel Bosanku i kuliko mi je poznato i on ima jedinca.