Vuz grunt vesela familije Rokiča Rendulića Ličana, bil je grunt domorocof Lacković Pavla i Jage, ke se govorilo Babica. Ja, ni čoveka ni tu ženu oke su f selu za mega detinstva pripovedali samo lepo, nis poznal. Zajnu se more reći da je za života s lužila općemu dobru . I kad v denešne vreme zmišlevaju vulicam imena, evo jem prilike. Nek oni ki očeju dati spomen zaslužnem Velikomlačanom pitaju stareje Mlačane ki još moraju i znaju kaj povedati, o ove male i drobne, ali očito kuražne ženčice. Ona je v svoje vreme, bez nekakve velike škole i fakulteta porađala noge žene, i ne samo z Mlake. Bila je poznata i priznata po okolice, a ta okolica je išla tem do Posavine. Ludi su pojnu dohajali i otpeluvali ju na zaprežne kole, tam kam je trebalo. F sako doba, bilo da je dan ili noć, kiša ili sneg. To su bile žrtve bez naplate i od nikakve materijalne koristi. Moja mama veli da je "kuma" Babica taj posel delala z potpunem predajnem i lubavlu. Ni to bilo tak lefko, jerbo za onda ni bilo nikakve naročite predmetof za pripomoć, a bome niti za dezinfekciju. Tehnika porođevajna je bila nezina. Od nezine četiri čeri, nijena ni nastavila to delati. Ni doktorof, ni sestre ni bilo, a žene su koj mašine rodile. Kad se usporedi z denešnicum, ni smrtnost ni bila puno veća, kak žen, tak i dece. Nisu žene za onda imale priliku blagoslov krila nadgledati, od prvoga povraćajna, pa do kraja. Nisu bile ni, kak se denes reče, osvešćene, pa noge do poroda nisu znale kaj se žnemi dogaja. Ja si nemrem predočiti, kak se to reće prevenciju i negu te žen, niti kak se to veli čuvajne trudnoče. A f teru bolnicu bi i išle, i k teromu doktoru, kad toga ni, ni v Zagrebu bilo.

On, Pavec, po prezimenu pl.Trumbetaš, je bil z Dolenec, brat mu je bil Miško komu su govorili Čovek i Ivič, komu su govorili Čaruga. Sestre Marić i Barić su jem bile v zamuže na Gorice. Ojnemi semi sem već pisal. Pavao, ili kak je naš svet govoril Pavec, je zel jednu od četiri čeri kume Babice. Katića!
Katićeve sestre su još bile: najstareša Janić, vdana za Mateka Lackovića Šnajderovoga, na grunt ozde de je sad Šipraga Števek. Ona je imala čer Bareka, vdanu za Plešana Drageca Plepelića. Mlada je vmrla, pa se Matek oženil od Kovačof, z Janičom, sestrum Janka Crnića skum je imal sina Stjepana, komu se reklo Čevek. Druga Katićeva sestra, Barić, je bila v zamuže v Korilofcu. Nu nis baš naročito poznal. Sega jenput sem z Pavčekom išel z utakmice z Vukovine, na beciklinu, i onda smu se navrnuli, k te negve tete. To je moglo biti šezdesetprve ili druge.

Trejta sestra je bila Rožica, v zamuže za Ivića Vugrinovića na Male Gorice, kak se onda reklo za ovaj del Gorice ki je oko semišča. Denes je to se Velika Gorica. Negdajna Mala Gorica su vulica braće Radić i nezini Prilazi, Turopolska i vulica Emila Laszowskoga. Osim domorocof Vugrinovićof, tu su bila prezimena: Šipušić, Haraminčić i Briglević, od ke je bil napoznateji onaj komu su govorili Puso. Nega su braća komunisti 1945. podfercali za prilično imutka. Tu Vugrinovićevu familiju sam donekle poznal, jerbo je mama moje setre Zlatice, Luba, imala sestru Dragu pri Vugrinoviću, Mišku. A oni su imali čer Bareka, ka ni tak zdajna mrla. Barek je bila moje Zlatice sestrična, i fermana kuma moje setre Janice.