V desne, zidane polovice črdaka se puno toga do denes zmenilo i puno ludi prešlo. Najviše je one ki više nemreju niš reči niti ovo pismo čitati. Si mi nek oprostiju ke sem nenamerno pozabil spomenuti, a oni ki su morti još med nami nek moju nakanu ne zemeju za zlo. Ki su pomrli kak i oni na životu, svedoki su svega vremena i saki bu za način trošejna talentof odgovoren pred Bogom. Pametim da sem tu, koj dečec bil na svadbe Števeka zbrega kad se prvi put ženil z Janičom Imbriča Jurekovoga Lacković. Osim svadbe tu su bili masovni zestanki, sačkojačke priredbe, predstave i zabave, a kad je počela delati Zagrebačka televizija deli su nutre televizor teroga je selo kupilo. Na zajdne, tu je puno let bila bertija, ke vuto vreme ni bilo na sakom koraku kak denes. Bertija je za onda vuz cirkvu i školu bila jedino informacijsko središće. Nikakve novine nit radija ni bilo, ni televizije. Bertaši i bertašice su se i onda mejnali ali ne radi toga kaj nisu bile plavuše, nek zato kaj su si morti našli sigurneji posel. Moralneje ili obzirneje je to vreme bilo. Nu i za onda si je nogi pijanec dozvolil bertašicu za rit ščeknuti. Zato se iskal drugi posel. V bertije se jedino ni mejnal lucki inventar.

Pred oči mi dohaja slika kojnekof, rage, ke su potpregnute v kola stale i pred bertijum kujnale dok su, najviše f sredu, gospodari zalevali dobru trgovinu v Reliču. Za moje mladosti, pozitivci i skoro legende vutom su bili sad več pokojni Joško Mudičof i Mija Pučkof. Joško je bil kravski i kojnski trgovec, a Mija je stare šporete kupuval, popravlal i pokrpane tržil v Reliče na placu. I pokojni Joško Lajič Arbanas, Ivič Trumbetaš Čaruga i moj švogor Štefan bi teri put z neprodanum kravicum privezanum za ograju križnoga dreva nutre kokodakali. Tak su z leta v leto z blagom ograju rescukali. Na kraju me župnik vlč. Loina prosil da reskopam ograju, kaj sem s pokojnem Števičom Krilčić Telebekom i naredil. Tak je na križajnu pred črdakom ostalo, vlažno, od cigla zezidano križno drevo, tero je župnik Bosancu Jakovu z Maglaja dal zrušati i po škice inž. Gadže z Kramaričeve vulice scimenterati ovo ko je sad. Staro je bilo četverokutno i v niša je imalo slike na plehu ke je obnavlal maler Dragec, šumasti, z Gorice.

Ja to nebi znal da me ni nekuliko put Braco Kovačić Pavičin prosil da ga zamenim dok je on bil bertaš, a on je išel staterat nekterem glumcom f kazališče. Takve zafrkancije i šale kakve su ovi jednostavni i dragi ludi v bertije spelavali denes više ni. Ali i ondašna piča su na denešna gledeč bila lek. Denešna su više umetna, nenaravna, jača i otrovneja, pak je i narod ki v bertije gušče zalazi nabrušeneji i agresivneji. Na sreću tu više bertija ni, nek vutom prostoru Đurđa Havidić čer Joška Mudičevoga i Mare okupla žene i dekle ke imaju smisla i voliju tancati i pevati. Nijovu vrednost su spoznali ludi po cele Hrvacke, ki to razmeju. Takvo družejne je preporučlivo posebice mladem jerbo budu srca imali ispujnena veseljem a ne čežnum za porokima denešnice.

Na katu črdaka ober bertije su negda doktori dohajali cepit decu, i mene je mama pelala. Jedno vreme je tu bila selska uprava. Tajnik je bil Imbrek Crnič. Sečam se da su k nemu ludi išli po osobne iskaznice i kučne broje. Mi smu kučni broj 20 zamenili za 172. Pred Imbrekom se moralo potpisati da si dokument dobil. Kad je uprava preselena na Goricu na črdak su počeli dohajati i mejnati se stanari. Najviše selski vučiteli skursani posle II svetskoga rata. Svetozar Vulič, onda nekakov Cvjetko pa Radojka Vujovič, dale se ne sečam. Posle jne, tu je O.P.Z. imala fajn let koncelarije. Od tu su počimali i tu su radne naloge traktoristi predavali na obračun. Kak i denes i onda su ludi jamrali na iznos računof ali se plačajne navek dogovorilo na mirni način z zadružnemi službeniki. Denes ti odma na računu piše doklem ga moraš podmiriti a ako nebuš peš v rešt.