Imbričof sused ki se priženil k Jurekovimi k Rože pl. Lacković, čer Matića Lackovića komu su govorili ŠAJKEC, bil je Ivić Glagolić BELEC (na slike desno) , moj vujec. Šajkec ni z Jurekove, on je ze ŠNAJDEROVE zadruge bil. I on je tu bil prižejnenec. Imal je dve čeri. Spomenutu ROŽU, i JELIČA teru je zel PAVEK pl. Krilčić Bradašićev. Pametim da je v mem detinstvu samo iža mega vujče Ivića bila šopom pokrita. Vujča je bil samouki majstor cimerman i tišlar. Za palaču prek puta Diskonta na PUTINE (denes se ta vulica zove NAPREDAK) sam je naredil krovišče, obluke, vrota i parkete. Delal je od jutra do zutra, na svetke i petke. Otpelali su i nega i vujnu Rožu na Majdakovicu (grobje na Odre) z nezgotovlene palače. Vute palače sad žive negva jedinica čer Zlata s familijum čeri Snežane, isto jedinice. Od vujče su grunt pri Jurekove kupili PETRAVIČI z Vrhovja, mirni i pobožni ludi, roditeli Mareka ka je po smrti muža Števića Trumbetaša Papeka z Dolenca na tem gruntu ostala sama. Deca su je se rezišla, prezime Petravić je odumrlo.

Na Jurekove vuličke su bili: pri ceste je bil LACICA ki je imal sina Tomića i Lacka komu su govorili Čalin. Lacko se je z ženum Marum rodom s Plesa od Jandriša za života dost namučil. Otranili su i na noge postavili četiri čeri i još decu čeri Mareka ka je mlada mrla. Čer Katica žive v Srbije, a Bariča je zel Ivica Capan Ličan. Lacicin brat JANKICA je bil na grunteku polek. I on je imal samo žensku decu.

Lubu ke se govorilo Pučkovica, Rožu, Magdu i Janića. Luba je celi život služila pri Paveku Bradašićevomu i prijnem mrla. Janić je do smrti muža Franca po prezimenu ŠOSTAR komu su govorili KRANKO živela v rodne ižice. Kranko je bil samouki zidar, pintar, vurmaher i još. Na tem grunteku je Nikola Oštarčević Ličan ki je zel Čalinovu najstareju čer Ankicu napravil veliku zidanu ižu. Na kraju vuličke je živel trejti brat ŠTEFICA z ženum Katićem ka je bila od Majurca z Mičevca, a govorili su je Lela. Imali su samo sina Iveka. Nega je mladoga cug pogazil. Ivekova žena Mara je ostala s troje drobne dečice: Števekom–Fikicum, Barekom i Šteficum. Žnemi je živel Marin brat Miško ki je za II. sv. rata ostal bez nog. Sečam se kak je na slike bil lepi soldat. Po vane se vozil v invalidske kolica a po iže se z rukami oditaval. Bil je pameten čovek. Lotal je lonce i rajngleke, popravlal ambrele, centreral kotače na beciklinu, stolec ili stol napraviti, košaru splesti i sega drugoga je znal. Mara je rođena v Opatije pri Kravarskom. Tam je još i denes narod zdravoga, veseloga i pobožnoga duha. I ona je rad popevala i dok je mogla išla je f cirkvu. Posebno je poštuvala Majku Božu Bistričku ke se ufala i decu rad pelala.

Z druge vuličkice poke se ide k Jankeku Jocinomu išlo se k dvemi brati.