Najtužneji sprevod v mojem detinstvu ki je restužil celo selo, a teroga sem zajdni put spomenul, ni bil 1954. nek f 7. mesecu 1952., a sprevoditelj je bil vlč. Josip Petrak, župnik Odranski. On je za četiri dane posle toga sprevoda mrl. Privremenu upravu nad župum Odra mesto nega, preuzel je do dolaska novoga župnika vlč. Vladimir Mikoč, župnik Svetoklarski. 21.11. isto leto, premešćen je z Čutarjeva za župnika na Odru vlč. Ladislav Loina, lepi mladi svečenik, prvorazredni duhovnik i propovednik, kakve je malo! Do kraja toga leta, starci su dece branili iti kupat se na "bager" (jezera nastala kopajnem šudra, pod erodromom), a pogotovo na Savu. Ona ni pretila z gliblinum, neg z viri, od ke je jeden i ove dve prelepe mlade duše povlekel zasobum. Posle ovoga Bareka tera se ftopila, Števič i Magdica Petričkovi su imali čer, opet Bareka, jedinicu. Vujnu se zagledel zajdni put spomenuti Francek, rodom s Korilofca. Z Barekom ima tri lepe čeri, od ke je prva, Doroteja, već otišla v zamuž, v Rašče. Stara mama Barič, Petričkovica, je život dokončala pri Korilofčane, pri čeri Katiču. Stare dane je preživela okružena sum brigum i dobrotum kakvu bi si saki stari čovek poželel. Stari Petriček, Peter, je imal brata Juriča ki je bil ožejnen z čerjum Jankiča Lackovića, sestrum Joce Lacković. Žnum, i z dečecom je otišel f Ameriku, s tere se nigdar nisu vrnuli. Po nekakvom naslučevajnu, taj je dečec kešneje v Amerike postal svečenik(?).

V susednom dvorišču, desno gledeć od sadašnega ulaza na dvorišče sečam se drevenoga črdaka, živel je Jura Lacković Banijaš i brat Šimek, brati Bariča Petričkovice. Juru pametim da je na glave navek nosil mali škrlačec, sličen lugarskom, a na vuskom obrasku je imal male brčiče, kaj su onda ludi rekli strnokos. Negva žena Jela i Šimekova žena su bile z Nove Čič, od Mate Tavurca. To sem prezime zapametil tak, jerbo sem negda kad ni bilo stričeka Đineka v šakrestije, ja zapiševal za molitve ke je župnik čital na kraju meše. Jela i Jura su imali sina Jureka ki je bil ožejnen z Štefum Korenikovum z Rašč. Imali su i čer Vericu vdanu na Malu Mlaku za Slaveka Planka. Veričin i Slavekof sin Želko ni zabil mamine korene i redovito obilazi Veliku Mlaku. Rada dojde k memu bratiču Jožiču Makovićevomu i Vere, ka je sestrična negve mame i zove ju teta. Osim Želka imali su i čer Vericu vdanu k Pinturiću, v Rašče. Kad su Banijaši na velikom, širokom dvorišču, naredili zidanu prizemnicu, reskopali su črdak ki je verojatno kak i drugde, malo po malo otajal v dim. Jureku sinu, žena Štefa je zrodila čer Maricu, jedinicu. Kuliko god pametim, sve su te žene rada f cirkvu išle, muži nigdar. Marica je išla i završila za patekaricu. Vdala se na Goricu, za šafera Jožeka Ledara, kaj mu veliju Kvaka. Jožek je bil dober nogometaš. Z loptum je doloptal do nogometajna v nogometnom klubu Zagreb . Jožek i Marica imaju dvoje dece: čer Anamariju i sina Krešu. Anamarijin muž je golman v Dinamu. Zove se Tomislav Butina. Štefa je Po Jurekove smrti nekuliko vremena živela sama na Banijaševom gruntu, a onda je iventar i zemlu zet Jožek prodal, a Štefa je otišla knemi na Goricu. Tak je još jeden, veliki imutek potrdil prolaznost vlasništva na ovem svetu. Žnega je morti zanavek v gruntovnice zbrisano staro, višestoletno Velikomlačko prezime Lacković. Mene to nuka na rezmišlajne, da jedino zakaj se na ovem svetu splati skrbeti, je živeti po Evanđelju i ne odstupiti ojdnega. Pretirana skrb za ovozemno bogactvo je jadna i prolazna, a jedino kaj traje, je život večni.

