Kak i po okolnemi seli tak se i na Mlake već v letu skrbi za zimu. Ali i sako drugo doba leta ima svoje posle, mejne i više važne. V jeseni se, o Miholju išlo brat grojzde, a pretakalo se čez božično vreme i v korizme više put. Prvi put se pretakalo mam kak je otkipel mošt i rezbistril i počel onak polefko v glave šarafiti. Nekteri ludi nisu ni trebali pretakati, jerbo su, pogotovo oni teri su mejne materijala imali, to zarana naredili, onak, čez svoju grlicu na zajdnicu. Jeno leto se to i mene dogodilo. Ovo mi dohaja napamet, jerbo sem nekak vuvo jesensko vreme prede pedeset let, pogledom čez obluk na komare Imbreka Korenikovoga zagledal lajte za vino. Imbrek je bil Rašćan i prijnem su mlekari ostavlali becikline. Nam ki smu posle išli na Goricu f školu beciklin je bilo treba. Zato smu ga vraćali natrak, domom. Imbrekova iža je bila drevena, mam prek puta železničke postaje Odra. Gledeć z ceste na dvorišće, na levo, poprečke na cestu. Štala mu je bila zidana, a dojne dreveni štagel z paritkom. Ja sem poznal i pozdravlal nega i negvu ženu, Lomičanku Janiča. Obadva su bili črlenokožne obrazof. Imbrek mi je ostal v glave jerbo je koj i moj pokojni otec navek nosil fertun, a to su imali samo muži ki su se zapraf bavili marvogojstvom. Korenikovi su imali sine Božeka i Mirka, i čer Baricu. Nisem baš siguren jeli je Božek sin od te žene, Lomičanke, ili od Imbrekove prve žene ku su po pripovedajnu ludi Nemci nekam otpelali. Kad se delala ova cesta poke se sad vozimu v Zagreb, nem je zeta zemla i gospodarstvo porušano. Jeli je ne država splatila ili ni, i kuliko su dobili penez, to ja neznam. Oni su se otut morali otselili, i otišli su v Rašće, ozde, skoro na poćetku Odre. Čini mi se da jem je prek puta Vitek Rajković, ki je leta z bratom Tončekom i Čvarčekom Ocvirekom bil odrski grobar.

K Viteku se priženil od me tece Dore Štefanove nuk Branko Matijaškinof Lacković komu su govorili Gigin. Brankova mama Roža je bila ma sestrična, a vdala se za Grgu Lackovića Matijaškinovoga. I puno let posle kak su se ti ludi otut otselili, cvela je blizu štreke lepa, velika i krošnasta črešna, ske su si nogi prolazniki, putniki i namerniki znali ftrči teru črešnicu i popraviti su duvu po zubi. Nekteri su dohajali i z torbami brat. Mi smu tut išli tak, kaj smu na becikline rivali bisage s kantami z mlekom na cug petak. Osim te Imbrekove iže na ceste je za onda bila jedna jedina ižica, ona Števića zvonarovoga, Krilčića. Kat smu tut prehajali bilo nam je pri srcu onak, milo, jerbo su ti ludi bili naši Velikomlačani. Zajdni put sem napisal otkudek su oni tu došli, samo nis rekel da je to bilo nekak za stare Jugoslavije. Ižu kakvu pametim za onda, takva je i den denes. Kad si malo bole rezmislim o onem vremenu kat je selo bilo puno drevene bajte, ova Števićova iža je bila koj dvorec. Bila je zidana, s črepom pokrita, a f selu je još bilo tu i tam one z šopom pokrite. Kad glediš kaj se denes dela za decu, pa negde se još ni ne zrodiju, a več su jem iže naređene. Pripovedal mi je ne tak dugo jen mlajši čovek z Brezovice, da je svemu nukeku več ki ima dve lete več ižu pripravil. Katnicu, kazal mi slike. I labudi su na dvorišću, a lavi na stupe od putnene vrat. Roda je sred dvorišća, onak na jene noge. Nu, z ove male, Števičove, je potekla reka života i životof. Ja to držim posebnem Božem darom, poštuvajna i glibokoga naklona vrednem. Žena Števičova Jana je bila Raščica, od Bakranof. Pred očima su mi još nijova lica, če je baš odonda prešlo već puno put po deset let. Od stareje sem čul, kak je Štević znal za farno odočašće k Majke Bože Bistričke puno put, zapravo dok ga ni snaga izdala, zapreči kojne, i na kola ze senskemi lotrami posel žene i muže, kuliko je je gore stalo. A da ni del nijenoga strajnskoga, bil bi i svoje imal dost za voziti. Nektere od nijove dece ja i ne poznam, nektere sem poznal. Po pripovedajnu sem zapametil i nabrojiti je po imene se znam: Dečki: Vinca, Štević, Lukić, Mikić, Jožek, Ivek i Marijan. Dekle su jem bile: Janić, Roža, Ifka, Sabina i Tonka. Vinca se priženil na Obrezinu pri Čutarjevu, Štević i Lukić imaju iže na Gorice. Mikić se priženil k Kosom (možda Križanićom?) v Rašće, a Marijan v Korilovec. Ivek se rodil gluhonem. On je ledičen. Jožek se oženil z Rašč, od Arbanasof. Vinca, Štević, Lukić, Mikić i Marijan su bili šaferi.

