Za kaj je Ivek Pažulef Lojzeku govoril Lola nis istraževal, ali si mislim da bi to morti bilo ovak: Lojzek se zrodil 1912. leta i ja ga prilično pametim. Ak je pokojni Mikić Ive Jožinoga Kunić, onaj dober nogometaš teroga sem zajdni put spomijnal bil 1935. godišće, onda je pedesetgodišnaku Lojzeku pasalo biti v društvu z Mikićom ki je vuto vreme bil popularen i na visoke cene koj nogometaš. A nogomet ni bilo samo potpirevajne i podvikuvajne ili navijajne na igrališču, nek su se nogometaška slavja ili žaluvajna ak se utakmicu zgubilo, nastavlevala za onda v jedine i najvažneše društvene iže. Na Mlake je to bilo f Črdaku, de je Mika Kolaričkin Lacković z ženum Dorum bil bertaš. Za onda jedini f selu. Kak je Mikić Ive Jožinoga i f karta, posebice v bele bil spreten i premišlen, si su ga rada jemali f kumpaniju. Denes se, tak si ja mislim, na takof način više ne karta. Onda je to bilo za niš ili za liter vina. Samo da se vidi do bu boli. Ni bilo penez zato trošiti. Denes je došlo drugo zlo, droga i opijumi ki rezarjaju i telo i dušu. V kartaškom društvu zbi se z Mikićem Ive Jožinoga zabral i moj pokojni kum Štević Kadan Krilčić, Pafček Trumbetaš ki se od mlada rat kartal, onda Tonča Jakopa Pažulevoga Martinković, pokojni Iva Bajsmenof Ilenić, Mikić Gibajnakof Kunić. Negda, kat je na urlap z Nemačke došel prikrpal bi se još pokojni Števek Markof Glagolić.

A mejdnemi je poradi one Mikićove popularnosti ku sem gore pripomenul znal biti i Lojzek Pažulef. Kak je to celo društvo bilo veselo, onda se vuz karte rada znalo i zapevati, a tak veselomu čnokožnomu Lojzeku ki je zgledal poput talijanskoga "lovera" ni bilo teško prikrpati špot Lola. Držim da to ni bilo pogrdno, niti z mržnje, nek onak, više koj selski bečar. To je veselem ludem pripadalo. S kartaši bi zapopevali i oni ki su kibicerali. Takve je navek bilo. To je znal biti Mijek Cundeković, Antek Kukula, Jurić Trumbetaš Serakof, Miško Novosel Pajuta, Ivek Lacković zmelena i još do. Pevajne je po letu bilo čuti tem do cirkve. Ja sem Lojzeka zapametil koj mejnega i drobnejega čovečeca. Zgledal mi je dosta spreten, kaj bi naši judi rekli vržlast. I on se kuliko se sećam nekaj malo igral trgofca, pretršca, tak nekako Sećam se kak je tam negde pedesetpetešeste v XX. stoleću speluval kojne talijanu Alde z Venecije. A speluvati je mogel samo fletni čovek, jerbo vuz kojna je trebalo podrčati, negda malo i onak paradno, naprčeno. A Lojzek je imal lepu štimu.
Glavna magistrala za speluvajne je bile ozde, od križnoga dreva prama Dolencu, ak je trgovec bil Ivič Čaruga Trumbetaš ili negov zet Dragec Dajdek Cujnkof ili Miško Čovek Trumbetaš, a prama cirkve su speluvali Lojzek Lola, moj bratić Matić Makovićef, kad ni mogel Vinca Pažulef onda negov sin Ivić Prđek Kunić. I moj švogor Štefan lšćef i Joško Mudićef su znali podrčati će baš su bili onak, dost teretni muži. Za onda smu mi deca f temi ludmi videli "akademike". Kaj misliš, s talijanom su se spominali i trguvali. Talijan Aldo se dopeluval na finom avutu Fiatu, a mi smu većinom bili pokrpane lač nasebe. Vuto vreme je Lojzek već bil srejdne let, zreli muž.

