I cesta Zagreb-Sisek je zericu bila bola od ove čez Mlaku. Malo mejne jame je imala jerbo su pojne cestari krpali jame z šudrom. Kupčeke šudra su kirijaši ostavlali vuz rup ceste a onda je cestar z lopatum del malko v jamu. Segde se šparalo. Sat ludi veliju da su ceste grde, a kaj bi rekli zane onda. Čini mi se da je sat svet ipak prokšen. Mene moji doma stalno špotaju zakaj tak govorim, ali ja si nemrem pomoći. Am je još onoga sveta ki se te bokčije seća. Lače su imale krpu na krpe, fertuni isto tak, gače z domačega platna na stan stkanoga grube tak da te rit žulila dok si sedel. Kak je tek bilo bilo mužom još raneje dok su nosili pantalone. Žene nisu gač ni nosile. To se se valda znalo skoriti. Zato nam dok smu bili deca oči bolo odilo cestara Jože. On je imal robu ka ga je sleduvala koj državnoga nameštenika.
Boja cestarskoga odela je bila onak više koj zelenična. I kapu je imal s trdem šiltom, koj oficer ili služnik, onaj ki je na dvokolice prevažal kufre ili bisage od cuga do trajvana na kolodvoru v Zagrebu. Cestar je bil osim odela zadužen i z alatom. A alat je bila-lopata. I beciklin je dobil. Beciklini su bili teretni. Odzad na trogaru su imali zakopčene kufre ze sake strane, vukemi su imali alat za zakrpati beciklin ili morti kaj za pojesti. Od naše ludi cestar je bil Ivek Krilčić, Lovreka Bradašićevoga sin. Čini mi se da mu se i reklo-Ivek cestar. On je ponikel kak sem napisal od Lovreka Krilčića Bradašićevoga i mame Jane rođene Glagolić. Ona je bila sestra Pavlu ki je otišel v Ameriku, Jože komu su govorili Klobas, Mije i Dore ke su govorili Dojica. Dojica je bila mama Vince, Josine i Rokana Išćevoga. Janina rodna iža je bila ozde de su sat strajnski, zmed Ivice Modića Bombeka i Janeka, čeri Števića Glagolićevoga komu su govorili Tičica.

Još mi sat dojde pred oči slika, kak za letne vručine deda Lovrek z majkum Janum sediju pred sukašnicum ka je bila z vulice gledeć na desno, mam vuz Jureka Novoselovoga. Jurek je taj grunt kupil od Domačice gradove čeri. Ižica je bila na levo z oblučeki naprvo. I oni su kak se veli Bogu i narodu dali lepi broj dece. Osim sponutoga Iveka još su imali Števića komu se reklo Telebek i Jurića komu govoriju od milja Šari, a ki je i sat na tem gruntu z ženum gospođum Pepinum i sinom Goranom z negvum familijum. I tri čeri su imali: Lubicu tera je zela Jurića Muženičovoga, Jelku ka je otišla na Odru za Pavla Godenića i Katića ka se vdala v Relić. Nu je opće ne poznam. Ove druge se poznam puno let i kat se setim nijove slik prije puno let si su lepi, fest ludi. Mene se čini da je deda Lovrek bil nameštenik na železnice. Mi smu vužne prehajali negda, ne navek, ak nas je Lojz zvorarof pustil. On je jeno vreme naredil rampu mam na ulazu v Bradašićevu vulicu i nikoga ni tut pušćal. Valda kat mu se smililo ili ga je do pritisnul, onda je rampu reskopal. Tut nam je bilo poprečke. Krajši put za kante rivati na beciklinu, na odrsku stanicu.

Po letu je bilo kak tak, ali kat su na jesen počele kiše i zemla se rezmočila, gotovo. Okolo se išlo, vuz Luku Fajnkovoga. Luka je bil ozde vuve ižice na zavoju dvuke je Nikola, Ličan, vuz Marića Sušinoga kaj je veliju Mafa. Bradašićeva vulica je bila v mem detinstvu polski put, linija, poke se išlo na zemle. Na desno ni naprije bilo nikakve iže osim Lojzove na čošku. Kat se dojde od cirkve na vulicu, onda su na desno i na levo po cele dužine bili gospodari Krilčići. Na leve je već za mene bilo i druge prezimene. Kak sem rekel, prvi na desnom čošku je bil Lojza z bračum, a ober nega je po Šimeku Štefanovomu ki se oženil od Bradašića zemlu dobil Pavel Štefanof kaj mu se govorilo Pavela ili Pavlina. Lojza zvonarof je imal brata Jožu, i sestre Barića i Jelku. Jelku je v Ameriku povlekel i oženil sin Marka Kunića, brat od Tonče i Lojzeka Pažulevoga, idr. Lojza zvonarovoga sestre Bariću se reklo Petokoška i ona se ni nigdar vdavala. Ni Joža se ni nigdar ženil.

Sećam se kad je Joža mrl da su govorili kak je f trsju v Peršinovce pojel jagodicu grojzda teroga je piknula zmija. Ja neznam kuliko je to i jeli to tak i bilo. Lojzof otec Pavić je imal brata Števića. E taj Štević je imal sina, opet Števića, i čeri: Barića ka je zela Matića Glagolićevoga kaj su mu govorili Rus a moja mama mu je govorila stric, Dadu i Capicu, ke sem bil zajdni put spomenul da su se oženile v Rašče. Stric Lojzof Mirko je bil ledik, i do smrti zvonar cirkve Svete Barbare. Lojza je bil na zapisu z mojum tetum, najprije Rožum a onda Magdum, ali od toga ni bilo ništa. Onda se oženil z Gorice, z Jelum, od Šipušića. Nezina rodna iža je još i sat koj i za onda, a na zavoju prama Korilofcu je. Lojza i Jela su bili fest ludi i takvu su i decu imali. Sina Jurića komu su govorili Zvonarić i čeri Janića i Bareka.