Broj
Godina
© K_com Dtg Ltd 2005.
Broj |
55 |
Godina |
6 |
| Srpanj, 2004. | |
© K_com Dtg Ltd 2005. |
|
| |
|
 |
|---|
Put u povijest |
Predstavljamo |
|---|
 |
piše: | |
| Nikola Maković | ||
Put u povijest |
||
| Oko polovice šezdesete let XX. stoleća ja i sestra Janica smu išli na Goricu v osmoletku. Vuto vreme ni na Mlake bilo niti traga od avuta, samo je mejni broj familije, a mejd nemi i moja, imala beciklin. Z ramum, muški. Kupili su nam ga f Reliču od čoveka ki je z beciklini trguval. Tak se sad z avuti trguje. Z voziti beciklin ni bilo treba ispit polagati, ali nafčiti ga se voziti je bila muka. Mi smu bili mejni i nekak nam se bilo leže nafčiti voziti. Sestra Zlata a i još puno ne fselu ki su bili stareji ojdne su se, ja mislim zaradi srama, vučili beciklin voziti po polskemi puti i linijami. Starejem je bilo teže vloviti ravnotežu. Za savetuvajne pri kupuvajnu beciklina moji su zeli kuma Iviča Šafranića, komu se reklo Bakarič, avutomehaničara z Gorice. Prijnem je zanat zvučil Dragec Lacković, Bigarov zet. Na beciklinu se z Relič dopelal Jakop Bradić, otec mehaničara Štefeka Bradića. Jakop je bil cestar, a saki cestar je za ono vreme vuz lopatu i metlu dobil i beciklin. Nijovi beciklini su na rame imali obešenu tablu z broji. Cestari su bili državni namešteniki, poput one na železnice. Moji doma, ni tata ni mama nisu znali voziti, a nam je prve inštrukcije dal baš spomenuti Jakop. On je oko beciklina nekaj znal. Ostalo mi je v glave da su ga pokojni Iva Bajsmenof i Jocek Glagolićov pregledali i rekli da je kotač dober. Pri vučejnu vožne beciklina se padalo, ali ne na ispitu z olovkum, nek z nega dole. Pri atererajnu se zaradila tera hrga na glave ili natukla ritesnica. |
 |
 |
Za onda je bez beciklina bilo kak je denes bez avuta. Najnem se vozilo mleko v Zagreb, bisage z trgovinum ili mlekom na Odrsku železničku postaju, kosci su z reskopanemi kosami išli kosit v Međidorje, hodočastilo se k Majke Božje Bistričke, dečki su išli na zabave po sele. Onem ki nisu imali kojneka, poslužil je je za voziti s pola ranu za kravicu. Ti ludi su delali dvostruku korist. Nisu imali salo oko trbuva i vusput delali korisno za život. V denešne vreme vidim jednu ženu kak se z ruksakom na pleće punom kamejna vozi po Mlake. Pripovedaju da tak skida vajnkušeke oko trbuva. Nam je beciklin trebal za voziti bisage z mlekom vjutro, Zlatice na cug petak, a ob sedem smu se vozili na Goricu v školu. Saki dan je jeden gazil, a drugi je na rame sedel. Negda su nas znali milicajci zastaviti i špotati zakaj se dva vozimu. Puno put su nam pri Ročiču, to je prek puta grobja na Gorice, opuščali kotač. Morali smu peške iti domom. O avutobusu za onda još ni bilo govora. Kak smu v jutro prije škole doma jeli mleko z nadroblenem kruvom, ze zubi nam se osečal miris mleka. Sad mi je žal, a onda sem za falu kaj me vozila, Janice spočitaval da je smrdi ze zubi po mleku. Naročito se zdihavalo kad si se spijnal na breg vuz Kramariče. Breg je počimal pri gasilane (to je početek denešne Kramarićeve vulice), a završaval pri iže Jure Sušinoga. Ona je prekapajnem za sakojake cevi i žice zjednačena, tak da se na tem mestu breg denes skoro niti ne primeti. |
| Na slike: Čeri Mike Lackoviča | ||
| Do gasilane je v mojem detinstvu bila praznina. Jedno vreme su tu zmudičkani Matek i Števič imali dreš, a slama i pleva su se odlagali na denes asfaltiranom povišejnu Trga Majke Hrvatice. Vuz taj plac je bila bertija Mike Lackoviča Kolaričkinoga. |
| Mika je bil ožejnen z Dorum, sestrum Roka i Vinceka Lackovića komu su govorili Anđelor. Taj komačec zemle vuzotu prazninu mu je kupilo selo, ze sažalejna, kaj se s puno dece moral zeseliti z denešnega črdaka vukom je puno let bil jedini selski bertaš. Mika i Dora su imali sine: Iviča i Števiča komu su govorili Lakek, i čeri: Bareka ka je mlada mrla, Janiča ku je skup z sinom Brankom zel Andrija Popović, Lubicu vdanu za Marka Halugu z Mičevca i prelepu Đurđicu tera se vdala k mehaničaru Hapaču na Goricu. Zajnu su se jagmili Branko Hapač z Gorice i Brežan Jakop Medved ki je potlem zel Bareka Franca Lacković Kolarovoga. Vuz bertiju i ižicu Imbreka Kramaričevoga vuke je sad doselenec Miro Vunić, bila je iža Števe Kramaričevoga komu se reklo Patevek. Negva žena Marič je bila Dolenčica od Trumbetašof, sestra Mijeku Trumbetašu Pidi. Imali su dve čeri. Stareja Marič je v zamuž otišla v Korilovec k pobožne familije Fabečič, a Štefica je zela Tomeka z Odranske Obreži ki se preziva Pinko. Dok su starci bili živi, Marič je redovito, posebno na proščejne Svete Jane dohajala knem na Mlaku. Števa mi je ostal v glave onak naslojnen na putnena vrata, a mi smu ga pozdravlali Falem Isus i Marija. On je polagano i restegnuto znal odgovoriti: Naaveekee! Po nijove smrti gruntek su čeri prodale i najnem sad živeju doselenci. Sused Števe je bil Jura Kramarič ki je bil ožejnen z Jagum, sestrum Ive Crniča Kovačevoga. Jura je bil gizdavi brkasti muž, a f štale je držal puno blaga, ko je navek bilo čisto i vrejeno. Ni smelo imati brabojnkof po riti jerbo je bil član marvogojske udruge. Ja sem koj mali z svojem tatum ki je isto bil član, nekuliko put k nemi pelali nadzornika za mlekarstvo Tomu Blazeka z Kotoribe, ki je pri nami više let spal. Jura je imal i švajvaglin, kaj je takaj bila retkost f selu. Jurina i Jagina jedinica Janič se na početku II. sv. rata vdala za Iviča Lackovič, Mikinoga i Dorinoga sina. Nijova čer Ivanka sad več i ona pokojna se zrodila 1943. Svega oca ni ni poznala jerbo je v ratu vubit. Ivanka je zela Števeka Krilčić Capakovoga i ž njem imala čer i sina. |