V sretnom braku z Pepijem Fabečičom z Gradič komu su govorili Frater ima jedinicu Irenu ka je visoko zeškolana. Imbrek z ženum Maricum ka je z Dolenca od Jude i Mijeka pl. Trumbetaš komu se govorilo Pidi ima dvoje dece. Števek je stareji i ožejnen je z Vericum od preštimane Severof z Rakitovca. Sigurno se rad imaju kad imaju troje dece, od tere se Ančica več vdala na Ples, pak su Števek i Verica lepo deda i baka. Još imaju sina Mirka, spametnoga tehničara i lepu črnomajnastu čer Božicu. Ojnemi neznam drugo. Štefica se prvi put vdala na Lukovec za Tončeka Drka, a otkak su se rezišli žive v Nemačke z drugem čovekom s kem ima i dece.

Do Imbrekove je iža Mikiča Crniča komu su govorili Žmika. On je z ženum Milkum devojačkoga prezimena Novosel, od Popine z Dolenca, imal jedinca Števeka. Rad su ga imali i zajnega se mučili. Sečam se kak su nam 1952. išle skomine na zube kad nas je vučitel Vinko Jurković pelal na izlet v Maksimir. Števek je imal penez i v Zagrebu na kolodvoru si je kupil sendvič od žemle nafilan somericum, a nam je mama doma naredila sendvič s pekmezom namazenem na kruf. Števek se oženil od Koprjnaka z Rašč, z mirnum i dobrum ženicum Baricum skum je imal dve čeri. Snežana je v zamuže v Rašče, a Mirjana žive z mamum na gruntu. Drugi su si pomrli i na tem gruntu se prezime Crnić zatrlo. Nijova je iža v mem detinstvu bila prva zdesna v vulice Kovači, gledeč z denešne Zamlačke vulice. Put pri Kovače je posle kiše redovito bil pod vodum. Posebno kak je dejnen asfalt. Vozeč se pote vulice imal si osečaj da su iže koj na breg zdignene. Posebno kad se vozilo na bagrlinu napole. Mi smu tud išli na Zavrtnicu i na Popovčicu, dok ni pokojni inđinir Tot na navirajne Jožeka Krilčič Jankecovoga skockal gradilišta. Med našum Zavrtnicum i ižum Drageca Plepelič je bila zemla ku je po žene Katiču priženil Pavec Trumbetaš, a sad su strajnski ludi, Juretiči. . Od tu se dečko priženil k Snežane, čeri pokojnoga Tomeka Krilčić i Katice, na grunt Vida Tomička Štefanovoga. Kad smu na Zavrtnice ožejali išli smu se vode napiti na pumpu k Dragecu Plepeliču, Plešanu. Negva je iža bila zajdna zleva, gledeč od denešne Zamlačke. Za onda je imal pristojnu zidanu ižicu vuke je živel z ženum Barekom, čerju Mateka Lackoviča Šnajderovoga i negve prve žene Janiča. Dragec je mladi mrl. Za sobum je ostavil čer Janeka ka sad žive v Rašču pri Bačurinu i sina Mateka komu veliju Braco. Na tem gruntu sad žive Matek z svojum familijum i mamum Barekom.

Med Barekom Matekovum i Francekom Ilenič Bajsmenovem je bila zemla Rokine, Rendulićof. Prodali su ju strajnskem. Francekova iža je na grunteku bila zleva, a štala prejdnum. Gnojčina je ze štale išla na put. Malo pametim i Francekovoga oca Štefeka. Francekova žena Rezica je od Šnajderove. Imali su dve čeri. Za Janekom je norel i oženil ju Ivič Šešlagin. Katica se vdala v Mičevec. Na žalost, mlada je mrla. Stoga grunta su: Katič ka se vdala v Dolence za Miška Novosela Šaroga, Marič Tončeka Cundekovič Iščevoga i Janek pri Bakranu v Rašču. Po vuske linijice iza Francekove iže išlo se k negvomu bratiču Jožiču, ki se od tu z ženum Dragum, ocom Ifkom i mamum Baričom Ledarkum preselil v Draginu rodnu ižu k Čačkoviču...