Števek i Ivanka su se nastanili i pomrli vuve iže na početku Kramaričeve vulice de je bertija Sinfonija. Vlasnik bertije je prižejnenec Neno Detelič z Buševca, Ivankin zet. Sin Ivankin žive na grunteku ki je na samom križajnu vulic, Svete Barbare i Ivana Lackovića. I on je vlasnik bertije Orion i lagano resteple dedovinu. Janič se po smrti Iviča Mikinoga prevdala za Ivicu Cundeković Tominoga, brata mega švogora Štefana. Imali su jedinca Juru ki se oženil i bez žene ka mu je otišla žive z sinom. Malo po malo, kaj su stari pribirali, ovi poput večine domorocof restepaju. Na gruntu do Jure Kramaričovoga je živela Reza Kramaričova. Naprvo je bila iža ka je spram one z polovice prošloga stoleća obnovlena i povečana. Pri Reze je bil prižejnen Suša rodom z Korilofca ki je bil namešten koj stražar. Reza se rada mučila i v lepe leta ka je doživela je z kokošami ili jajci v košarami išla na plac Dolac v Zagrebu, s cugom. Z Rezum je do smrti živela sneja Milka z Lukovca ka je ostavila fajn starejega muža Meštrovića, z ižice vuz mlinara Drolca na Gorice i pobegla za Jurum. Za Juru veliju da je bil dober svirec. Nu, v II. sv. ratu je nesretno vubit. Z Milkum su živela deca, čer Marič i sin Zlatko. Mariča je zel Pavel Rebič s Korilofca. Nekaj kešneje ju je ostavil, a k ne se priženil Ivek Polski.

Za ono vreme kad su mudri velikomlački plemenitaši imali po jedno dete oni su imali četiri čeri i dva sine. Če su i siromašno živeli nikoga nisu niš prosili. Imali su kak i drugi kravicu ali i kojneka. Stari Štević je bil spreten i po drevju se spijnal koj pauk pak su ga ludi prosili da jem paune ki visoko rasteju podrezuva, opseka ili ruša. S kojnekom ragum si i v Lug Turopolski otpravil kak i drugi ki su se prčili da su nakaj. Janič je bila dobra mama svoje dece skemi je bar dok su još poslušali rada v cirkvu dohajala. Rad je pevala a to je ojdne nasledila i nuka, od Števiča komu veliju Keva čer. Zlata je bila najstareja. Ona je koj slastičarka delala vulice 8.Maja i odonud je otišla v Švedsku de se i vdala. To je bilo pred četrdeset let i više ju nis videl. Iza jne je bil Števič Keva, ki je bil legenda med velikomlačkemi nogometnemi navijači za onda dok se klub zval "Traktorist". Redovito je lajnal igralište a mati Janič je neko vreme i prala drese od nogometašof. Jana je bila trejta i žive z mužom Brankom i dve čeri v iže naređene na negdajnem nijovom vrtu. Sad se zove Strmo. Četrta je bila Lubica. Ona se vdala na Lukovec za visokoga rasta malera Cvetkovića komu veliju Malecki. Maca je bila peta, vzamuže je na Brezovice a zajdni i najmlajši Jura žive z ženum fiže ka je pod istem krovom pod terem i Kevina, samo saki ima svoj ulaz. V dvajsetom letu mu je 2002 sin poginul v avutu na križajnu ceste za Goricu i erodrom. S tem bi dečecom da je bilo suđeno prezime Rajković trajalo duže, ovak se z ovemi ke sem zapisal zatira nakon niti 100 let.

Nate strane do ceste više ni bilo nijedne iže samo je na levo gledeć od sela još bila drevena ižica Rokeka Lackoviča a nekaj kešneje i negvoga brata Mijeka. Ne sem spomijnal kad sem pisal o Lackovići. Rokek je z dobrum i pobožnum ženum kakof je i sam bil imal tri dečke. Iveka, Števeka i Mijeka. Bilo je siromašno ali su dečki nasledili roditelsku mudrost i poštejne i si škole završili. Si su tehničari i obitelski ludi. Ivek je vozački instruktor sretno ožejnen z Rožicum Naglič, Malomlačicum. Na puno je ludi prenesel tehniku vožejna avuta, a najviše na svoje dečke Mladena i Želka. Ovaj drugi vozi i po zraku, avijatičar je. Števek je majstor za struju niskoga napona i z ženum Tonkicum Ličankum ima Mihaela i Aniticu. Mihael je ožejnen z lepum Jasnicum z Križevcof skum rad dohaja v cirkvu de pevaju skup z ostalemi mlademi. Mijek je puno let delal v atomske centrale Krško i odonud se oženil. Sad mi se čini da se nastanil v drevene iže ku je Rokek naredil dok su zidali ovu ižu vuke je Ivek s familijum. Rokekov brat Mijek se oženil z Rašč od Rajkovičof. Z ženum Marum je imal sine Števeka i Zlatka. I on se rada mučil ali kak i drugde od zemle se ni dalo niš napraviti nek samo preživeti. Nu, nijovi su dečki bili uporni i z zanate ke su zvučili su napravili biznis, tak da se more reči da su mali poduzetniki. Složni su i to je vleče naprvo. Puno let kešneje je iza Mijekove iže naređena iža vuke je živel Jakop Kramaričof z drugum ženum ke se reklo gospođa Merle ili Spišta. Pravo je je ime bilo Viktorija. Kad su oni pomrli ižu je kupil Rojček ali on na žalost vute iže ni dugo živel nek se vrnul natrak v Dolenec. Tu je ostala negva žena Raščanka Janič s čerjum. Z vremenom su se vmorile v katoličke vere i otišle su v Jehovine svedoke. Sad jem je cirkva v Lackovičeve vulice.