Na zemle ka je bila med tum linijicum i Tončekom Lacković komu su govorili Pinđok je drevenu ižu naredil Dragec Števe Cogarovoga i vujne živel z ženum Katičom, Jože Glagolićevoga čerjum. Imali su dvoje dece: Drageca i Bareka, teri su tu i odrasli. Katič je puno let delala v Nemačke. Priskrbela je tuliko da su si naredili lepu zidanu ižu v Dolcu, na Katičeve zemle v denešne Kramaričeve vulice. Otec Dragec se je zamantral na motorčeku i mlad vmrl. Sin Dragec se oženil z Šteficum, čerju Mijeka Cundekovič kaj mu veliju Pišlek. Imaju sina Karla na teromu još traje prezime Crnič i čer. Živeju skup s mamum Katičom. Na Dragecof grunt pri Kovače se doselil Branko Krojc z Čutarjeva. Gore sem spomenul Tončeka Lacković Pinđoka. S Pinđokovoga grunta su vzamuš otišle: 1. Roža ke se govorilo Drina je otišla k Imbriču Cundekoviču i ima živu čer Jeleka Ilenič, a Janek je vmrla; 2. Jaga ku su zvali Babica, a zela je Pavla Lackovič i žnem imala četiri čeri: Katiča ka je zela Pavca Trumbetaša ke su govorili Kika, Bariča pri Lukše v Korilofcu, Rožicu pri Iviču Vugrinoviču na male Gorice i Janiča ka je zela Mateka Šnajderovoga skem je imala ćer Bareka vdanu za Drageca Plepeliča. Tonček je mene ostal v glave koj veselak i šalivđija, navek nasmejan. Zafrkant bi se reklo i dobričina.

Po ocu Jankiču spada v Šnajderovu zadrugu. Negov otec je bil brat Mikcu Šnajderovomu, Števiču (otec Rokojne zbrega), Đure (oca moje mame stare) i Lacku Šnajderovomu, z iže de je sad vatrogasni dom. Jankič se priženil na grunt k Mare tere su govorili Pinđa. Imali su sina spomenutoga Tončeka i čer Lubicu ka se vdala za Števiča Korilofčan komu su govorili Štefinec ili Papek. Po dogovoru starcof kak je to za onda bilo, naređena je zamena. Tonček je zel Janiča, Papekovu sestru, a Papek je dobil Lubicu. Tonček i Janič su imali dva sine: Števiča i Stanka. Mladost nam se sprepletala do svršetka pučke škole. I Števek i Stanko su bili vrsni nogometaši. Števek je veči del dosadajnega života v Nemačke. Ožejnen z ženum Vikicum ima dve čeri, a ižu je naredil na mestu de je negda bila ižica Jankičove sestre ex časne ku smu zvali tetka Juda. To je vuz Baricu Lackovič Kolaričkinu k tere se priženil Jožek Mirenič z Rakarja. Na tem gruntu žive Števekova čer Vesna z mužom Marijanom i dečecom. Žnemi je i Vikica. Čer Ksenija je naredila ižu v "Otočecu" i tam žive z mužom i dečecom. Stanek se oženil z zagorčicum Verum skum ima dve čeri. Ojnemi neznam puno. Polek Tončeka Pinđinoga je bila zemla Drageca Cujnkovoga Dajdekovoga. Prodal ju je doselencu Milanu Đuđiču, Stojanovomu bratu, za gradilište. O temi neznam puno jerbo vuvo vreme tero opiševam nis knem na blagoslov iže z župnikom zalazil. Vužnega je ižu naredil Jožič Lackovič Beničkin ki se oženil z Barekom, od Joška Arbanasa-Lajiča.

Jožič je sin Bariča Beničke ka je mlada z puno dece ostala dovica. Vu takve, brojne familije, nafčil se teškomu životu. Celi radni vek je bil uzoren majstor v Gredelju i dober nogometaš v Mlačkom "Traktoristu". Z onemi dečki ke sem prije v Barke spomijnal i on je utemelitel nogometa na Mlake. Imaju dva sine ki su potrdili da plod ne opada od stebla dalko. Ivek je prižejnen k jedinice Bareku, čeri jedinice Imbroške Cundekovič Iščevoga Štefe i Jureka Solić z Rašč. Ivek z Barekom ima jedinicu Ninu. Mirek je ožejnen z Nadicum, po roditele Cebin z Buzina, a odrasla je pri tecu Cvetkoviču v Rašču. Imaju dvoje dece. Sina Tomislava ki se oženil i žive v Rašču pri tecu, i lepu čer Martinu ka žive žnemi i ide v visoke škole.

Na zavijutku prama Mičevcu i k Kovačom išlo se na dvorišče Iviča Cundekovič komu su govorili Sigeta. Bil je zvučeni opajnčar i koj v megle mi je da mu je ižica bila vuz denešnu ižu Ratka Kušena, okomito na Zamlačku. S prve strane su bila vrata v radionicu. Kuliko je on opajnčariju delal ja se ne sečam. Sečam ga se koj čuvara v šupe pri O.P.Z. Velika Mlaka i koj vatrenoga potrošača nikotina. Znam da je bil dobričina i v šupe če baš ni trebal, pomagal je Joceku Glagoliču zadružne teliče raniti. Od tu je i umirovlen. Ožejnen z mirnum i kuliko sem mogel spoznati dobrum ženum Dragum, po rodu Zagorčicum. Imali su čeri Danicu i Božicu i sina Vladeka. Danica je završila srednu ekonomsku školu, za onda kad su još dekle i dečki na selu doma ostajali. Mislim da je radni vek prebavila v Zagrebačke mlekare i odonud umirovlena.