Broj
 75
Godina
 8
Duhovi, 2006.
 
 
Naslovnica
Sadržaj
Uvodnik
Statistika
Obavijesti
 
Aktualnosti
Barka

Impressum

glavna

 
© K_com Dtg Ltd 2006.
 
Put u povijest
Uzašašće Gospodinovo - Spasovo
Duh Sveti
Jelinka Poezija
Milostinja
Susret hrvatske katoličke mladeži, Pula 2006
Blagoslovljena krv Kristova
školski kutić
  piše:
  Nikola Maković
Put u povijest
 
 
 
 
 
Malo po malo primaknuli smu se kraju Bradašičove vulice. Pri samom kraju, tik do gnoja Tončice Lacković Šnajderovoga, na špičujnku su ižicu, malo z kvadrof, malo z cigleka sklepati Pavla i Jakop Bradić, sluge pri Paveku Bradašićevomu. Nisu bili rodom Mlačani. Vlakom bez voznoga reda Jakop je posle drugoga sveckoga rata bil kolonizeran nekam v Vojvodinu, ali se, bi se reklo s prvem cugom vrnul natrak na Mlaku. Jakop za cestara, a Pavica je bila doma. Zgleda da su si tam premislili: bole je biti i tuđi sluga na mejnem, nek gospodar nad velikem. A to je bilo vreme kat su sluge i fičkurići došli na vlast i do kopajne. Zapisal si se v kompartiju i lagano si napreduval. Vuz Jakopovu cestarsku lopatu i kozicu kaj su imali v dupelcu do ižice, rasel je nijof jedinec Štefek. Koj maloga Jakop ga je črtil i govoril mu da nek nejde na cestu, da ga bu tam "črleni avuto pogazil". Jeli ftruc ili ni, Štefek je zvučil za avutomehaničara, i puno let, do mirovine je vute struke delal. I negov sin je već isto zbavil, tak da sat imaju doma radionicu i se lepo vrejeno. Ni traga ni glasa od one negdašne bokčije. I ižica je na morju, za laduvajne po letu. Se kak treba. Pavica je fajn let Jakopa nadživela. On si je sam, na jabuke vuz ižu život skratil. Če se ni moglo iti po Bradašićeve, Zvonarove, vulice, išlo se okolo vuz Fajnka. Mam na desno kat si prešel Bradašićevu, bili su, to sem zajdni put napisal, Krilčići Špektori.

Zakaj jem se govorilo Špektori ne znam. Ja sem si to sam restumačil da bi to moglo biti od reči Inspektor ili Inšpektor. Kak mi kajkafci rada reči prevračamu, skračevamu, smajnevamu ili restežemu, tak je valda i ozde slučaj. Otec Špektorove, Iveka, Franceka, Milke i Mareka je bil lugar i nadlugar v Turopolskom lugu, a morti Nadzornik, Inšpektor. Ja sem z svojem pokojnem ocom išel puno put v Lug, nu, toga čoveka više ni bilo na životu.
Mene su f sečajnu ostali samo lugari: Gučić, Trupčević i Havidić. Mort taj čovek nekomu od ludi i ni bil sklon, ali po pripovedajnu ja sem ga doživel koj čoveka ki je mislil za opće dobro, za turopolsku zajednicu. Pripovedalo se da kat je nekteremi pogorelo stajne, da je je on pelal po šume. I kat bi pogorelec zagledal nektero lepše drevo, Špektor bi mu odgovoril da ga je škoda. I tak je bilo škoda ovoga, onda ovoga, pak onoga i tak redom.

Iveka se sećam dost dobro. Bil je suvrlivi visoki čovek, fajn. Mučil se na gospodarstvu, kopal, sejal, kravice ranil, kak i drugi ludi vuto vreme. F cirkvu je zalazil i okojne pomagal, dok je mogel i kuliko je mogel. I negva žena Slava, rodom z Lomice dohaja v cirkvu kaj pametim. Već, za dekle baš ne znam, ne nekak ne viđevam. Sat na tem gruntu ni nigdo.

Ivekova žena Slava žive z čerju Barekom na Popovčice. Tam si je najmlajša čer Verica ka žive v Švicarske naredila zidanu ižu. Trejta čer Zlatica ka je bila najstareja, je vdana za Branka Cavrića i žive na Gorice. Na Špektorof grunt i na negdašne gospodarstvo podseća još samo kojn, narisan na štaglene vrate. A na nijovo plementaško stoletno prezime potseti poštar, ki tu i tam donese Uplatnicu za porez ili zakaj drugo.

Tik vuz Špektorovu ižu, prislajna se ižica Janke Crnića, Kovačevoga. Na tem je gruntu živela Janič, Jankina čer, žena Mateka Lackovića, Šnajderovoga. Tu se z jedincom Števekom komu se govorilo Čevek doselila od Šnajderove. Život su si malo zlefkotili prodajum dedovine. Malo Šnajderof gruntek, malo Šarnica Popovčica, malo sim, malo tam. Kat sem pisal o Šnajderovemi onda sem spomijnal i ojnemi. Iak obadva jedinci, i on i negva žena Roža od Matijaškinove, imali su i otranili troje dece. Najstareja čer Đurdica je vdana v Rašče, k Pinturićom kem veliju Bajsari. Nejinoga svekra mati je Malomlačica, od Fiolićof, tak da si je Bajsar pojne z mojum punicum Katicum bratić. Nadica je isto vdana nekam. Otkak je Štević mrl, na gruntu žive sin Ivek z mamum Rožum. Drevena iža vuku su se doselili je još kak i za onda. Sat živeju v velike zidane iže ka je narejena de su negda imali vrčak, vuz Rezu Krčmarićevu, kokošaricu. Taj je grunt negda od nekoga Reza kupila, a f iže su se mejnali stanari. Od stanarof su mi f sečajnu ostali: dovica g. Špišić, ka je imala sine Koču i Zvonka. Koču nis videl leta, a onda smu se oko osamdesete našli v Industrogradnje. Kočo je bil komercijalist v Savske, a Zvonko je završil za mernika. Žnem sem se zestal devedesete, posle puno let. Bili smu zebrani v goričke skupčine, za večnike. Potle se pak nismu videli.

