Kad su se z prve iže na črdaku dučanđija Francek Vučko z Micikum i čerkum Danicum otselili živet v novu ižu v denešne Zagrebačke vulice, vujnu su se privremeno naselili nogometaši. Tu su se preslačili a onda poprečke po denešne Bosanske vuličke išli na igralište ko je bilo ozde de je sad Diskont poduzeća Sloboda z Gorice. Igrališće je tu bilo leta a onda je narejen Diskont fterom je jedno vreme direktor bil Francekov zet, Plešan Ivica Župetić. Posle II. svetskoga rata na Mlake više ni bilo pevačkoga društva ko je bilo za stare Jugoslavije nek su postojali samo vatrogasci i nogometaši. Mene su v lepom sečajnu ostale zabave na placu pred črdakom ke su pripravlali baš vatrogasci i nogometaši. I to obično v Srpnju, za Svetu Janu. Kak je to vrući mesec a ceste su bile našudrane, bilo je puno prašine. Pojne je napadalo slamijna z vozof slame ili pleve tere su ludi vozili z mlačejna žitka. Za zabavu je zato cestu bilo treba prirediti a i plac pred črdakom tak da bi se najnem moglo složiti stole i oko jne tancati.

To su vređuvale žene od vatrogascof ali i one bližne. Cestu su poškroplevale z vodum a onda zmetale do trdoga, da se nebu naredilo blato ko bi se inače mesilo kad bi tancaši tancali. Tu i tam je toga i ostalo ali v žaru tanca, ni se ni gledelo kaj je pod nogami. Nekuliko let su igrali svirci z Gorice od ke je jeden imal tamburu zaku su rekli Havajka. Ona je puščala onak nekakve duge i zafrknute tone, pak nam se to za onda činilo gospocko. Bina je svircom obično bila narejena pod pristoškom od štenge kak se ide na črdak, tak da bi za slučaj kiše imali pokrivalo nad glavami.

Na trokutastomu placu teromu je baza bila dužina črdaka a špica križno drevo, bili su postavleni stoli i klupe ke su dovažane i z druge sel. Plac je bil ograjen z visokem vrbovem šibjem po teroga su već dan dva prije zabave vatrogasci ili nogometaši išli v Preko. Ograja je bila narejena tak da je med v zemlu zatučene drvene stupe poprečke bilo privezano kolje, a mejdnemi po visine sprepleteno šiberje, tak gusto, da onaj ki je štel zabadaf gledeti na zabavu, moral je šibje fajn rezmeknuti da bi kaj videl. Na papušku črdaka se za onda još moglo lepo prečitati natpis: "VJERA U BOGA I SELJAČKA SLOGA". Z vremenom je natpis zbledel, tak da ovi ki su ne tak zdajna popravlali črdak to nisu videli, ili nisu šteli videti. Posle nogometašof na črdaku su Velikomlačke omladinke naredile muzej. Kad bi malo doma na najžu med paperi poiskal, našel bi nekuliko kartice ke sem za RVG 1966. napisal o muzeju i negvom sadržaju. To je bilo prečitano na RVG postaje za onda kad je imala samo dve špikerice, Mirjanu Stepanić i Mirnu Sunić. Za selo s tuliko ludi je šteta, da taj kak to sad veliju projekt ni opstal, jerbo bi se mogli štimati pred sobum i svetom da i mi velikomlačani nekaj od folklornoga i kulturnoga bogactva imamu.

Prepadajnem toga muzeja zahičena je starina ku su po selu skuplale dekle omladinke. Moja mama je dala fajn rubenine i starinsku postelu z drejanemi cilinderi na zglavju. Kak naše selo ni imalo nikakvoga društva ko bi promikalo kulturnu tradiciju, dekle ke su skuplale i žrtvuvale se oko utemelejna muzeja Mira i Nena Korilofčan i Đurđica Imbrice Glagoličeve su ostale bez potpore. Ni v selu ni na općine nisu imali naročitoga sluha za takvoga nekaj, osim, kak je to i denes, kad su na otvorejnu došli jest i pit. Na kraju, one nisu ni imale komu to predati jerbo je došla tzv.Šuvarova škola i žnum naraštaj ki je imal drukčeji pristup kulture. Po tem su zrcala, stalki z rubačami i kožuni završili na smetlišću pišališću iza črdaka, a na postele su neko vreme spale selske skitnice ke je jedno vreme bilo pet šest.

Da je to opstalo, selska kronika se nebi svodila samo na cirkvu, vatrogasce, nogometaše i bertije. I dok prva tri društva kuliko tuliko delaju na zajedništvu i opće koristi, ovo trejte dela na rezgrajdne osobe, obiteli i društva. Vučitel Hrvackoga naroda Stjepan Radić čija je izreka bila ona napisana na papušku črdaka a skum se i sad diči Hrvacka seljačka stranka, još za onda je rekel da v bertiju vodi jeden, a z žne idu dva puti: jeden v ludnicu a drugi v grobnicu. Z vremenom su se Svetojanske zabave premestile v novi vatrogasni dom i prejdnega, na drugi kraj Trga majke Hrvatice. To je vreme nogometaške turnerof i pojave trgovcof s plastikum i one kaj jem se veli šibicari, z kuglicami od testa sfrkanemi. Kad si mislil da si siguren pod terum škatulum je kuglica i dobil buš vuru jerbo si dal dvajset dinarof, šibicar zdigne poklopec od škatule, a kuglice ni. On ju je zmed prstof na brzinu pustil pod drugi poklopec, a ti si na brzu ruku ostal bez penez ke si doma ofuknul ili su ti tvoji dali za sladoled ili medejnake. Nogi su to čuli koj pripovest, a nogi su tu prevaru poput mene na svoje kože sprobali. V mojemi očimami su junaki bili oni dečki ki su skup z stolom zrušili, te, mejne više neukus, i vus put potirali te žicare. Pošteni čovek ki je na ruka koj rođo nosil škatulu z špangami, češli, kopčami, gumbi je bil Osman Nezirović ki si oženil z Rakitovca i na Gorice si naredil ižicu.

Negov sin Vlado je puno let kešneje zel Mlačicu Katu Lacka Lakoviča Čalina. Osman je tržil na proščejne: na Odre, v Jakuševcu, Vukovine, na Gorice i Lomice. Zapametil sem ga i na Marije Bistrice. Zave dečke ki su restirali i natukli švercare su govorili da su Posavci z Čutarjeva. Oni su se na zabave dopeluvali na becikline ki su bili prirejeni za voziti kante z mlekom. Na smeh mi dojde kak su si za onda dečki s plučkom gelerali lasi, a onda se začesali i v vatrogasni dom zahajali na zabavu. Teško da bi si pred 50. let štiklec o kume ki vuz plot zamikaju v bertiju pretumačili drugoč, nek koj šalu, a ne kak denešni, nabrušeni čovek, teri i pred oltarom stoječ, ne razme, da v diku nebesku moreš, samo, ako podvrgneš i drugi obraz. Pisajne ove kronike je začuvavajne miloga kajkavskoga govora, a za sako drukčeje tumačejne vredi izreka ku je još prede 150. let Silvije Strahimir Krajnčević napisal ovak: