Ja sem bome fajn let i već onak, deranček, spal skup s tatum na postele, ka je laštre imala fajn visoko od poda. Naša postela je bila tamneje pofarbana od one nake je spala sestra Janica z mamum. Pod nami su bile blazine napujnene z perušijnem, a pod glavami vajnkuši napujeni z perjem. Za prve se reklo strojzuki, a vajnkušom perušnaki. Da bu to se našršureno i natom lepo spati, starala se mama. Ni bilo kak je sat! Denes dece narediju: posebno sobu za spati, posebno za igrajne, posebno za vučejne. Negde i ulaz odvojeno, čak i na najžu jem vrediju. Tak da je se rešiju i da je ne glediju, a kamoli da jem o nečemu pripovedaju. Stareji imaju svoj program na televizije, ki jem dojde koj resterečejne, ili kak se veli: za opuščajne, jerbo se jadniki čez dan jako zmučiju. V vreme fterom se ova pripovest dogaja, večinom su ludi imali snage i vole svoje dece večeri kratiti s pripovesti, tere su nas decu znale bome i prestrašiti. Najviše se takve pripovesti pripovedalo baš vuvo, jesensko vreme, kat su ludi kukuruze trgali z betva i domom dopeluvali gulit. Na gulejne kukuruze se znalo pribrati više sveta, a posebno tam de je pri iže bila kakva zamužna deklička.

Primene je zat posel bila sestra Zlatica, pa je tem toga knam dohajal moj fermani kum Jurek Gerarek, a žnem za pajdaš i Božek Krilčić, Bradašićef. Obadva su Bog jem dej mir i pokoj, pokojni. Od te pripovesti na kraju ni bilo niš, ali su v naše dečje glava ostale lepe zgodice ke se i dendenes sečamo i rada spomenemu. Nektere pripovesti su bile i zastraševajuće. Naš dečji mozak je progajnala pripovest, kak je nekteri trajbar oko pol noći gonil kojne odnekut ze sejma i vužne pešačil. Kad je došel do Goričkoga grobja "Svete Filumene" z jame je čul kak nečiji glas zove f pomoč: "Joj, joj, joj joj, dej mi pomori, dej mi pomori"! A trajbar, onak, prilično v stahu reče: "Bogek, pomori ove duše, da je nebu teška mučica"! I potlem bi bilo tiho. Glasa z jame više ni čuti, a trajbar nastavi dale prema domu. Se se to v glave motalo, i sen mi ni, i ni dohajal na oči. Onda, kaj drugo preostaje narediti? Okrenem se na drugu stranu, k zidu, i pitam Janicu: jesi zaspala?

Ako ojdne ni bilo glasa, znači zaspala je. Ja se opet onda malo mučim stemi pripovesti, ili premišlam o onemi familijami ke su pak nate strane. A toga premišlajna ni puno mejne za napisati v Barke nek je bilo i ovoga dosat.

Gledeć na ležečke levo, zajdni v Dolencu je bil naš rođak Števec Trumbetaš, nuk Lacka Lackovića Šnajderovoga i sin Katin. Ste loze je po moje mamestare Jagice, i moja mama. Samo ona je bila od Lackovoga brata Đure. Dragec Trumbetaš slikar, komu čestitam imendan 4. studenoga, i ja, po familijarnosti smu na iste razine. On je prenuk Lackof a ja Đurin. I tak, ležeć okrenut k zidu, pred oči mi je dohajala zajdna iža nate, zapadne strane. To je bila iža obiteli Števića Krilčića, teromu se reklo Zvonarof. Iža se dobro drži će baš od mega detinstva do denes ni teknuta. Štević ni bil zvonar, ali je to bil negov ledični stric Mirko, okom bum pisal kešneje. Štević je na denešnu "Zagrebačku" cestu, a negda smu rekli samo "na cestu", došel odovud, z vulice ka se sat zove Svete Barbare. Od domače ludi tu je još jedino Ivek Krilčić, sin Jožeka Jankecovoga kaj mu veliju Caga, i Ivek Krilčić, sin Boškof. Tak mu i veliju: Ivek Boškof! Zvonari i pomočniki ondašnemi župniki prede denešne zvonarof Lacković-Kolaričkine bili su od Lovreka Malovec Cvetkovića komu su govorili Kuhilek, a još prede z familije Krilčić-Bradašić.

Pod zvonarof "krug" potpada i ova drevena iža na vugliču Bradašićeve i Svete Barbare vuke su sad doselenci z Bosne. Vujne je koj zajdni potomek na tem tlu, mrla Janić Krilčić Zvonarova, ka je negda bila naša počimala v cirve. Na tem placu od Janića do Iveka Boškovoga živeli su Krilčići-zvonari. Ovaj del selske zemle, de je sat iža nuka Paveka Krilčića Bradašićevoga, bila je praznina. Za svetke tu su znali biti licitari i tamburaši. Števića su splatili, i z ižice ka je bila otprilike ozde de je Ivek Boškof otišel je žvet v ižicu "na ceste". A zakaj? Kat su se negve tri sestre, Dada, Capica i Barić povdale, a nemu rodilo tucet dece, otišel je na širji grunt, makar daleko od sela. Tak je za onda to zgledalo. Nekteri su mu se i podsmejevali. Dve su negve sestre otišle v Rašče: Dada k Lopariću (Šafraniću), a Capica k Caru. Barić se vdala na Mlaku k Glagoliću. Zel ju je Matić komu se govorilo Rus.

Ja sem Števića zapametil onak, ne baš puno, ali se sečam da je bil malo nižeši i nosil je škrlak, kak su onda muži nosili. Zapemetil sem ga (mislim, morda 1951/2.) kak se z muži pred cirkvum spominal. Vuto je vreme na Odru tek došel, lepi, mladi i obrazovani, župnik Ladislav Loina. Kad je župnik obznanil da se v šumu "Dragu" ober Peršinovca išlo po drevo za letve plota Odrskoga grobja, Štević se med prvemi javil. Če je i doma bila brojna familija rado se, poput stričeka Đineka odazival župniku za saki posel. F to vreme se od ondašne po broju malo velikomlačanof, mam znalo prikupiti puno ludi, ili pak foringe za kakof prevoz. Denes je Mlaka mesto s puno vulice i morda deset put više ludi po broju, ali kat župnik prečita pet vulice za čistiti cirkvu, javi se samo nekuliko. Negda nijena. A od te ke dohajaju mejne više su jedne te iste. Mene je to tužno. Nis pozvan o tem suditi, ali se koj čovek ki bu jenoga dana stal pred Suca večnosti pitam(?) i mislim si: da su naši stari mame i jape, pa i naši roditeli bili tak nemarni spram cirkve, jeli bi mi vučem imali denes mešu imati i ščem se špinčiti? Sa ta lepota mi se čini koj nezasluženi Boži dar.