Izajne je vutu ižicu došla familija Šafranić, z Rašć. Otec Joža, železničar, sin Joco, a imena matere i čeri se ne sećam. Oni su tu bili kratko, jerbo su si ižu naredili na svojem, ozde mam za odrskum železničkum stanicum.

Stari su pomrli, a i Joco ak je živ, bome više ni baš mlad. Prijnem sem jenput, slučajno, ima tomu već i dvajset let, z bracum Rokinem bil. To kaj se nismu dugo videli smu preslavili, tak, da smu se dobro nakresali. Fala Bogu, domomek smu živi i celi došli. Kat se Marić, kaj je veliju Mafa, restavila od Pavla Rebića, z drugem se mužom Ivekom Polskem nastanila vute ižice. Ivek je mrl, a Marić žive z sinom i čerjum vute ižice. Veliju da se jena čer vdala k nekomu na Lukovec.

Na samom zavijutku zdesna, bila je ižica, pol drevena pol zidana. Vujne su v dve sobičice živele dve familije. Jeni su bili Fajnek Luka i z ženum Sabinum, a drugi, nijof posinek Pavel Bencek z ženum Marum. Luka je bil selski šoštar i knemu se nosilo cipele popravlat. Ak je bilo kaj mejne za popravek, mort špicpleji, malo se pričkalo dok ni naredil. Pavel je bil državni nameštenik, cestar. Po celi dan je ophajal svoj lever. Posel mu je bil z lopatum šuder po jamica pometati, i opsekajne kitja vuz grabe. Denes je ta služba retko de. Mene vuzotu ižicu, i te lude, vežeju lepe uspomene i sećajna. Nis tu zalazil samo radi šoštarije, nek se zalazilo i onda kat se kosilo ili kopalo po vodu za piti. Mi smu tu de je sat iža vuke je Lojzek imali komačec zemle. Pavel i Mara, rodom od Bakranof z Rašć, su imali više dece. Za onda kat su ludi po selu imali po jeno ili dvoje dece ovo jem je bilo za podsmeh.

A oni su ovak imali: prvo Ankica, onda Štefek, pa Lojzek, zajnem Milkica i zajdna Lubica. Si su stali na svoje noge i svoj kruf jeli, dobro škole završili ili zanate stekli. Ankica je još za onda završila za laboranta, Lojzek za izvrsnoga zavarivača fčem je postigel tem za inštruktora za celu Hrvacku, Štefek je zvučil za zidara, Milkica i Lubica za medicinske sestre. Za mala, dok su još bili pod nadzorom mame Mare, oni su si išli na Odru kmeše. Bili su retka familija z Mlake redovito f cirkve. Vutom su popustili kat je mama počela slabeti i kak su se osamostavlali. Natom prvom grunteku su sat drugi ludi, a Lojzek žive malo dale na onem komačecu kaj sem raneje spomenul da je kuplen odnas i od Pavla Krilčić Štefanovoga, komu se reklo Pavlina.

Ta cesta Svete Barbare je bila dale ot Fajnka nenastajnena. Jedino je na ceste bila iža Števića Krilčića Zvonarovoga, a posle drugoga sveckoga rata su natem potezu narejedili iže brati Tončica i Jurica Lacković Šnajderovi. Kat se Tončičin stareji sin Števa oženil malo su pritisnuli i naredili su mu pristojnu ižicu prek puta svoje. Števa je bil fini majstor, zvučeni šnajder. Oženil se z Pepicum rodom z Odre skum ima dve čeri. Tončica i žena mu Bara, rodom z Lomice su pomrli, a na gruntu je ostal živeti nijof sin Ivica z ženum i z familijum stečenum po sinu Želku ki ima troje dece. Barica, ke smu govorili Lisica, se vdala na Goricu za g. Smolkovića Josipa komu su govorili Zozo. I on je mrl, a Barica je dovica. Žive z Miroslavom, sinom jedincom. Jurica je naredil na ove linije tera se sat zove Velikomlačka vulica veliku drevenu ižu. Z Janum rodom Mihalinčić z Lomice Meštrice, imal je jedinicu čer Janicu. K ne se priženil Tomek Mujnić z Vukomerića, stric mega fermanoga kumića Tomeka, sina Tomekovoga brata Lojzeka i Dorice rođene pl. Ceković z Dubrajnca. Tomek i Janica imali su sina Iveka ki je rano mrl i visokozeškolanu čer Božicu. Prek puta na iste te, za onda linije, zidanu ižicu je naredil Matić Glagoličof. Nega sem spomenul raneje da je bil Capakof zet. Matić je bil cimerman, iak samouk bil je dober majstor.
Ostal mi je v glave još od devetstopedesetčetrte kat je na cirkve Svete Barbare župnik mejnal šindru, Matić je bil med glavnemi majstori. Ja sem onda imal devet let. Z ženum Barićom ka ga je fajn let nadživela imal je sina Iveka komu se reklo Capek i čer Maricu Capinkinu. Ivek žive natom gruntu, a Marica se vdala v Rašće. Natem gruntu se još piše izvorno prezime dok je na gruntu prek puta nijovoga prezime vrovečko Mujnić. Dote iže se od pute išlo po debelom blatu. One su zajdne tere su oči videle na putu do ceste za Goricu.