Ober nijovoga grunta komadičke dedovine su dobile Muženička i Benička ke nisu te zemle mogle prodati dok se ni otprla vulička. Kad su 1990. na Mlake davali imena vulicam, tu su nazvali po velikanu Isusovačkoga reda z 16.st. Juraju Mulihu, rodom z Turopolskoga Rašča. Ta vulička deli Jedanove od Čačkovičof. Od Čačkovičof se sečam Petra, Iviča i Toneka. Po maminomu pripovedajnu još su dva brati otišli živet na Čutarjevo. Peter je bil ožejnen z Doricum, od Capaka bradašićevoga čerju. Imali su čer Anđelu, jedinicu, k ke se priženil Ivek KOKOT z VIVOJDINE, ze Žumberka. Oni su se od tu odselili na vugel Velikomlačke i Svete Barbare i imali su čer Katicu zamuže v Rašče i Nadu pri Likićom na Đinekove vulice. IVAN Čačković je bil ožejnen s Katićem ze Čutarjeva. Imali su tri lepe čeri. DRAGU ke se priženil JOŽIČ Ilenić Ledarkin i ka s čerjum Šteficum žive na tem gruntu, a Barek je zela MIRKA Lacković Pavinoga. MAREK je zela Števu Novosela, mesara, i žive z visokoškolanom čerjum Katicum, jedinicum, v Dolencu. Trejta čer BAREK se vdala za Tonču Martinkovića pri Pažulu. Žive z sinom Števekom i snejum Bosilkum.

TONEKA se sečam kak je po selu zapovedal do ima govedine i da bu masovni sastanak. Vu tem poslu ga je posle smrti naslednil Matić Mudičof Matlenkač. Tonek je kožnate opajnke a mesto čarape obajke. Negve žene Janeka se slabo sečam. Vuz Čačkoviće, sad Ileniće, je komačec zemle teroga je kupil ĐURO Rakitničar kaj smu rekli Bregović. Đure se malo sečam. Bregovička, negva žena je bila niska debela ženčica i dok je hodila se koj raca nihala. Nasledniki Stepanići z Lomice su to prodali Mate i Katice ze Slavonije, ki kak i Bregović nimaju potomstva. Ober ne, falačec zemle je kupil Števek Glagolić Markof z ženum Ankicum dok su još v sreče živeli od IMBRIĆA Bugarovoga. Ojdne je pak taj komačec zemle skup z ižicum ku su sklepali kupil Stevo Burilovič, Slavonec.

Med nemi i PUČKI je vulička ke smu negda rekli IŠČEVA a sad se zove vulica Antuna Švarića, po negdajnen odranskom župniku. Vugel Švaričove i Trga Majke Hrvatice kbr. 11. su MATIJINI. MATIJA Cundeković se oženil z ženum imenom Katić z Rakarja. Imali su čer EVU. K ne se priženil Štević PUČKO z Vrhovlja, z Dragonožca. Imali su četvero dece. Dragu, Katu i dečke Miju i Pepiča. Draga je zela Ivicu Atalića z Čehov a Katić je bila pri Jurčeku Črjnaku z Dolenec. MIJA se oženil z Dragum od siromašne, ali pobožne familije Krojc z Čutarjeva. Imali su četvero dece: Katicu, Slaveka, Dragicu i Iveka. Da bi je otranili Mija je danonočno stare šporete krpal i f Reliće na placu tržil. Ivek jem je 2000. mrl. Slavek žive na tem gruntu i z Božicum od Šurmanovića z Odre je imal čer Slavicu ka se vdala na Lukovec, a sin Želko je ove dane nesretno nastradal i v 25. letu mrl. Dekle su vdane i živeju na Mlake na druge atresa. PEPIĆ se oženil z Dragonošca z DANICUM i imali su sina JOŽEKA, jedinca. Odselili su se v denešnu Zamlačku i prijnemi je mrl dragi i pobožni starina Štević PUČKO z Dragonožca.

Na Švaričeve kbr.1 je moj prijatel od male nog DRAGEC Ilenić Bajsmenof. Negva mama stara DORA ke se reklo Kušajnska je taj gruntek kupila od Bugarove Imbrića i Jožića. Živela je s čerjum Katićom ku je zel IVIĆ Ilenić Bajsmenof. V lepo vređene zidanice žive Dragec z ženum MARICUM Fučkalčevum z Odre s kum ima tri lepe i dobre čeri. Kak i roditeli i dekle znaju lepo pevati i dobro svirati. Kak i na večine gruntof f selu i nijof je stare sadržaje zamenil znovemi. Mesto štale i koca su garaže i lubimec avuto. Vuz Drageca je Bregović imal štalu, a dojne je živela BARA Maković, mega tate strina. Barin muž ŠTEVIĆ je v Amerike svoj tal Makovićevoga grunta zatrinkal, pak su je ze sažalejna sini PETRIĆA Makovičevoga IVIČ i JANTON ki su bili v Amerike kupili složec zemle, a ižicu je kupil MIŠKO Štefanof.

Ostalo mi je v glave da su mi pomogali prejti visoki prag na ulazu f strininu ižicu kad sem s tatum išel strinu mrtvu čuvat.

Bara je ostala sirota z sinom JURIČOM ki je v 1. sv. ratu vubit i z deklami: JALŽUM vdanum v Buzin, MARIČOM vdanum za ĐIVANA Korilofčanovoga, DORUM vdanum za Marka Glagolićevoga i LUBUM vdanum Tučković. Na grunteku je ostala Dora ka je vuz svu sirotinju, z Markom imala sine Jurka, Števeka, Mijeka i čer Rožicu. Dečki su postali dobri majstori v svemi zanati a Rožica je otišla zamuže k Števiču Trumbetašu Teje. Od se dece, ona se jedina cirkve drži. Već nezina deca ne. Grunt je za domovinskoga rata kupila prognanička familija z Vukovara. Zajdna ižica na Iščeve vuličke je bila TONČEKOVA. Tonček Cundeković Iščev je bil ožejnen z Maričom Ilenić Bajsmenovum, Ifkovum čerjum. Imali su sina MIJU komu se reklo ANTEK ki se oženil z Rezicum Vujnović s Kurilovca. Imaju dve čeri: Nadicu ka je zamuže v Mičevcu i Snežanu ka žive žnemi, na gruntu vuz Drageca Bajsmenovoga de je negda bila Bregovićeva štala.

Na gruntu do Pučka su bili brati Cundekovići. Prvi pri putu je bil Imbrič ki je v Amerike mrl. Pojnem je negva žena ke su govorili Drina ostvarivala američku penziju. Ostala je z čerima Janekom i Jelekom. Na taj grunt se k Janeku priženil Števič Krilčić Telebek sin Lovreka Bradašičevoga. Imali su Nadicu ka je otišla zamuš na Goricu, Katicu v zamuže pri Rajkoviču na Odre, Jureka i Dragicu. Drina, Štević, Jurek i Janek su pomrli. Druga čer Jelek je otišla zamuš k Jureku Ilenić Bajsmenu. Obadve su bile počimale i cirkve odane. Iza Telebekovoga gnoja je ižu imal Ivić Cundeković Drobak. Prva žena mu je bila Janič čer Janke Crnića, a druga Klara od Mudičof. Ž nijednum ni imal dece.