O lepote onoga vremena se more govoriti isto koj i o lepote ovoga sat. Sako je v nečem i nekomu lepo, a nekomu ni. Mi smu se igrali graničara, škole, ili v Preku kaubojof i Indijancof. Većina igre su bile v prostoru, vane. Jedino se po zime kartalo črnoga Petra , šnapsa ili Mice, nutre, v iže. Ima i sat igrajna po vane, ali puno mejne. Večinom deca sediju pret televizijum ili kompjutorom. Ne rezmišlaju puno. Samo preživlavaju ono kaj jem drugi nudiju. Nekuliko let mega detinstva se sprepletalo z detinstvom Iveka Kunića Pažulevoga ki je moj jargan. K negvemi sem išel jeno vreme i po nijove krave mleko, tero se v Zagreb nosilo. Po letu smu koj deca najviše išli kopat "kućice pod bregom", a po zime se f kujne igralo Čoveče ne luti se ili Mice. Obluk od kujne na stare drevene iže je bil okrenut prama Jakopu i videl si kat je ojdne do zišel s iže i kaj je delal. Se je tak blizu da se čulo karku i do je komu kaj rekel. Za onda se tem Kunićom, Roku Pažulevomu, reklo Židovi. Mejdne od one ki imaju isto prezime se nisu računali Mikić Ive Jožinoga, Lojzek Lola i Gibajnaki. To je išlo samo tri lumere. Rokovu, Vincinu i Mikinu. Do potpunoga dokučevajna zakaj jem se tak reklo nis nigdar došel, ali onuliko kuliko sem k Iveku zalazil, znam da su bili vredni, skrbni i v poslu točni. Ves posel, bilo na zemle, bilo fštale, bilo fiže, točno se zvršaval. Zemle su na jesen navreme zorali i posejali, na proleće drač spleli, žitek poželi, zmlatili i pospravili. Točnost f poslu je robuvajne, a v robuvajnu se čovek i zmuči. Zmučeno telo išće počinka. I v odlažejnu na nočni počinek i v ranom zdigajnu, ovi ludi su bili točni. Eto, potom su ludi z ove lumere bili poznati. To je onda i drugemi bil potstrek da budeju v životu takvi ili slični nam. Morti su zato ludi fselu med sobom govorili: si koj židov, Pažulof. Pot tem, židof, se mislilo dobro, vredno, točno.

Ja sem vuto detijne vreme, družejne s temi ludmi imal nesvesno. Nekaj malo koj Ivekof pajdaš, a nekaj malo i potom jerbo su i oni bili cirkveni ludi. Bili smu nekoliko put i domištranti župnikom, vlč. Ladislavu i negvomu bratu vlč. Mijeku. Ivekof tata Rok, a još više mama Milka, Raščanka, rodom Korenika, su išli f cirkvu i kuliko su mogli kat je bilo treba župniku pomoć, pomagali su. Jeden od foringašof kat se pedesetpete išlo v šumu Dragu, ober Peršinofca, po drevo za plot odrskoga grobja, bil je i kum Rok. Mi smu ga tak zvali, kum, jerbo je Rokof otac Miško memu tate bit fermani kum. I kat se išlo po kamejne za oltar odrske cirkve v Trjne, de je službuval župnik Franjo Šeper, foringaš med muži ki su vozili je bil Rok. Ak bi kum Rok i našel nejakof razlog ili se premišlal jeli iti ili ne iti, kuma Milka ga je z lepemi rečmi navek privolela. Ona je odvaguvala kaj je preče, a kaj se more kešneje narediti. Zajnu je pomoć župniku bila svetijna, zalogaj za vekuvečni život. Negda su fposel upućevali Miška po prezimenu Felan, ki je prijnemi od male nog. On je sin Rokove sestre Jane i Franceka Felana z Odre, a imal je još: Katu vdanu v Mraclinu i Rožu ku je dopal gruntek. Brat Lojz se priženil v Reliću de i sat žive.
O nekemi Pažulevemi sem samo imal prilike poslušati, a nis je nigdar upoznal. Primerice Rokovu sestru Doru. Ona je otišla zamuž tem v Lupoglaf čez teroga sem se 2004. prepelal prvi put v životu, kat smu išli z Karmela v Kloštru od č.s. Jagice Lacković.

