Po letami, vužnega i vuz šafera autobusa g. Tadiju, ja sem bil med starešemi, a po staležu je to bil naš župnik vlč. Mladen Sinković. Ali i leta i vreme se zgubiju kad se najdeš med veselemi ludmi. A na tem putu su si baš takvi bili. Mam potle molitvenoga zaziva za sreten put, mešale su se v autobusu cirkvene i narodne pesme. A te, fala Bogu, naš narod ima, vlč. Mladen je zna, ali i voditelica Schole cantorum g. Petrušić zajnem ne zaostaje. Malo pevajuč, malo pripovedajuč, primikali smu se malom Međimurju.
I, bome, točno iza sedmoga zavijutka zagledali smu natpis: "Dolni Pustakovec". Vujnem je prvi put oči otprl i pri rođejnu se zaplakal naš velečasni Mladen. Nekemi od nas su oči zasuzele od radosti, kad smu pred negvum ižum zagledali oca Vladu kak zastavla g. Tadiju i nekaj se žnem dogovarja. A kaj? Na nijovem dvorišču imaš kaj za videti. Stoli prestrti stolnakemi, najnemi sake fele jela i pila koj za svadbu prirejeni. Onak od ladnoće stišneni, pričupili smu se k jelu, komu se kaj štelo.

Neznam jeli su nam oči preveč vpirale v stol, ali nigde, pa niti pod oblukom ni bilo videti povehnutu fijolicu. Oko nas samo klinček rože, raj na zemle. Tu i nemreš reči drugo nek: "Bogek, tu mi živeti dej, tu je mega srca raj!" Nu, lepotu ku su nam mama, tata i župnikov brat Ivek s familijum pripravili, morali smu poradi časa skratiti. Prije nek smu se otputili v autobus, oči ti pobegneju prama potoku komu veliju "Sratka". Vužnega verni Dolno Pustakovčani zidaju kapelu ku budu posvetili Blažene Device Marije Kralice. Tu mi je napamet došla naša velikomlačka himna ka veliča sine ki su grabe zavozili i tak je sad ni, a ozde v Dolnem Pustakovcu, če je i selo nimaš osečaj grabe, već misliš da si zalutal v kakov Botanički vrt. Nu, i do našega konačnoga cila, levo i desno cvetje.

Vozeč se čez taj pustakovečki raj dojde se v mesto Sveti Juraj v Trjnu. Prvo smu se prepelali vuz farof, a iza križajna za mesto Hodošan, dojde se do prelepe barokne cirkve Svetoga Juraja. Tu nas je z nekuliko muži i žen dočkal župnik Darko Kelemenić i mam uputil na korož, jerbo smu z vremenom bili knap. Cil našega pohoda je bilo vraćajne dobrote župniku Kelemeniću i negvem farnikom pevačom skemi je g. Sinković uzveličal Božićne dane na Velike Mlake lajnskoga leta. G. Sinkovića ja od poštuvajna zovem maestro i profesor, jerbo mu je Bog dal talent da je i bez Akademije vrsni orguljaš i voditelj pevačof. Pod mešum poldajnicum slavili smu skup z domačemi Isusovu žrtvu.

Pevački program su složili brati Peter i Pavel Maković, teri i solerali pripevni psalam. Zbor i solistice v pevajnu, Anu i Katarinu Ilenić, pratila je sigurno i pouzdano naša mlada, ali vrsna orguljašica Josipa Kurilovčan. Čitajna epistole i molitvu vernikof vodile su domače čeri, a duhovni nagovor pod mešum imal je naš župnik vlč. Mladen. Na kraju meše, za naš dolazek, v ime svoje farnikof zafalil je vlč. Kelemenić. Ako smu je se dojmili kak su rekli, za nadati se je da nas budu pozvali f taj raj na prvo proščejne, 22. kolovoza 2004. kad se planera posveta cirkve BDMK v Dolnem Pustakovcu.

Prije svetešnoga obeda, vlč. Kelemenić nam je osim cvetjem ograjenoga farofa pokazal svoje gospodarstvo, z lentami ograjeno, v terom drži jato nojef. Noji ležeju jajca velika koj rukometna lopta, a kad ga nojica znese, župnik ju mora na prevaru namamiti na jeden kraj ograje, a onda trkom fkrasti jejce.

S farofa smu se si uputili v Vatrogasni dom, de je vrsni kuvar vuz pomoč vredne žen priredil raznovrsna i fina jela po kemi su Međimurci na dalko poznati. Takva fina jela i kolače su mene i drugemi oči štele pojesti. Na kratko smu fino i obilno blaguvajne prekinuli dok smu predavali naš dar župniku. Posle se još tancalo i pevalo, a iza pozdravof i zafaluvajna domačemi krenuli smu prama severu, de leži vinogradski kraj maloga Međimurja.
Za nami je ostal potok Trnava polek teroga cvete potočnica plavetna, na desno Štrigova, a pred nami Železna Gora. Bome, motor autobusa je kihal dok se spijnal na taj breg i se dok se ni pred nami pokazal grad Čakovec. Tu smu pogledali centar i Stari grad Čakovec, steroga su 1671. za navek v Bečko Novo Mesto otišli naši velikani Fran Krsto Frankopan i šurjak mu Petar Zrinski. Kad sem navečer legel v postelu, zafaleval sem Bogu za prekrasni dan i za prijatelstvo z dobremi ludmi skemi sem ga imal radost deliti.