Mam do Marka Pažulevoga imal je ižu brat Ivić. Po ovem kuliko sem dokučil, Marko je kaj se dece tiče bil plodneji. Ni mi poznato ni kak je Ivićove žene bilo ime. Od sve Ivića Pažulevoga dece, ja pametim samo Juru komu se reklo Gibajnak. Zakaj su mu tak govorili, to ja ne znam. Ženu Jurinu sem poprilično poznal. Nekak mi se čini koj da su oni živeli saki zasebe. Za Juru su govorili da je komunist. Čak je bil i v nekakve državne službe. Možda f ciglane v Mraclinu? Jenput se, kat sem ja z tatum na kole vozil gnoj v trsje v Vukomerić, Jura znami vozil do Peršinovca. On je tu ostal. Puno let kešneje sem si mislil da je morti tu ostal zato jerbo je negva sneja Marek lukafčica tam imala trsje. Sečam se daje zarana imal beciklin i najnem se znal voziti kaj je za onda bilo tak retko, kak je sat da nekteri imaju svoje avijone. Jurina žena je bila rodom ot Šipušićof z Male Gorice, sat se to se zove Velika Gorica. Baš točno s teroga dela Gorice, to neznam. Bila je, kaj ja pametim, jača žena blage naravi. Kaj bi naši ludi rekli ni se zajnu ni znalo niti je komu vodu skalila. Ja sem ju zestajal najviše ozde pri Jožeku Jankecovomu de je živela pri čeri Bariću.

Jožek je med prvemi f selu dobil traktor z Amerike. Bilo je to negde pedesetdrugetrejte prošloga stoleća. Traktor ni imal pogon na kotače nek na gusenice. Išel je jako sporo i dost je zemlu zagaževal. Sat već točno ne znam jeli je Jožek te gusenice zvadil i del mesto ne kotače ili je taj traktor prodal i onda kupil drugoga s kotači. Gorivo zajnega je bil gajs. Tata, a negda i ja žnem, smu k Jožeku dohajali da bi nam oral nekteru zemlu, onda ak je on bil napolu prijela nas je Jure Gibajnaka žena ke smu mi deca govorili majka. Tak su je govorili nezini nuki Števek i Ivek Jankecovi. Negda nas je prijela i majkina čer Barić, Jožekova žena. Na Gibajnakovomu gruntu Juru je nasledil negov sin Mikić ki se oženil z Lukofca, a kak sem gore napisal žene je ime Marek. Ona je još i sat živa samo kuliko čujem baš ju noge ne služiju, ili slabeje vidi.
Sećam se jedne zgode kat smu išli z Odre s polnoćke, a išel je i Mikić. Išlo se čez gliboki sneg tak da je bila naređena prt, pa smu išli jen za drugem. Moglo je to biti pedesetšestesedme.

Vuto vreme je tek pret par let došel mladi župnik ki je znal lepe propovedi imati. Bil je to vlč. Ladislav Loina. Mikić je taj put rekel, toga se još sećam, da bu i drugo leto išel na polnoćku ak bu taj pop. Nisem pratil jeli je ili ni išel tak kak je rekel. Znam samo da se rat kartal, a vukom društvu to sem zajdni put spomenul. Puno let kešneje kat su se već negve čeri Katica i Maca povdale, došel sem zaradi politike k negvomu zetu Milenku. Spominali smu se o kurenju centralnoga grijanja, a i on je imal peć kakvu i ja. Zadivel me je kak je lukavo rešil ploču v ložištu, i kak je ložište peći obzidal. Tak je zašparal fajn drf čez zimu, a toplinu je delalo isto. Na žalost rano je mrl, ni doživel nejakva velika leta.

Puno raneje, nis zapametil točno, ali nekak pedest prvedrugetreće i neznam skem svojem sem bil v nijove iže kat nam je ma sestrična Janić Štefanova Krilčić ke su govorili Frfla skazuvala bračne krevete i zapore ke je tu dopelala koj miraz. Ona je zela Mikićovoga brata komu je bilo ime koj i ocu, Jurić. Točen rasplet ne znam kak je žnum bilo, ali se sećam da su govorili kak si je Jurić našel nekakvu Ruskijnu, a Janića je ostavil. Žnum je imal čer Šteficu, tera je, valda po sudu prijnem bila. Moja sestrična Janić je na fletno kupila komačec zemle na Matijaškinove vulice, od vrovca Matečića Franca ki se priženil k Mrmlekove čeri Lubice. Matečić se s familijum preselil v Votofčec, de nekteri negvi još i sat živeju. Stari Franc i sin mu Franc su pomrli, tak da na tem mestu kam su otišli sat žive Francova sneja Slava z sinom. Drugi sin Franca Matečića Dragec je naredil ižu na mestu kak su otpočetka imali vrt. Čak je jen komačec i prodal nejakvemi strajnskemi. Kak su se za onda ludi već počeli zapošlevati v državne služba, tak si je i Janić našla posel od teroga je živela i ižicu si obdržavala. Nigdar se posle ni vdavala, život je skromno i pošteno preživela, pomogla komu je kaj mogla i na kraju je dveiladešeste mrla. Najviše i z veseljem je pomagala župnikom ki su devedesete počeli služiti meše na Mlake. Med prvemi je bil vlč. Šoštarić ki je sat župnik v Ivancu, onda vlč. Ivek Hruško, pa vlč. Tonček Grahovar, vlč. Tonček Sente. I za druge kapelane je imala osećaja, a valda zato kaj je bil prognanik posebno je suosećala za vlč. Juricu Jerneića.

