F škole je već vto vreme bilo drugač nek raneje za NDH ili stare Jugoslavije. Mesto ove reči, službeno su se uvađali pozdravi kad si koga zestal, rekel si: Zdravo ili Dober dan. Nam se to baš ni mililo, ali smu to prifatili koj zapovet i koj da to tak mora biti. Sat deca većinom nikak ne pozdravlaju. Negda te čak koj strašilo glediju.

Prve dane odažejna f školu, skoro si smu tuguvali. Nismu bili prirejeni za odvajajne od iže kak su deca sat. O nejakvemi jaslicemi ili vrtiči smu samo načuli da postojiju v Zagrebu, ali puno let kešneje, kat smu već bili veći. Nogi smu s plačnemi očmi čez obluk, prama Pažulom gledeli. Ojdne najviše pametim da je po škole hodila žena ke su govorili Buba. Ona je kakti čistila, ili nekaj oko toga. Čini mi se da se i Tonča Pažulef onut motal. Morti drva za kurejne prirejeval. Nu, fletno je došlo Miholje i onda smu vučitela prosili da nas pusti na dan kat se išlo grojzde brat. Za falu smu mu znali na tajnereku donesti malo Izabele ili Direktora, ili ak je negdo zmednas ki smu imali trsja imal kaj bolega.

Primeknula se i prva zima. Pametim da je mam prvu zimu kak sem počel iti f školu pedesetprve na drugu, snek oko cirkve visoko napadal. Vučitel nas je jemput rezveselil z rečima: zutra ne morate dojti f školu. Iza cirkve prama Pažulom je bilo tuliko snega da se išlo koj čez tunel, a, mort i dva metre visoko. Tu je bil izbris pak su bili zapuhi! Nas je veselilo to, kak bumu sejeno taj dan po vane. Graba od cirkve do Muženićovoga mosta bila je pokrita snegom i zakovana z ledom, a Domaća zadaća nas ni pretirano mučila. Morti kakva pesmica ili za zbrojiti dva i dva, to si se nafčil, i onda na sajnik. Osim Mlake i "Muženičove" grabe, sajnik je bil spod komare i dole v grabu. Sedem osem metri gliboko. Sat je to sve zaramlano i natom drevje posajeno. Govorilo se da je tu negda, mort v dvanajstom stoleću bila opatija i grobje. Okolo cirkve je bila graja od letef, a po letvami zabita deska poke se moglo hoditi. Prek puta cirkve je bila Paveka Bradašićevoga iža ka je i sat, za onda najlepša fselu. Zidana. Po pripovedajnu natom su placu licitari za Svetu Janu šatore zdigali. Bradašići su bili dale, ozde kak je Đinekova iža. Osim Pavekove iže i Grada, još je tu i tam tera ižica bila zidana, sklepana od cigla, na "kant" zezidanoga. Školski je vrt dosezal do puta vusteroga je po cele širine bila drevena graja. Valda po komesacije Pavek je prigradil komat toga vrta i z visokem cimenteranem plotom ogradil. Gore po cimentu je pometal komade steklevijna, da ne bi mi deca išli trgat jabuke ili ruške. Morti je to vizija ovem ki sat predlažeju da se ovaj plac oko škole pojnem zove. V isto vreme je ogradil i komat grabe od cirkve do linije poke smu išli mi na Popovčicu. Ta linija se sat zove Smendrovićeva vulica. Graje više ni. Jen komat zemle je župnik Loina otkupil, a drugi su Pavekove čeri vrnule fare, kat je župnik bil Mladen Sinković. Kat se zavinulo putom prama škole, na levo je bil vrt vukom je vučitel imal najviše put kukuruzu. Dok smu na Mlaku f školu išli, smu mu pot satom nastave okapali.

Puno put je od rušajna te naše dvorof spasil Miško Felan, Ivekof bratić, ki je za onda, a i sat još služi prijnemi. Miško je bil stareji deset let odnas i ni ga bilo straf. Mi smu kopali jame i igrali se, a Branko se rval s tem kak postati kosmat. Dok smu se mi dečinske ponašali, najnega je zarana deluvalo klopotajne od nas starejega Mikića Martinkovića komu su govorili Lelec. On mu je čak i nejakvu mast tržil. Jenput sam se z Brankom pograbil i grozil mu se da pem po tatu., a on je mene rekel: ja idem po dva. On je imal i dedu.

Sat su drugačeje dečje radosti nek za onda. Ima još tu i tam i takvoga raduvajna, ali, ima na žalost i one dece teru roditeli pelaju v tuđe zemle, trošit hrvacku muku i tuđemu se veselit. Tak da deca od te snobofske roditelof rajše imaju tuđe, nek svoje. O tuđemu pripovedaju, a svoje ni ne upoznaju. Zato mi se ovo vreme i ludi činiju licememi. Sve imaju, a samo se javče i sirotijna zaziva. Jakop i Janek ki su troje dece v sirotinje otranili nisu sigurno tuliko jafkali, kuliko sat jafčeju oni ki imaju jedince ili jedinice. I mesečne plaće za uzdržavajne imaju. A kaj su ovi imali? Niš. Deca su trebala jesti i obleči se, a kat je došlo vreme za školu trebalo je misliti i nato otkut za knige, za nejakve školske troške. Slikar je jenput na leto dohajal i zajnega je bilo treba imati peneze. Otkut?

Kaj z litrice mleka ku su mort prodali teromu mlekaru ili s kakve kirije ku bi Jakop naplatil? A poput druge ki nisu svega trsja imali i on si je rat v bertije potrošil.

Sejedno su to bili sveti ludi, mučeniki. Nam je denes prelepo i zato smu prokšeni. Nezafalniki, veličamu sebe, a kat bi Bogu štel zafaliti, već ti se svet smeje. Kakof Bog? A kaj je tek bilo takve sirotijne kat su deca zrasla za zamuš ili ženidbu. Nejakof ormarek ili psiju je bilo treba kupiti, a v ormarek nekaj i deti. Bome se i krava šuleka pri nekom prodala i komačec zemle je otišel. Nijova či Roža je zela Iveka Lackovića komu su govorili Šlukek, sina Marića Muženičke i Lukića Lackovića od Jedanof. Sin Tonča je zel Bareka, jenu zmed tri lepe čeri Iviča Čačkovića komu se reklo Matušinof. Imali su Števeka, jedinca, ki sat svojum familijum žive natom gruntu. Žnemi je i Barek.

Puno raneje nek se otselil na Goricu živet, žnemi je vute male ižice živel i Mikić z ženum Barićom čerjum od Imbre i Milke Črjnakovoga. I oni su imali sina, Mladena, jedinca. Mikić Lelec je nastradal na Gorice, skoro pret stanom teroga je negva žena dobila dok je delala v vešeraju pri vojske, na erodromu. Bežal je z jene na drugu stranu ceste i podletel pod avuto. Janeku ka je fajn let nadživela Jakopa je med Tončinemi život dogorel. Poput noge naše ludi, i nejin sem les z još nekem drugem spušćal v jamu, jerbo su za onda grobari bili samo Vitek i Čvarček.