Na kučnom broju iza Bugarovoga je živel Franjo Matejčić, rodom z Vrhovlja, za tišlera zvučen. Dober čovek. Ožejnen je bil z Rožicum, jednum od šest čeri Juraja Lackoviča Mrmleka, odozde kak je sad ma sestri-čna Janič, Kunička. Žnemi je živela Rožičina sestra Lubica, štovatelica MB Škapularske. Franc i Rožica su imali dva sine: stareji je bil Dragec a mlajši Francek. Posebno od Rožice su bili pobožno odgajani i takvi su ostali dogod su z roditeli živeli, kak i drugde. Z vremenom se Dragec oženil z Odre, z Vericum Polšek. Nezini roditeli Grga i Tonika su bili dobri ludi i verniki. Župnik, prečasni msgr. Loina mi je pripovedal kak su se Odrci poskrivečke nalukavali kad su On, Verin otec Grga i negov zet Dragec mejnali grušt na turnu odrske cirkve. Verina sestra Katica je z spomenutem Dragecom po prezimenu Ivančir, a po rodu Zagorcom imala dečeca ki je mali vmrl, i Vilčeka. Katica je nažalost mlada mrla tak da je Vilček odrastal na Mlake, pri tete Vere i tecu Dragecu, z nijovem jedincom Jurekom. Drageca je posebno po umirovlejnu zapošleval župnik msgr. Loina. Prečasni msgr. Loina je uviđeval da črdak dopremlen z Mraclina na Mlaku treba tišlara i cimermana kak bi mogel vujnem biti župnikov stan.
Tak je do posla došel Dragec, bister i strpliv čovek, a pomagal mu je ondašni kapelan, kešneje hrvacki mučenik Antun Grahovar. Na farofu se posebno znaprva ističeju rezbarije zake se veli "čipke". To je Dragec postavlal. Mesto stare i trule zrezbaril je nove. On i vlč. Tonček su z dana v dan bavili s komačeci somerice ili špeka i to zalevali s kakvem cikačom od armuta ili direktora zmešanoga z izabelum. Mejne više sami su si kupuvali i plačali. I jen i drugi nisu gledeli peneze ni slavu lucku.

Kad je g. Dragec mrl prečasni msgr. Loina mu je rekel zahvalno nadgrobno slovo. V naše ime ki smu žnem i z vlč. Tončekom delali, a još smu ozde, prosim saku dušu ka ovo prečita nek zajne zmoli jen Očenaš, z nakanum da je na zajdnem sudu po dobrote Bože ne zaobijde spas duše. Švogor g. Drageca Ivančera Dragec Matejčić, je kak i većina mlajše ludi za onda mislil da bu se od muke na zemle moglo živeti. Nu, ipak se več stareši fputil v večernu osmoletku, ku je odlično zbavil i skum se zaposlil v osiguravetskom društvu Croatia, de je i mirovinu dočkal. I negvoga su tatu će baš ni imal črlenu knižicu ondašni komunisti zaposlili v O.P.Z Velika Mlaka jerbo su prepoznali da je pismen. Dragecof sin Jurek se oženil z dobrum pobožnum deklum Vericum, Odrčićkum, s Korilofca. Oni fala Bogu imaju i krščanski odgajaju četvero dece.
Jeden ojdne, Karlo, već je pri oltaru poslužitel našemu župniku vlč. Mladenu. Dragecof brat Francek je isto počel na zemle. Nu i on je videl da od te mele nebu kruva pak je otišel na kurs za vatrogasca. Kad ga je zbavil, namestil se v Toplane, na Žitnaku v Zagrebu. Dvaput se ženil. Prva žena ka je bila z Mičevca od Čubrića, na fletno je mrla. Žnum ni imal dece. Kad je odovel oženil se z Slavum Korenikovum z Rašč skum je imal dvoje dece, Mladena i Mirjanu. Francek je mrl a na tem gruntu sad živeju Mladen i Slava. Mirjana se v nektero mesto pri Sesveta vdala.

V moje mladosti zajdna iža v vulice ka se denes zove Zamlačka je bila Drageca Matejčićevoga. Samo je med cestami za Mičevec i Jakuševec bila zgrada ke smu govorili šupa. Nu su komunisti mam po II. sveckom ratu oteli zemloposledniku Brigleviću rodom z Gorice i z imajna tero je imal na Gradiće preselili na Glagoličeve zemle kem se reče "Otočec". Šupa je služila za garažerajne traktorof i prikolice ke je imala za onda jaka i močna O.P.Z. Velika Mlaka. Kešneje su je dodali naziv "Napredek". Pred šupum je po letu bil dreš na kem se mlatilo snopje žitka na ruke požeto i z šopom povezano. Oko 55. godine XX. veka već su počele žeti žetelice ke su vlekli kojni ili zadružni traktori. Ni bilo kak je sad da saka iža ima traktor, a zemle su resprodane ili zapuščene. Žetelice su same špagami vezale snopje. Zapametil sem da je snopje v dreš rival Matić Mudičof Matlenkač ili nekteri zadružni nameštenik. Negda ga je ako bi se preveč z etilom stopil zamenil teri sin vučitela Vinka Jurkoviča, Laci ili Zdravko. Nekteri ojdne je zmlačeni žitek vagnul i za zadrugu 20% ušur zel, a čovek čije se mlatilo je po svoje dobrote i mogućnosti dal malo žitka za vučitela. Nas decu je zanimala slama, jerbo smu se vujnu zabuševali i pojne junčili. V šupe je osim spremišča bilo naređeno i za stanuvajne.