Si osim Mikića ki je bil šafer v Astre, su na Gorice vozili črleni križ. Posle smrti Jane i Števića na gruntu je ostal živeti Jožek z ženum Lubicum. Ona je kak sem prede napisal bila od Arbanasof z Rašč, Lajičof, mam ozde pri igrališću. Nekak v šezdesetemi letmi prošloga stoleća, Jožek se kak i puno druge Mlačanof fputil v Nemačku. Da si nekaj priskrbi, a onda malo potkožen z markami da se vrne natrak. Kuliko mu je to uspelo neznam, ali znam da mu se posrečilo to, da mu je žena Lubica zrodila dvoje lepe modrooke dece. Dečecu su dali ime Dragec, a deklice Marija. Nekak za rana Jožeka je srvala nekakva plučna bolest i z niti pedeset let je mrl. Deca su ostala bez oca, a Lubica dovica, bez muža. Jožeka pametim da je od se braće jedini rat dolazil k meše, i imal svoje mesto na korožu. Kad je župnik Loina držal propoved, sedel je na pragu od koroža. Na korož su vuto vreme dohajali samo stareji dečki i muži, i žnega se retko čulo pevajne. Morda Božićne su znali, ne bi odozgora bajserali. Ja v Jožekovom dolažejnu v cirkvu i kmeše čitam nasleđe, ali i uslišane molitve negve pobožne roditelof. Jožek Boga ni ostavil nigdar. Od svoje generacije, od velikoga broja selske mužof bil je redoviti mešar. I pokojni župnik Loina je zate lude i familiju navek imal lepe reči. A kak i nebi, kuliko sem je ono maloprede nabrojil. Potle Jožekove smrti, siromaka Iveka do denešnega danka strplivo, kaj denes veliju bedina, dobra i strpliva žena Lubica. Za onda kad smu još si išli kmeše na Odru, fajn je Raškoga sveta grnulo v cirkvu. Jeli ova traga Arbanasof s ke je Lubica bila med temi mešari, neznam. Ja znam Iviča Arbanasa kaj su mu govorili Štulenka i Čv, sina Miškovoga a Mikičovoga brata. Oni, koj ni Ivič Kos nigdar nisu v cirkvu išli. Mislim da neznaju kak se zakaj f cirkve veli. To znam jerbo su oni zmenom v osmoletku na Goricu išli. Sirotijna, ni imalo kaj za obleči, tak je za onda bilo. K Iviču sem i zalazil. On je Pepiću Vlahovcu vučitelu z Buzina bratić, i skup žnem i z Pepičovem ocom sem mu pomagal deku z cimentom na iže zalevati. I Ivič i Mikič su rano pomrli. Lubica, a zgleda da i nena brojna braća su lepi ludi. To sudim potom, kaj i nezin brat Dragec ki benzin trži na Mlačke benzinske je fest čovek, i dober koj kruf. Nažalost, sat kat je Lubica i stareja, i dovica, lovi ju beteg za betegom. A senok, još i na Iveka mora vusto briguvati. Kuliko je deca vutom pomoreju neznam, jerbo su i oni osnovali svoje obiteli. Dragec žive na istom gruntu, samo mu je vulafka fižu z Mlačke strane, od severa. Oženil se od Štefeka i Marice Banić, z Bradašićeve vulice. Oni su doselenci z Vrhovlja. Kuliko su Dragec i sestra Marija nasledili verskoga od bake Jane Bakranke i dede Števića, ni mi poznato.

4-red; Žirek, Lakek, Puca

3-red; Draga Martinova Glagolić, Lacko Tomin Cundeković, a dojnega Štević Lacković Giga

1-red; Boncek, Štević Pavin Lacković