Pripovedale su mi mama i tela Magda kak je Katek dugo sesnula i kesno prehodila. To je je sigurno pomoglo da je još i dendenes živa, samo neznam kuliko je krepka f hodu ili na jeziku. Moral bi ju iti pogledati. Ona žive na grunteku kam ju je nezin lubleni Lojzek Lola koj deklu dopelal. Četrdesete v dvajsetom veku jem se zrodila čer Janek ke je Katek od milja govorila čerek, tak da nekteri judi i žene Janeka i denes tak znaju. Janek je bila lepa curičkica, a potlem lepa dekla. Već zarana ju je puno dečkof zagledalo i priželkuvalo. V jesensku dobu kat je bilo vreme brajna grojzda i ona je znala iti v Vukomeriće pomagat grojzde brat tete Bare, žene Franca Bigara Glagolića ki je imal trsje na bregu Glagolščaku de i mi. V glavu mi se puno put vrne slika Kateka, tere su jerbo je došla od Lackovičof Šnajderof govorili Šnajdarka kak v Vukomeriće okapa trsje i prevraća tešku ilovačinu, ali pevajući i smejuć se. I druge lude je rezveselevala. Po bregu Glagolščaku čuli su se ludski glasi, jerbo radija za onda ni imal saki kak sat. Sat se niti ne kopa, niti ne šprica z galicum, niti se više ne popeva. Ono malo kaj se gore dojde, većinom ludi na kolec zatekneju tranzistor i onda mesto pevajna puščaju nejakvo tulejne, ko ne spada niti f taj kraj niti ima kakvu kulturnu podlogu. Ali kaj je tu je, kakvi lud i takvo pevajne i ponašajne. Opće ne glediju jeli to nekomu okojne smeta ili ne. Potom su ludi z prošloga veka bili prednami. Vuz sa bogactva i titule, ludi su denes primitivnejega duha nek prede. Imaju materiju, nekuliko avutof, a z oblekum neznaju kam. Tak da i avutof i obleke moreš i po graba najti. Pa čak i vuz cestu prama Vukomeriću ki je po negdašne čistoće bil pravi Raj. Vutom Raju, mi se čini, se zametnula i lubav Katekove i Loline jedinice Janeka spram Števića Bajsmenovoga Ilenića Tlotleka. I on, vrbarec, ki baš niš ni imal z Vukomerićom, obletal je pojnem samo da bu z bliza gledel Janeka. Na kraju se ta veza i dogodila. Na kakof način, to sem već v nektere Barke raneje opisuval.

Denešne se vreme po Vukomeriću ne čuje pesma niti lupajne motike. Moj je japastari Janko Glagolićef imal trsje cep, kralevinu, a ja denes, i drugi, imamu armut i izabelu. To ne treba niti kopati niti špricati. Ali ga još imam. Nekteri su svoje resprodali i Raj preselili. Vajda su tak i ovi ot Kateka Šnajdarke. Ne ja velim "familija". Najme kaj? Na Mariškićinom grunteku je potle Jožićine smrti ostala živeti Mariškica, sama. Kak nisu nijakvoga potomstva imali tak su zemlica na Tratinice i gruntek dopali i bližeši rod. Mejdnemi i "familiju". Niti Tratinica niti gruntek nisu tuliko atraktivni da bi se najnemi ostalo ili kaj delalo, nek se lepeko prodalo. A kat ti imaš peneze, se je leže. Žnemi delaš kaj oćeš i de oćeš. Na morje Jadransko žnemi. I tak se vukomerski Raj preselil daleko ojdnega. Z onem rajom su nestale i one muke. Ali vutom uživajnu ni me "familije", to je dopalo nektere druge. Ona je po svem metkom srčeku fčinila puno dobroga. Jeno nek je, i to je fajn. Još nam je sem f selu friško sećajne na Janića Črjnakovoga Čeču, ku je prigrlila koj da je je kakof rod. Janić je puno let živela v sukašnice pri Pažule, a posle i fiže, dok je još za one države nisu našli smeštaj v nektere zagrebačke ubožnice. Ne znam je li je Čeča još živa ili ni. Ona Kateku ni bila po rodu niš. Jedino kaj je z mužom Marijanom dok je bil žif, bila sluškijna na Gorice pri vujcu Pube ki je imal čer Mareka. Marek je bila vdana za Emila Prahera, nakupca i prekupca blaga po sejme. Imali su čeri Višnju i Jasnu ke su išle zmenum v školu na Goricu i sina Zlatka. Oni ki su kupuvali benzin za avuto dok je benzinska postaja bila ozde kak je sat autobusni kolodvor na Gorice, sigurno Zlateka poznaju. Oženil se z Vericum, Lomičankum.