Polek Jure Banijaševoga je bil složec zemle, par metrof širok, na kem je negda kukuruzicu znala okapati Lubica Lackovič, žena Mikeka Matijaškinovoga komu su govorili Solek. To je bil složec Lackovićev. Z vremenom je to ojdne kupil Janko Potorič, kovač i potkivač i tak si je preširil plac pred kovačnicum, tak da je imal malko više mesta za potkavajne kojn i okavajne kol, ke su ludi knemu dopeluvali. Ja točno neznam jeli je Janko pri kovaču Rokiču Renduliču bil kalfa ili je prijnem šegrtuval. Sigurno je jedno: Zagledel se je v jednu od osem Rokičove čeri ke mu je zrodila žena Milka, od Tivara z Jakuševca. Kak bilo da bilo, Janko je zaradi lepe Rokičove čeri ke je bilo ime Terezija, a zvali smu ju Rezika, ostavil Goricu i za navek se nastanil na Mlake. Z Rezikum ku sem ja zval kak i nezin nuk, mamastara, osnoval je Janko sirotinsko ali slatko obitelsko gnezdo.

Več sem raneje pisal da su Milka od Tivara z Jakuševca i kovač Rokič Rendulič Ličanin bili veseli ludi, a desetero dece lepše jedno od drugoga. Tu de se nastanil Janko z Rezikum sad žive nijova čer, jedinica Štefica z mužom Juričom, mojem vujcom. Po tem sem i ja malo povezan stum familijum. O kovačnice denes nima ni traga ni glasa. Preširena je i prepravlena v lepu prizemnicu ka zgleda koj palača. Mala štalica ka je bila odzad je reskopana, a na nezinom preširenom fondušu je Jankov i Rezikin nuk, jedininec Jurek naredil lepu prizemnu ižu, vilu. Vujne žive z svojum obitelu. Ženum Marijum rodom Barišić z Gradičof i z dve lepe čeri, Melanijum i Đurđicum. Kuliko je god bil teški posel seljaka, niš ni bil leži posel kovača. Kovači su bili majstori, umetniki, kak i kolari. Delali su se: od potkavajna kojnof do okavajna kol ke je naredil kolar, od izradbe šarafov do povezuvajna zidov na iža ili štala ke su se respucavale zbog za onda slaboga zidarskoga materijala, izradbe ukrasne gatre na obluki, vrate, ograje, klepajne plugof, kose. I barberili su kojne i zube jem z lapisom krpali kak bi je pretržci skupleje prodali, i još puno druge poslof. Koj mali sem rada zalazil v kovačnicu, a pogotovo kad je majstor Janko kojne potkaval. Kad je vruču užarenu potkovu metal i pripasuval na kopito ko je čovek držal v zraku ili je stalo na falfuku, žnega se kadel dim ki je imal nekakvo posebno dišujne. Osim velikomlačanof k Janku su potkavat dohajali i ludi z on sel ka nisu imala kovača. Janko je imal kovačnicu z alatom za se kovačko-potkivačke posle.

Na sredine veliki nakovajn teroga se zvalo ampus, a vuz stenu ravno kad se došlo v radionicu je bilo ognišče f tero se metal vuglen. Levo od ognišća je bil veliki meh teroga se napumpalo zrakom, ki je onda po malo puhal po vuglenu na ognišću i žaril ga.

Žar se prenašal na železo skoga se onda trebalo nekaj fazonerati. Posle više udarcof po železu, nastavil je majstor polagano s čekičom tuči po ampusu. Ampus je zato bil na sredine jer se okojnega vrtel onaj ki je z čekičom, hamerom, nabijal po železu na grubo, dok je majstor spretno z rukami podmetal železo na onkraj pokom je trebalo tuči. Na kraju je majstor Janko to nabijanje završil z finemi i osečajnemi udarci, na drobno. To je znalo biti više koj glazbeni del posla, skoro sinfonija. Pametim šegrte ki su prijnem zanat za kovača zvučili: Jurič Trumbetaš, Jože Serakovoga sin z Dolenca, Števič Munđer teromu se govorilo Puca, a Janko mu je bil tetec, Števič Trumbetaš sin Barlekof komu su govorili Papek z Dolenca, Mijek Korilofčan Črni čija mama je sestrična memu tate, Števič Vrbanič z Mičevca koga su zvali Števan. Čini mi se da je zajdni bil moj bratič Mikič Glagolič, sin mega vujca Paviča. V sake se kovačnice puno i teško delalo, puno vina popilo, pevalo ali na žalost i klelo. Potkovati kojna ni bil, ali okovati kola je bil veliki posel. Izajnega je obvezno bil aldomaš. Onda se kartalo, popilo, respripovedalo a bome i zapevalo. Taj se obred odvijal obično v bertije pri "Mike", f črdaku, de je sad folklor. Od tud je negda taj vredni majstor komu su šegrti govorili "Gazda" znal domom došemeritati sam, ili bi mu segdada pomogla mamastara Rezika ka ga je koj sena pratila v životu. Janko se rad šalil, ali su mu se znale omeknuti i reči po kemi vuz su muku na zemle na nebu nebi dobro prešel da mu ni ispovednik obečal, da po svoje dobrote i žrtve za druge lude nebu tak. Ja vuto verujem, jer je ispovednik bil ni mejne ni više nek dr. Srećko Badurina, frajnevec trečoredec glagoljaš, ki je vuto vreme bil gvardijan samostana na Odre, a potlem biškup Šibenski.