Mi smu onomu podoficeru Bošku Spasiću, teroga sem zajdni put spomenul, a ki je stanuval v drevene iže Jožića Ilenić Bajsmenovoga Koseka govorili, Gospon. Boško je znal popraviti radio ako se pokvarila ili oslabela tera elektronka vujnem, i peglu ak je vujne kaj pregorelo. Nam ni išlo v glavu, kak to da on, v jedne malo veće sobice vuke se kuva, pere i spije, more odhrajnevati pet komadi dece, a naši ludi imaju po jedno, a tu i tam dvoje. Retko više. Zastavnik Vasilić ki je stanuval na Bogomulčevom je imal sedem glaf dece. V našem selu su vuto vreme Beca Rajković, Čalin Jurekof, Papek Korilofčan, Imbrić Jurekof, Štević Zvonarof bili heroji, ali su tu i tam bili ismejavani od naše ludi. Posle drugoga sveckoga rata nastavlen je rat, drukčeji, pogubneji od onoga z metki, za naš, ali i za druge europejske narode. O tom je naš stari župnik msgr. Loina puno govoril, a za to je rekel- „bela kuga“. Kešneje sem i sam razmel kaj to znači.

V nizu od črdaka prama cirkve, na moje strane, z gruntom spomenutoga Jožiča mejil je Janko Ilenić, isto mu se reklo Bajsmenof. Taj mi je čovek ostal v glave kak je večinu dana bil naslojnen na putnena vrata. Zajnega su rekli da jako slabo vidi. Ni mi na pameti da se spola ili napole, poput Ifka Bajsmenovoga igda vozil na razgore male zaprežne kol. Jankove žene su rekli Ledarka, kaj vleče na Korilovec, tam su Ledari. Janko i žena mu, imali su jedinca sina Jureka. Nega se dost dobro sećam. Mučil se je poput se druge ludi kak bi z ženum Jelekom preživel i preranil čer Bareka. Jeleka sem već spomijnal kad sem pisal o Imbriču Cujnkovomu. I tam sem spomenul da je leta Jelek, svojum sestrum Janekom Telebekovum bila cirkvena počimalja. Bog je je dal lepi glas, i ni ga šparala nigde de je god trebalo zapevati. Jeli to bilo pri Majke Bože Bistričke, jeli f cirkve, jeli na svadbe na kemi je puno put naranila svojemi slasnemi obroki nogoga i nogoga. Bila je izvrsna kuvarica. V svemu je bila primetna, i žal mi je kaj takvoga dara, ali možda bole reči žara, nema nezina potomkinja. Ali dragi Bog zna saku las, saki glas, i strpliv je.

Jeno vreme, ja neznam kaj je to došlo, dekle su mlade išle v zamuš. Tak je zmed ne više, i Barek od više proscof zebrala lepoga Ivića Krilčić, Jožefovoga, sina Pavlovoga. Kratko vreme su živeli tu de je sat teta Jelek, a onda su skup z dvoje dece, Ljiljanum i Daliborom otišli živet na početek Bradašićeve vulice, de su naredili dvorac. I nuki tete Jeleka su već ožejneni. Nu, Ona z lepemi letmi žive sama na grunteku, pri Bajsmenu.

Čiji je grunt bil do Jelekovoga prije ja neznam, če baš sem najnega puno put zalazil. Najnem je za drugoga sveckoga rata ižicu naredil kovač Rokić Rendulić, a Švabi su mu ju pomogli prigotoveti, jerbo su nutre imali magazin z robum za svoju vojsku. Nu i za onda je funkcioneral Caritas, pa su i ludem ovak, civilom, davali robu ke su imali zviška.