Denes je to se skvacal ranžerni kolodvor i obilaznica, a Jakuševec (na slike desno je župna cirkva) ni više poznat samo po Rokovskom proščejnu, kolaru Franceku Mihalinčiču i kovaču Cerneliču ožejnenom od Rokiča z Mlake, po Vrbane, Tuškane, Bedekoviče i bertašu Srake, nek, po smetlišču za teroga znaju po cele hrvacke ali i dale. Po promislu Božem gore ožejnenem se rodilo troje dece, v iže vuku se kešneje naselil Matičovoga brata Štefinca sin Radek. Prvo se zrodil Mladen, a onda dvojke, Mirjana i Nevenka. Po nekakvomu obitelskom dogovoru, Matič se kešneje svojum familijum nastanil na rodnom gruntu, de je mesto stare drevene iže, na onem negdajnem sajniku naređena lepa i prostrana zidanica, koj palača.

V novo narejene iže dok nisu počele ženidbe, leta su živeli ovi ke sem zapisal, a lepi broj svoje staračke dani dokončala je tu i Katičova mama, Petričkovica. Od dece se prvo oženil Mladen z Katicum Kunič Katijum, čerjum Mikiča i Mare kemi se reče Gibajnakovi, od Pažula. Katija je zrodila troje dece: Najstareja, čer Anela i najmlajši, sin Matek živeju žnemi v zajedničkom kučanstvu, a sin Kruno Stjepan se odselil k dede Matiču de žive z ženum Josipum, skum ima dečeca Jakova.

Iža je narejena vuz štalu prezentiranu od Higijeničkoga zavoda, ka je ostala onakva kakvu pametim od detinstva. Dvojke Nena i Mira su se povdale ali su se z muži svetoklarci vrnule natrag i živeju v novemi ižami narejenemi na negdajnemi Korilofčanovemi vrti. Te su iže v osemdesetemi leti prošloga stoleća naređene po tlorise negdašne Turopolske grajdne i bile su najlepše v selu. Sad su vuz te iže naredili nekakve pavilonske zgrade skemi su po mem mišlejnu nakazili lepotu one prve iž, ali i okoliša. Nu, saki ima pravo na svoj ukus!

Nena je v zamuže bila pri Piškoviću od kud sem se kešneje i ja oženil, tak da smu imali iste: svekra (tasta) Mladena i svekrvu (punicu) Katicu rodom Fiolić z Male Mlake. Neninomu mužu, memu švogoru, je isto bilo ime Mladen, i cirkveno Josip, a za života mu se govorilo Braco ili Panta. To mu je stric Milček Pišković zmislil. Imali su dve curičke: Luciju i Anu. Lucija je išla v osmoletku, a Anči je imala par let kad je Mladen z tek napujnene četrdeset let mrl. Zaradi puno dobroga kaj je ludem naredil, pokojni Mladen Josip će baš ni bil na jeziku veliki vernik sigurno je zlatnemi slovi pri Bogu zapisan. Da spomenem samo onda kat se črdak, denešni farof, reskapalo i z Mraclina na Mlaku drevje prevažalo. Bil je organizator prevoza i glavni trušar. Ni žalil trošiti svoje peneze i ludem platiti pilo i jelo, od reskapajna črepa i sten, do istovarevajna drevja na Mlake. A bilo je oko pedeset gumejnakof i tuliko šaferof. Ta, materijalna strana je Bogu mejne važna, nu on je i na druge načine ludem pomagal čega se nogi sečaju i dendenes mi otom rad povedaju. Naročito oni skemi je delal.