Dok rezmišlam i opisuvlem o familije Krilčić ke su govorili "Zvonarovi" dojde mi pri srcu nekak tužno. Zakaj? Zato kaj su skoro si na tem grunteku, onak z luckemi očmi gledeć, nekak s teškemi i čudnemi načinemi pomrli. Za Jožu sem zajdni put napisal da je pojel jagodicu grojzdja v Peršinovcu de su oni imali trsje, a ku da je fpiknula zmija. Bilo je to čudno, a kaj ni, jerbo su i drugi Mlačani tam imali trsje, ali se prede ni potlem ni niš takvoga dogodilo. Nega su radi toga i v Zagreb v bolnicu pelali, ali ni tam ni bilo pomoći. Pametim koj da sat poslušam i gledim župnika Loinu kak z oltara govori o Jože koj o dobromu verniku i "stupu" Mlačke cirkve. Neznam jeli ga je to mort podsečalo nato kaj je Joža navek bil malko prislojnen vuz desni stup od koroža, a sat ga više ni, ili kaj još. Po zime je Joža znal imati oblečen črni trifrtalni kaput za teri su naši ludi govorili "reglec". Mene je po takvom kaputu v glave ostal još "Petlek" šnajderof, Majankof stric.

Fajn let kešneje kat je kapelan na Odre bil pokojni Tonček Grahovar, Janić Zvonarova nas je pozvala na večeru. Jelo se v "prve iže" ka je denes kak je bila i za onda. I sat je dok ovu Barka držite vreme je blagoslova, pak mi je napamet došlo kak smu mi jako puno pevali. Pri sake iže se otpevala bar jedna kitica o Tremi krali. Denešni blagoslivlači samo odmoliju i skoro pomučeč otijdeju z iže. Od pevajna niš. Za onda se po pevajnu moglo odrediti jeli je župnik daleko od tve iže ili bu skoro tu. Kaj ćemu? Fta leta bi bilo skoro svetogrđe imati i gledeti ovaj kič kakof je sat v cirkve i okojne.

V drevene cirkve borek osvetlen z kineskemi žarulicami, a rubi od cirkve i turna okruženi z neonskemi svetli. Koj kakof laboratorijum. Koj "cirko mediterano" ili kockarnice v L.A. ili ona cirkva v Amerike vuke se brzopotezno venčaju lucke spodobe. Ludi ki našu drevenu cirkvu kinđiju moraju znati da je ona ionak puna slik i rože i netreba zbadati nijakvoga kičeraja.

Ak se to dela još i z blagoslovom denešne konzervatorof vukaj baš nis siguren, onda je i izvornost Turopolske lepotice pri kraju, a valda to more očekuvati i put u povijest.

. Nu, da se vrnem na Zvonarove. Janić ka je ostala zajdni potomek je skup z Lubicum Lacković Kolaričkinum čuvala i samozatajno neguvala izvornost te naše drevene svetijne. Puno su put jedna i druga oprale pod, poslagale rože na oltaru i prebrisale prašinu. Nisu zdigale to na zvona. Na žalost, Janič je poput svoje braće mrla f teške muka, z otprtemi ranami ke je na noge nisu zacelevale. Nezine smrtne muke malo su ublažuvali Marica i Jožek Koprjnak od Kovačof.

I janičova sestra Barek je največi del života preživela v Austrije, dost gorko. Mužu Hansu, Austrijancu, su poradi betega noge odrezali. A tak je rado na hrvackom odzdravlal na naše nemu fpućene pozdrave kat smu po vulice vužnega išli. Barek je takaj bila lepa visoka dekla. I ona je nekak na naglo v Austrije mrla. Nis baš siguren jeli su imala tero dete ili nisu. Nejak mi se fčineva da je nejakov dečkerec žnemi dohajal k Zvonarovemi? Ja sem već prede napisal da se Lojza oženil z "Male Gorice" od Šipušićof. Z ženum Jeličom je priženil i komačec zemlice, ozde de su sat narejeni Servisi, kak se dohaja na Goricu. Jenput, zajdni put se vračal s te zemle z nasevajna žitka. I nejak na ovem križajnu z erodromom je v negva kola lupil kamijon. Na mestu ga je vubilo. To je za onda bila skromna križajnica, samo je ozde de je sat ovaj raskošen Zubakof dučan bila je nejakva mala zidana ižica. Skoro v zemle, koj negda mitnice kakve su bile. Toga se stareji ludi sečaju. Vute zidane ižice je jeno vreme živela Anaka z Dolenca z materum, Majankovum sestrum. Potlejne su živeli nejakvi z Makedonije. Ote ižice, a i o ovemi stanari više niš neznam. Nu, od se te opisane lepe ludi Zvonarove familije, najtužneje je skončal Jurić, Lojzof i Jelkin sin. Sečam ga se. Lepi visoki dečko, električar. Ja onda još nis znal kaj to je, električar. Jen dan sem došel k Glagoliću, k mamestare Jagice, a najenput se čulo: ajoj, ajoj. Kaj se dogodilo, vičeju žene? Zvonariča je struja vubila! Došel je i doktor z Gorice, mislim da je već bil dr. Sejnarić, ali tomu lepomu dvajstgodišnaku više ni bilo pomoći. Mrl je. Sečam se da je imal veliki sprevod, a kak je to običaj kat se dečka zakapa, za lesom je išla mladinka. Bila je to Katica Fabečić, negva nesuđena dekla, za onda, a i denes je još fajn žena. Potlem se vdala za Ivića Makovićevoga, Majeka.