Ze zajdne Iščeve iže je bil i II. sin JURIČ komu su govorili i Jurlič. Bil je malo rengav. Jurič je z ženum Janičom od Glagoličof, mega japestaroga sestrum, imal dvoje dece. Čer Rezu udatu za Mijicu pl. Trumbetaša komu su govorili Pilekof i sina Tomeka. Mene je poznat više Tomekov život k komu sem stotinu put zalazil jer mu je iža točno suprot moje. I f kumpanije smu žnem bili jedno vreme. Ili je on koristil našega kojna ili mi negvoga kad se oralo i vlačilo. Ostali su se posli mogli narediti z jednem kojnom. Tomekova žena je bila Marek, čer Pave Lackoviča. Iza čeri Ankice ka je vmrla kad je imala šest let imali su sina Želka. Pet je let bil mlajši odmene. Negda smu mi deca starejem, a ki nam nisu bili nikakva familija govorili tetec ili teca ovo kak denes govoriju striček ili teta. Tak smu mi Mareku i Rožice govorili teca. Kak je mejdnemi fort bilo napeto stajne sečam se zgode kad je tetec Tomek za Rokana rekel da je rengavec, a ni rezmišlal da je i to i on. Zabil sem prije reči da je i Rokan bil rengav ali je negva žena Rožica rekla na proščejnu pri Svetomu Roku v Jakuševce da je je to baš lepo i da je niš ne smeta kaj je malo po noga gazi dok tanca. To je prava lubav. Naš kraj ni negda imal baš preveč voča. Tak su ludi z vrhovja ili čak od Sanobora dopeluvali črešne, breske ili ruške, kak je tero dozrelevalo i mejnali za žitek čega pak oni nisu imali. Teca Marek je bila stručnjak za mejnajne. Ona je imala nekakvu čarobnu grohaču vuke je na dnu donesla kukuruzu ili ječmen. Nametati v grohaču črešne ili bresek se obvezno ponudila i ona nametala. Mi smu navek slabeje prešli. Nas su naši roditeli poslali same i imali smu osečaj da nas ovi varaju. Tomek je imal drevenu ižicu tik do Rokanove. Kad su omočali išli su delat zidanu ovu ka je i sad a drevenu je kupila Barek Dušekova v Dolence de je još i sad. Vujne ni više nikoga živoga jerbo je Barekov sin Pepek završil v umobolnice Jankomir.

III. sin ze zajdne iže je bil MIŠKO. Mama se seča da mu je žena bila Rezica od Korilofčana ke je brat bil nekakov veči državni činovnik. Mišk o je žnum imal četvero dece:
Prvi je bil Imbrič komu se je govorilo Imbroška Iščev. Ja pametim nisku zidanu ižicu z dva oblučeke ki su gledeli prama putu, na ovem mestu de je i sad iža, tik vuz Iščevu vuličkicu. Ni daleko išel iskat ženu. Par korakof po vuličkice, mam iza iže Iščeve zadruge, ižicu je naredil Jankič, rodom z prve iže. Vujne je rođena negva zebranica Dora, najstareja od četiri čer Jankiča Iščevoga i Magdice od Trumbetašof z Dolenca. Imbroška i Dora su imali jedinicu Štefu k ke se priženil Raščan Jurek Solič.

On je bil zidar i delal je na državnom poslu. Bil je vreden čovek i z vremenom je naredil drugu, puno komotneju ižu ka je još i sad. Nem se rodila jedinica Barek k ke se priženil Ivek, Jožiča Lackovič Beničkinoga sin. I Ivek z Barekom ima samo jedinicu Ninu. Ako se bu držala tradicije onda bu i ona ostala na jedincu teroga je po ženidbe zrodila. Osim Imbroške, Miško i Rezica su imali i tri dekle. Lubica se vdala za Mikeka Lacković Matijaškinovoga komu su govorili Solek. I oni su imali jedinicu Bareka ku je zel Števič Korilofčan Lalek, pokojnoga Štefinca komu se reklo Papek sin. Druga čer je bila Roža, vzamuže v Dolencu pri Jankiču Novoselu kemi se reklo Štefi. Z Jankičom je imala sina Iviča komu su govorili Rojček i čer Janisu vzamuže pri Juriste Novoselu. Trejta Miškova i Rezičina čer Marič je bila vzamuže pri Godeniču na Odre.

Stem kaj sem do sad napisal, sigurno s puno falinge, opisana je Iščeva zadruga. Vidi se da kak je vreme išlo prema denešnem, dece je bilo se mejne i mejne, jedno po jedno ili dvoje, retko više. Po mojemu viđejnu Mlaka se najviše množila zmed 1880 do 1920.g. Nu sejedno malo po malo starosedilačko prezimene Čačkovič na Velike Mlake više ne stanuje, a na tem putu su i prezimena Kramarič, Brozovič, Crnič, Cundekovič, Črjnak, Glagolič, Krilčič, Lackovič, Mudič, Novosel, Trumbetaš. Noveja prezimena kak su Ilenič, Korilofčan, Kunič, Makovič, Munđer, Muženič, Pučko, Stepanič još kak tak preživlevaju a neka primerice Fajnek, Lisičak, Rajkovič, Rendulić, Smolčič, se nisu zadržala niti sto let.

Vuz Iščeve zadruge štalu bil je Peter Lackovič komu se reklo Petriček. Nega pametim samo da se fest tresel to denes veliju Parkinsonova bolest a za onda se ojne ni baš puno ni znalo niti je bilo nekakve lekof. Ožejnen je bil mam od susedof isto Lackovičof kem se reklo Banijaši. Iža jem je bila fajn velika i visoka, drevena, i kuliko mi se čini z visokem pragom na ulazu. Na krovu je bil črep. Posle je nijov sin Števič ki se oženil z čerjum Dorice Lackovič Matijaškinove naredil pristojnu zidanu ižu ku je zet Francek Pisciuta još popravil i polepšal. S toga grunta su otišle vzamuš tri dekle: Draga za Števiča Đumliju komu veliju Lukšin v Korilovec, Katič za Matiča Matoka Korilofčanovoga i Vera za mega bratiča Jožiča, sina Lovreka Makovičevoga. Števič i Magdica kak se reklo Petričkova su imali jedinicu Bareka ka se 1954.g. v osamnajstom letu života v Save ftopila, kad i Janič Jožefova kak se reklo čeri Pavla Krilčič Štefanovoga. Prilično mi je v mutnom sečajnu taj tužni dan kad je dvoja z kojnskum zapregum mrtvečka kola župnik sprevajal. Ja mislim da je to bil vlč.Mihovil brat župnika vlč.Ladislava. On je onda nekak došel z devet let Lepoglafsko-Starogradiške robije naku su ga oslobodioci 1946. nedužnoga osudili.