Odonut se nisu nigdar vrnuli. Po pripovedajnu, brat Lojz je bil ledičen, a brat Ivić se po slike oženil z Mlake. K nemu je otišla Janić, čer Judice Cujnkove. V vreme tero opisuvam, celo selo je vozilo mlet žitek za šrot, žgančenu melu ili melu za kolače i gibanicu k Todeku Jedanovomu. Rok Pažulef je imal svoj mali melinek na kamen i rajtalicu za kukuruzu. Vujne se stručina odvajala od kukuruze i putuvala na drugi kraj. Mi smu doma imali rajtalicu, ali se se mešalo, stručina i kukuruza. Ova Rokova je bila stroj. Nu, ovo se ne bi bilo spomena vredno, da ti ludi poput one pri Pope v Dolencu, pri Korilofčanu ili pri Zvonare na Ceste, celi život nisu bili tuliko okrenuti životu za drugoga. Ovi su svojem životom pomagali živeti Mišku, komu je život v nečemu prikraćen i ni nijova krv. Denes bi o tom pripovedale Udruge, socojne službe i još bi se kojekakve zaštitnikof javlalo. Kad malo rezmislim, ozde se na najboli način uložena dobrota vrnula. Miško je otpratil na put u večnost vujca Roka, komu su nažalost pri kraju života nogu ocekli, a posebno je svoju plemenitost ku mu je Bog dal, iskazal strplivo dvoreći vujnu Milku do smrti.

A leta je bila marot i f postele. Prijnemi je leta živela i majka z Rašć. Ne je bilo ime Magda, a kat je je frašče mrl muž Bartol Korenikof onda se nastanila pri Pažulevemi. Tu ja moleć oči zaklopila. Miško je i oko cirkve rat pomagal, dok je mogel. Kaj sam, a kaj bi ga kumi znali poslati. Posebno je kuma Milka znala reči: Mijo otijdi, pomori župniku. Sat je već slabeji, a i v hodu mu se čita da ima sedamdeset let. Žnega čitam Isusove reči o Kralevstvu nebeskom. Če je i nepismen i čitati ne zna, otkat pametim ide f cirkvu. Posluša reč Božu. Sigurno je da si on Evanđelja i propovedi vusebe tumači drugoč od nas, ki mislimu da smu mentalno čisti. Oni živeju po osečaju. Negvu osečajnost za betežnika sem osetil i ja, kat sem si prst odrezal. Od se familije ni bilo nikoga. Miško je došel. Nad menum je žaluval i splakuval se kat sem jemput nakresan na postele ležal. Kuliko je samo put Lubice Kolaričkine priredil mehin za Božićne jaslice, bor nasadil i fcirkvu ga zanesel. Veči del ovoga opisa odnaša se na život ove moje opisanikof i život f stare drevene iže. Nakon kak smu se jeno vreme razišli, opet smu se kat je došla doba za ženiti našli na tragu iskajna životne suputnice. Iveka je tragajne otpelalo na Ples. Oženil se v novu ižu ku su naredili na negdajnem vrčaku z Plešankum Baricum, čerjum Jure Plepelića komu su govorili Suva . Na Mlake je imala tatu, Bareka zbrega. Števek zbrega je je bratić. Ivek, Barićin brat po špotu Ćubek je oženil Lomičanku, čer Stipice Deverićevoga, Šteficu. Ivek Pažulef je z Baricum imal troje dece. Nažalost, zarana su bez mame Barice ostali. Nastradala je na putu za Tursku, kam je išla kupuvat prjnke za trgovinu. Ivek je ostal dovec, a život mu osmišlevaju deca: Danko,Jurek i čer Kristina, poke je i deda. Nektere posle ke su delali i v vreme otkut sem počel ojnemi pisati, samo v mejnem obujmu, još navek obdelava, do? Miško Pažulef!