Drugi sin Ivića Pažulevoga, Jure Gibajnaka brat, zval se je Peter. Toga se čoveka i negve žene Kate ka je bila od Matušine Čačkovićof sečam koj v megle. Oni su živeli v Dolencu. V nijovu se iŽU moglo dojti poputeku ki je bil med ižami Pepeka Dušekovoga i Jurčekovum. Ja sem te puteke znal tuliko kaj smu tut išli na Gmajne ili na Goričnicu de smu zemle imali. A negda je tut čez Dolenec bil ulaz v selo i ta se cesta navažala z šudrom. Jeno leto je i nas dopalo da smu tu dopeluvali šuder, čak z Jakuševca. A moral si dopelati tuliko kubikof šudra kuliko si imal rali zemle. Tut je negda bil ulaz na Mlaku, ovak kak je sat ovaj po Kramarićove vulice. Kuliko mi je v glave, te lude, Petra Kunića i negvu ženu je do smrti doranil Štević Novosel, Juristin i Pajute Miška brat. Kak on ni imal potomka mislim da je na tem grunteku nuka negvoga brata Juriste naredila ižu i da tam žive. Ak ovo ni najtočneje, nek mi ne zameriju i nek mi javiju kak je točno.

Trejti sin Ivića Pažulevoga zval se Tomić. On se priženil negde na Odru k žene ke su govorili Cvila. Kuliko mi je f sečajnu od onda kak srnu pedesettrećečetrtepete išli na veronauk na Odru, nijova iža je bila polek vatrogasne gasilane, ozde kak je i sat. Jeli su ili nisu imali potomka neznam. Čini mi se da nisu imali. Sini toga istoga Ivića Pažulevoga Štević i Miško su zarana otišli skup z ocom v Krajnsku i ojnemi neznam niš.

Osim te pet sinof, Ivić Pažulef je imal i dve čeri. Obadve su otišle v Ameriku. Milka je zela Ivića Krilčića, brata od Janića Krilčić Frfle, a polubrata mega teca Šimića Krilčića Štefanovoga. Druga Ivića Kunića čer po imenu Luba, zela je mega strica Evana Makovića. Kat je pedesetsedme stric mrl, v negvu je ižu došla živet sestra Milka z mužom Ivićom Krilčićem. Iza stričeve smrti, zgubila se veza s vulicum River strit 3223 v Čikage Ilinojs D.S.A. Za strica Evana teroga sem ja videl samo na slike znam sigurno da ni imal potomka, a za ovoga Ivića Krilčića i Milku nis siguren.

Zajdna iža k ke se po Pažuleve vulice došlo bila je iža Jage Pažuleve, sestre od Marka i Ivića Kunića. I Jagu i nejinoga muža Blaža Miletića sem poznal. Ne baš nekaj, ali ipak onak, tak-tak. Blaž je po pripovedajnu mega izvora bil štandar ili točneje žandar. On se k Jage priženil. Otkut je točno bil neznam. Znam da ni po našem govoril. Bil je kaj se govora tiče dosta onak rječit čovek. Rad je pripovedal i znal je kaj govori. Kak nisu imali svoje dece, posvojili su si Mikića, sina Blažovoga brata odnekut z Vojvodine. Tak su pripovedali. Bole se sećam, a to sem već i pisal kak srnu se koj mala deca držali za šaragle i bežali za bagrlinom s kern se Mikić po ženu Marića na Odru vozil. Na Raškom putu srnu se se otrgli od kol. Mikić i Marić su imali sine Števeka, Božeka, Tomića, Jožeka i Jureka. Život su pošteno i mučenički preživeli. Marić je leta delala v Mlačke škole koj podvornica. Poradi toga kaj je bila dobre naravi i rada svaki posel dobro obavila, v škole su ju rat imali. Ni bila v leta kat je mrla, tak da je još dost dugo Mikić koj dovec bil sam z dečki. Od se dečkof ožejnen je jedino Božek s Katicum kaj je veliju Prjnka, a od ove druge ni nijen. Nažalost, Števek je betežen i već puno let saki dan ide v Zagrep na dijalizu.