Osma je bila JAGA. Ona se oženila z Vincekom Lackovič Jedanovem. Grunt na kem su živeli je bil na ceste Zagreb-Gorica, na Mudičke. Imali su drevenu ižu na desno, a štalu na levo. Vuz cestu je bil red visoke paunof ili kak se to reče jablanof. Na vrčaku, pumpu za vodu. Knem, ili k sinu Vincekovomu teroga je imal od prve žene, Juriču, kaj su mu govorili Turček, smu išli pit vodu kad smu išli ze škole z Gorice ili kad smu na Gospodskovom nekaj po vručku delali. Jage Iščeve se onak malo, mutno sečam, Vinceka niš. Ojnemi i nijove dece sem več raneje pisal.
Deveta po redu je bila BARIČ v zamuže pri Imbriču Glagoličevomu, ki je za 1. sv. rata vubit.

Deseto dete z prve iže je bila JANIČ. Ona se vdala k pl. Krilčičom Štefanovemi za Šimeka, ozde, na grunt od teroga su sad narejeni dva. Tu sad živeju pl. Mijek Krilčič Štefanov, sin Miškof i pl. Bare, Imbračova čer. Trejti Šimekof sin Pavel, ili Pavlina, je živel na drugom gruntu teroga je domrl čovek Jožef, ki je tkal na stanu i komu su govorili Tkalec. Šimek je bil ožejnen z Janičom oke je moja teta Magdica ka je bila nejina sneja, rekla samo sve lepo. Nazajdne je starica zgubila vid ali je mrla med svemi najbližemi, dvemi snejami od Glagoliča i trejtum z Dolenca Lubum pl. Trumbetaš.

V vreme okom pišem, standardna iža jenoga gospodarstva, a tak i pri Cundekoviče Iščeve, je bila drevena. Nalevo ili desno prva ili zajdna iža a na sredine kujna. Zavod je bil f štale, na koso postavlene lopate ili v žlebi. A kak je to zgledalo pri ovak velikemi familijami teško je i zamisliti. Tek kaj su se zredali ovi s prve iže več su pred vrati čekali oni ze zajdne iže. A i ne je bilo fajn. Evo kuliko:

I. Blaž je z ženum Dorum, sestrum Jože Glagolić Klobasa imal četiri dečke i čer. Prvi mejdnemi je bil ROK, komu su govorili Rokan. On se oženil z lepum modrookum Rožicum, od Jurkina z Odre. Ja ne pametim v drevene ižice v vdenešne vulice Svete Barbare, ozde de je nakon rasterečejna od dedovine narejena velika iža. Rokan i Rožica su su živeli mirno i sretno. To mi ni trebal nigdo reči kad sem to videl saki dan. Nijova je ižica bila prek puta moje. Oni su med prvemi v selu imali nekakov radio i saku Nedelu prije poldan su ga glasno navijnevali kad su bile pesme po željami slušateljof. Znali su i zatancati. Imali su jedinca Števeka koga su oženili z Dolenca, z Ančicum, čerjum Jude i Mijeka pl. Trumbetaš. I oni su imali jedinca, isto Števeka, ki se oženil z visoko školanum ženum Dubravkom skum ima troje dece. Za preživlene pedeset let v neposredne blizine, ja s te iže nis čul niti kletve, niti svađe, niti vike. Navek mir koga je zasebe i svoje potomstvo pri Svevišnemu Bogu zmolila dobra pobožna baka, prabaka Rožica. Drugi Blažof sin je bil VINCA. Vinca je bil izučeni opajnčar, a ožejnen z Barum od Jakuniča z Dojne Lomice. Ižicu su sklepali na Putine (Napredek) de jem se rodila jedinica Kata. Z letami su ižice nadodelali i duplo od cigla. Kata se prvi put oženila z Rašč, z Jožekom Markulinom skem je imala jedinicu čer, a drugi put z Jurekom Črjnakom z Gorice. Žnem, i z obitelu jedinca Mladena u živeju na D. Lomice v palače, ku su naredili vuz tvornicu lamperije, na mirazu Katine mame Bare. Trejti po redu sin Blažof je bil JOSIP ili kak mu se reklo Josina Iščev. Nega je dopal komačec zemle na putine (Napredek) de je naredil ižicu, ka je i denes kakvu pametim pedeset let. Vujne ima fotografsku radnju Kaligula.

Josina je bil ožejnen z Rašč, z Katum Bakranovum. Nezina sestra Mara je bila vzamuže za cestara Pavla Benceka, Lojzekovoga oca. Najmlajša Katina sestra Ankica je zela suseda Miku Koprjnaka, i na dvorišču de jem je iža vuke živeju je križno drevo. Mika je brat prižejnencu Jožeku, pri Marice Kovačeve i Marice Trumbetaš, žene pokojnoga Iveka Črlenoga. Kata i Josina nisu imali potomstva pak su si za prodajum negvoga grunteka pomogli nekteri od ove o kemi pišem. Teri su to, oni znaju. Četrtoga Blažovoga sina ja nis poznal jerbo je mladi mrl. Ime mu je bilo IVICA. Jedina sestra ku su Blažovi sini imali je bila BARIČ-Barlinka. Štikala je firunge i kaprice. Vdana za Franca Trumbetaša. Živeli su v drevene iže, ozde v Svete Barbare de je najmlajši sin Števič komu se govori Boncek. Po povratku z Kanade naredil je zgodnu zidanu ižicu. Još su imali Lubu ka je otišla v zamuš nekam f Sloveniju i Janiča ka je zela Drageca Šešlaginoga. Franca ja nis poznal, a Bariča jes, i to jako dobro. Ne smu mi govorili kuma, jerbo je na krstu držala moju sestru Zlaticu, a moja pak mama je firmana kuma nezinomu Janiču. Barič je nakon kratkoga izbivajna od tud i života v šupe z g. Majerom život dokončala v kutku vukom je preživela veliki del života.