To valda tak dragi Bog dâ, da kak čovek zalazi v leta, se mu se više po glave motaju događaji z mladosti. Ja to vidim posebe, a još više po mame ka ide prama devedesetčetrte. Novo i friško je mam sprhne spred oči, a staro, koj da je je glibje v glave zasečeno. Nu, to ni samo nekomu tak vutem času, to je tak otkak je luckoga roda. Ja sem tek zakoračil v sedmo desetleče života, pak, već vidim kak mi se dogodi da nektere pripovesti ke sem već prede povedal ponavlam, a kak onda ne bu onaj ki već gazi oko polovice desetoga. Posebe najbole morem pratiti zablevajne. Došlo mi je napamet kak sem jeno leto na zemlu Zavrtnicu išel kosit zob. A Zavrtnice su kak sama reč veli – za vrtom. Znači, nisu prek sveta. Jedne glavice tem zemlam sežeju sim k vulice ke sat rečeju: vulica "Kovači". Kak je to bilo nekak f srpnju mesecu, vane je bila velika žarina i vručina. Čovek ki ovo sat čita se more pitati, a kaj to ovaj spisava? A praf za praf, dela se o zablenosti? Lajti z vinom su bili v pevnice, a vujne je i v sred leta ladno. Zaradi odlaska na tak "dalki" put, na zavrtnicu, zvaditi sem si z šeflom išel pol litreni kriglin vukomerskoga "portugisca", armuta i izabele. Onak, lepi mrzli, najemput mi se rezišel po celom telu. Ja sat više točno ne znam(!) je li sem zabil ili nis da sem to naredil, kat još ni do štale – ka je sega dvajst korakof dalko – nis došel, išel opetuvati ovo z kriglinom. Kaj to ni bila zablenost već za rana? Nis niti četrdeset imal. Taj put sem na zavrtnicu došel onak, kaj naši ludi rečeju kuražen. A za košnu to paše, treba mahati dve, tri vure s kosum. To ni baš lefki posel.

A za onda, na zavrtnice ni bilo ni iže ni ižišća. Ni sveta nijakvoga bilo. Sat je na Mlake i na temi Zavrtnicami puno sveta, ali, zgleda da si samo z avuti preletaju po putu. Prede su po vuličke, sat se zove Štefanova, a mam je za mojum ižum išla deca f školu. Sat više ni niti dece videti, niti halabuku nijovu čuti. Valda je te par korakof do škole mama ili tata prepelaju v plejnatemi "lubimci". Da ne bi princi ili princeze nok rezdrli. Noge trebaju čuvati za navečer, za Klub 100 ili teru drugu bedariju. Vidim da i f cirkve noge čuvaju. Da jem se ne bi koleno drlo, kat zajdeju f cirkvu samo malo zatancaju z kolenom, vidim, najviše z levem. Retko vidim onak kak je nas župnik vučil, klecuvajne z svinutem desnem kolenom ko dodireva cirkveni pot, do zemle. Valda računaju da jem se bu tekućina za podmazuvajne ivera prerano potrošila. Jerbo ipak treba zdržati meše, do prve Svete pričesti ili čak do Ferme.
Negda se z jundajučega plejnatoga čez obluk nagleda i teri "kućni" lubimec. Rotvajler, ili tera druga mrcina. Po tišine oko nas, koj da se vraća negdašnica kat je Mlaka imala Dolenec i Gorenec. Svedoki smu denešne "nelogične" zbilje. Zidaju ludi nove velike iže ili k staremi prizidavaju dupla, samo da bu više placa. A do bu vutom placu, to, koj da se te ki zidaju ne tiče. Glavno da se zida i da bu veće od onoga polek. Tak je po cele naše, preveć zadužene zemle Hrvacke. Čak i stareju ludi, pezdionerci, i oni koj da si navem svetu osiguravaju i pripravlaju večni dom. Pri nami se tak puno zezida, a za jeno leto se f cele Hrvacke zrodi oko četrdeset ilada dece. Pitaš se zakaj i za koga ta zidarija. Tak se ste po mojem viđejnu ne baš prelepe situacije ku rezglabam vuz juternu kavu ku z mamum pijem op šest vur kad je nosim iruzit i lanitop, prije nek otijdem na posel, opet vraćamu na stare teme: kak je negda bilo.

