V devetnajstom stoleću je malo tera obitel na Mlake imala mejne od deset dece. V prošlom sem broju opisal granu Glagolićeve zadruge f tere se moja mama rodila, a dotikovalo se nezine bratičof kemi je ona od poštuvajna govorila stric, jer su ojdne bili fajn stareji. I to, strica Grgu i strica Matića Rusa, sine Matićeve o kemi sem pisal v prošlom broju. Mikula Glagolićev komu su govorili Zajec, osim rečenoga Matića je imal i sina Janka. Janka su rodili majkica Marić, a bili su ze Šnajderove zadruge. Oni su bili sestra od oca Roka zbrega. Jankić se rodil 1870. leta, v novo naređene "zajdne" iže, tera je za onda osim Weigärtnerovog "grada" bila jedina zidana i z črepom pokrita.

V iste iže vuke se rodil, 1954. je mrl. Ja sem mu nosil mali križ na kem je ime. Decu, i druge je fort pobožno vučil i govoril: "boj se Boga". Tak su mu neki zmislili i govorili Bojs ili Bojsić. Za vreme I. svetskoga rata Janko je bil ulaner austrougarske vojske, v Galicije. V glave mi je negva slika v vojačke oprave, a bila je polek druge obešena vuz oltarek ki je bil v vuglu zajdne iže. Pred tem se oltarekom navečer molilo i Bogu zafalivalo, za minuli dan, za zutrašni dan, za zdravle krav i kojnof i ždrebićof, za živad, za dober rod i lepo vreme. Za školu se ni, kaj su ju si zbeguvali. Sad si idu v školu, a ne moli se u glavnom za niš. Onda su stareši sakojake molitve zmišlali i na decu prenošali i vučili je veruvajnu v Boga i v negve zapovedi. Tak su si bili aktivni i na glas molitve zgovorali.

Denes zevamo v televiziju, mučimu, poslušamu i gledimu, drugi mesto nas sešta govoriju. Niti pevamu, niti molimu, samo jafčemu kak je život teški. Više nimamu dara rezlikuvajna kaj je vredno a kaj ni. Gledejne televizije nam otima spalo, a puno put za život baš niš dobroga ne znači. Naši stari su potle molitve išli spat. Po smrti jape staroga ja sem od Makovića išel puno put spat k mame stare, da nebu sama. Polek oltareka koga sem spomenul je bila Jankova slika v vojačke oprave. Gledeć ju, mam mi je bilo jasno zakaj se lepa Agata pl. Lacković, rođena 1881. v Šnajderove zadruge i 11. let mlajša, zagledala vujnega. Agata, a si su ju zvali Jagica, bila je peto dete Juraja (Đure) i Kate rođene pl. Krilčić ze Štefanove zadruge. Potle ne, imali su još 11. dece, se skupa 16. Đurin grunt je bil ozde kak je sad Anka Grgurinović, Brenzarova. Pod svoje stare dane zmed 1960. do 1970. Jagica je živela pri zetu, Mike Makovićevomu.

Kak sem ja već vuto vreme bil študent (bez mobitela), imal sem čas trenirati svoje strplejne i poslušati nezine pripovesti. Pripovedala mi je kak je se Jankić dopal, kak je bil fajn dečko rozerumene puti, lepoga reskolenoga nosa, visoki, tenke zdržlive nog i z lepemi frkanemi mustači. 1970. v 89. letu mama stara je vmrla, pri Makoviću. Kak sem ja odgajan dost po starinske, govoril sem onak kak se prije govorilo, japa stari i mama stara. Mlajši nuki odmene su već onda govorili ded i baka, to se za onda reklo da je moderno, a tak se i denes govori. V Bogu odanom životu i iskrene lubavi, Jankiću i Jagice se rodilo 11. dece, od ke je 7. doživelo veču ili mejnu starost. Jednoga, Mikića sem opisal raneje, koj pajdaša Mikića Sarinoga z Dolenca, a ki je zajedno z Brenzarom Išćevem bil vrsni rezbar.

