Te "tečaje" je Miško imal v Nedele, posle obeda. Osim mene ki nis uspel, kandidati: Ivek i Branko Pažulevi, Medek, Štević Šimčev, pokojni Miro Rendulić i nekuliko dekel su svladali gradivo. Nit se više ne sećam se ki su se onut motali jerbo je i z "bagera" dohajalo jato kupačof v "Tekuće". V denešne vreme su ti dogođaji teški za razmeti. Z toga grunta su osim dekel, Jane vdane na Odru za Franceka Felana i Dore ka je otišla v Lupoglaf, otišli v beli svet i dečki: Lojza i Ivič. V Ameriku. Lojz se ni ženil, a Ivič je kak je to za onda išlo, po slike nasnubil Janiča, čer Judice Cujnkove. Judičina iža je bila drevena, ozde kak je Drageca Cujnkovoga Dajdeka vrt.

Ove dve dečkom ja ne poznam i neznam da bi dohajali v stari kraj. Janić je bila jenput ili mort dvaput. Jemput sem se žnum i rukuval pred cirkvum.Kat su te dekle i dečki otajali z doma, gospodara i gospodarstvo se vagalo potom kuliko zemle imal, jeli imal kojna i kuliko, kuliko kraf i teličof, ždrebičof, svijn. Ako je dvorišće bilo tak kak su naša denes da travu pojnemi kosimu, to se reklo da su slabi gospodari, nikakovi. I štala se gledela, jeli drevena jeli zidana.

Pažuli o kemi ovo pišem su po poslu i maru okojnega bili med prvemi v selu. Nijove štale su imale zajednički krof. To se more videti i denes da je tak koj i pred pedeset let. Iže su imali rezdvojeno. Zdesna je bil Miškof Rok, sredek je bil Imbrič ki je imal sina Vincu i čeri Rožu i Mariča, a nalevo gledeć s puta je ižu imal Ivič komu su govorili Dovec, a imal je sina Miku. Ti su muži za poslom bili lakomi, ali su zato sega spram noge v selu više imali. Ove stareje muži ja ne pametim. Pametim Roka o kom sem već nekaj rekel i Vincu o teroga bi sat rada spomenul. Kak je to mejne više za onda, a i denes je, Vinca je snubil na nekuliko mesti. Ze spominka moje pokojne tete z mamum svatil sem da je snubil moju tetu ka je otišla v samostan. A Vinca kak i ovi drugi Pažulevi dečki su dobro stali na ženske burze će su baš bili mužaki vrbarci a ne plementaši. Pa kat su megli zebirati zakaj nebi. Kuliko sem razmel Vinca je potražival da bi se s tetum k Pažulom prepisala zemla v Otočecu. Na te zemle ku su partizanske vlasti zele 1945. dopelana je zgrada kaj smu je rekli šupa, a od iste je oteta Puse Brigleviću Goričkomu vlastelinu. Teta je bila z ponudum žalosna, pak je snoboku po tekliču otposlana poruka "da je ona siromašna, a on ako mu treba zemle, nek si ide v Otočec nagrabiti vreć kuliko got oće".

Ovaj tetec Vinca Pažulef je zagledal jednu od više čeri suseda Marka, istoga prezimena, Kunić. Zebranica je bila Jaga. Puno put sem čul v spominku zmed mamum i tetum Magdicum kak su rekle da su Markove dekle bile sve feš i lepoga gizdavoga držajna. Nektere od te ludi sem ja poznal i za onda pozdravlal z Falem Isus. Teca Vince se sećam da je k meše dohajal v trifrtalnom kaputu, komu se reklo reglec. Teca Jaga je bila v cirkve redovita, nu ni minula ni jedna Nedela da ne bi išla. Posebno kat je župnik Loina počel na Mlake služiti Mešu saku Nedelu. Još sat koj da mi je pred očmi nezina figura ku osvetluva sjaj blagoslovlenoga ogna na Veliku Subotu. I nezina slika kak v klecalu z još žen moli krunicu za svibajnske pobožnosti. Nejine sestre, Dora vdana v Dolencu za Iviča Trumbetaša komu se reklo Čaruga i Bara vdana za Franca Glagolićevoga Bigara nisu baš bile tuliko oko cirkve. Se je koj i Jelu ka je bila v zamuže pri Števeku Bradašićevomu veže jeno. Imale su po jeno dete. Tetec Vinca i teca Jaga su imali Iviča komu se reklo Prđek.