Of čas mi je napamet došlo kak je jeno jutro pripovedala da je pri Grge Glagoličevomu komu je govorila stric bilo desetero dece. Mam dojne, niš mejne Munđerof. Od kuma Korlića. Ni jeni ni drugi nisu si preveč rezbijali glavu: niti načem budu spali, niti je li bu mesnati obrok s točnemi merami kalorije. Mele za žgance je bilo, ako nikakve, onda bar kukuruzne. Kravice su dojile mlekeko, pak su se žgančeci žnem polejali i to je bilo za froštukel. Denes je to kakti retko egzotično domaće jelo, i ide ga se onda iskat po bertija: "Pri dobre mamice" ili v terom drugom pajzlinu. Nekteri put su žgance polejali i z bažulom, pa da čuješ rata. Kat je to f trbuvu zakuvalo, kam onda? Za komaru! A iza Grgine komare ka je bila ozde kak je sat vulička Glagolići, jen laket ojdne je bila štala kuma Korlića, Munđera. Tu se, natom laktu širine išlo na stran, i po danu i o pol noći. Veli, da su se natom čepečkom poslu znali naspominati i nasmejati. Negda i zapevati. Jerbo su Korlićevi si rada popevali. Do denes zapopeva? Za onoga ki popeva, veliju da je šašaf. Jeli su rada zapopevali i kak je bilo pri još jene brojne Mlačke familije po prezimenu Kunić, neznam. Ali, zapametil sem da smu nabrojili puno dece vute časne vrbarske familije. Ti časni starci ke bi rado spomenul su bili: Marko i Ivić, a imali su i sestru Jagu.

Prvi na grunteku do pokojnoga nogometaša Mikića Kunića teroga sem zajdni put spomijnal je bil Marko. Ožejnen z Jeličom, sestrum Marka Novosela Štefovoga Lesičinova, imali su desetero dece ovak poredano: Lojzeka, Tonču, Pavića, Katića, Mareka, Jelu, Jagu, Doru, Baru i Janića. Gruntek je bil mali , ali roden i ploden. Ti ki ovo čitaš, zamisli si kak je bilo tem ludem kad su se tulika deca počela ženiti. Denes se stem rvaju si. Najveću muku imaju oni z jedinci ili jedinicami. Ne znaju kam žnum ili žnem.Pogotovo ak je i druga stran isto takva. Uzdanica v dinarec tem ludem su bila mala pretrževajna kojnof ili kraf. Tak je i Marko delal. Kupilo se mršavoga kojna v Gaju ili Uljaniku v Šlavunije za malo penez, a onda se čez zimu malo doma priranil i na proleće je prodan za nekaj više.

Tak se stiskalo i živelo. Jelič se poput druge žen sigurno doma z decum mučila, z vrtom, oko blaga f štale, i popolu. Sigurno jem ni bilo lefko, ali kat se ludi rat imaju i Bogu se predaju, se jem ide leže. Ovi su ludi sigurno bili takvi. Po svoje tulike dece ku jem je dobri dragi Bog daruval, uživaju večitu diku nebesku. Žrtva ku su zajne za života podnesli, sigurnost jem je vekuvečne sreće. Većinu nijove dece sem već raneje spomijnal. Dekle su se odreda bile lepe, i vredne ruk, i većinom su po Mlake bile vdane. A, to je negda puno značilo. Dora pri Iviču pl. Trumbetašu kaj su mu govorili Čaruga, Bara je bila pri Francu pl. Glagolićevomu Bigaru, Jela pri Števeku pl. Krilčiću Bradašićevomu i Jaga pri Vince Pažulevomu. Marek je bila vdana v Rašće. Jemput sem prijne bil s križecom, z pokojnem župnikom Loinum.
Odonda je prešlo možda već četrdeset i više let. To je bilo prvo i zajdne kaj sem ju videl. Iža je je mam ozde vuz malen, a melen do vatrogascof. I sestra Katić je bila vzamuže tam. Ojne i o potomstvu od ove obadve neznam niš. Spomenuti Pavić je otišel v Ameriku i ni se nigdar vrnul. Oženil se z Jelum, sestrum Lojze Krilčića Zvonarovoga. Jela je bila pajdašica z mojum tetum č.s. Lovrinum Glagolić. Na Markovomu gruntu su nazajdne ostali živeti: Lojzek z sestrum Janičom, ke su govorili Buba. Ona se ni vdavala. Ne kat se setim morem reči: bila je draga i vredna, nigdar se ni v mlačke škole nanas decu srdila. Tam je nekaj časa služila koj podvornica. Mene je bilo milo kad nas je teri put znala podragati po glave i po imenu osloviti. Lojzeku je, kuliko se sečam, kat smu bili mali Ivek Pažulev govoril - Lola.