Bežeć v Vukomerić dobil je akutno zapalejne pluć i na mostu ober potoka Soputnjak v Peršinovcu, na putu z Vukomerića de je japa stari imal trsje, 1924. z 12. let je mrl. Japa stari se sako jutro zdigal ob 3. vure i z Mlake išel v Vukomerić i navečer se opet vračal na Mlaku, peške. I tak celo leto, od obrezavajna do brajna grojzda, drugo leto opet tak i celi život dok su mu noge mogle iti. Kad nisu, trsje je podelil dece. Kopal je z motikum, a mi imamu motore. On je imal cepleni nasad, a mi imamu izabelu i armut (direktor).

Mi tu muku i žrtvu sad ne razmemu, rajše od ambrozije kišemu i od burze 900 kuna čekamu. Nočni intermeci jape staroga podarili su turopolskomu kraju i hrvatskomu narodu po redu: 1901. Ivića, komu su govorili belec, 1906. Pavića(On je bil pri Mikićevom smrtnom času), 1924. Mihalja komu se reklo Mišo i 1929. Jurića komu govoriju beli. Prvi dva su pomrli, drugi su živi. Od dekel se 1902. prva rodila Roža. Po maminomu pripovedajnu puno huncutarije v nezinom detinstvu je speluvala Roža, dok ju ni 1927. Isus Krist pozval v svoju službu. Ostavila je rodnu ižu, drage roditele i turopolski kraj i otišla v sam ostan, za časnu sestru. Prvo v novicijat k sestram milosrdnicam reda Svetoga Vinka Paulskoga v Frankopanske vulice, v Zagrebu. Potlem z redovničkem imenom čs. Lovrina, v Osijek i Sarajevo. Lafko je to sad nabrajati i štimati se, ali za stare Jugoslavije a pogotovo potlem v komunizmu taj je stalež bil preziran. Kaj se prezirajna tiče ni sad ni puno drukčeje. Posebno teške čase je preživela v vojne bolnice Koševo, v Sarajevu, de je posle II. Svetskoga rata delala koj medicinska sestra. Doživela je pune 50. let redovništva i još 15. let je v Lužnice polek Brdovca dvorila, stare i još nemočneje časne. Nebeskem pevajnem, časne su 1990. nezinu dušu otpratile k zaručniku Isusu po čijemi je zapovedi živela celoga života.

Nam ludem je službu služejna drugem teško svatiti, preveć smu na zemalsko vezani i verujemo samo onomu od česa ima telo koristi. Dogod v našu globajnu nebu zašlo da je Bog Otec respijnajne svega sina Isusa žrtvuval za nas i dok se Božje zapovedi bumu setili samo kad se negdo naš krsti, pričesti, firma, ženi ili vmira, dotlem bu naša duša zletuvala k Bogu samo kad bu na stolu Vuzmena šujnka ili Božićni bakalar. Druga čer ove drage obiteli Magdica se rodila 1909. a v zamužem je bila pri Mišku pl. Krilčiću Štefanovomu. Trejta, Janić se rodila 1913. i zela je dovca Miku Makovićevoga. Kad su one išle v zamuš prednost su imali dečki (ili dovci) ki su bili bole stojeći, ki su imali više zemle za muku. Zaradi Miška, će je baš bil 20. let stareši od Magdice, rezvrgli su zaruke z Lojzom Zvonarovem i Tončicum Šnajderovem, a Janiću su nasnubili 14.let starešega Miku ki je bil v Amerike i tam stekel, za onda lepo gospodarstvo. Ta, Glagolićeva "zajdna" iža, od Boga blagoslovlena redovničkim zvajnem, desetleća je bila zestanište i blagovalište župnikof Goričke i Odranske, od Stepanića i Švarića, Varge i Kocijanića, Petrasa, Majseca do Ladislava Loine, kad su za Božić blagoslivlali svoje malo verničko stado, v Dolencu i v Gorencu. Glagolićev grunt, od Jurića i Mihalja je kupil Mika Makovićev i najnem nastanil čer Zlatu ka se sad preziva Cundeković.