Zove nekuliko rečenice se more razmeti a ja i pametim, da život ni prede, a niti sat ne miluje tu familiju. Onak mi se koj pričijna da je pokojna Jaga Blažova bila koj zavržek med Pažuli. Nejakve razmirice med braćum su bile, nu bil sem premali da bi to za onda razmel. A za rezmirice, mislim si, ni bilo razloga. Jen razlog je bil taj, kaj je našem ludem bil smešen saki ki je drugoč pripovedal, a posebno onaj ki je šire spoznaje ojdne imal. I po govoru su ludi bili obileževani. Teško se bilo prifčiti na čoveka ki je drukčeje govoril. A opet, i ovomu ki je došel ni bilo baš prelepo. Možda su se ipak leže prifčili a i bole prifačeni oni ki su došli z kajkafske krajof. Blaž je po govoru bil dalmatinec, i više svecki čovek.

Ne sećam se točno leta, ali nebum puno falel ak velim da su Blažovi med prvemi f selu imali radio. Po pitajnu pridošlice f selo, od onda do denes se prinami ni puno zmenilo. Ja to posebe vidim. I mene se čini, če smu baš v dvajsetprvom veku, da se preveć ludi doteplo vuvaj kraj, pa tak i na Mlaku. Na takvo rezmišlajne me nuka Božja reč poke bi čovek trebal „ rasti i cveti tam de je posejan“. Točneje, živeti od zemle i na zemle s tere je narejen.

Pote filozofije se nebi sela praznila, ka su se vuvo vreme cela, a negde su se i celi kraji radi selejna spraznili. Ne baš saki put, negda se seli i z nužde. Rat i sirotijna znaju potirati čoveka na selejne. Po terom od ovoga ili mort po dekretu službe Blaž je došel vuvaj kraj. Već sem zajdni put spomenul da je bil rečit, kaj po dalmatinske naravi, a kaj i po nekuliko razledof škole. A malo bistreji čovek, pogotovo ak je bil još i načitan, ni pasal tupanom ki su bili na vlasti v stare Jugoslavije i teri nisu mislili, nek su samo zvrševali ono kaj jem se zapovedalo. Kak za stare Jugoslavije tak i za one druga Tita, oni ki su nekaj znali nisu baš saki put sve smeli reči. Negda niti pisnuti. Ak su kaj rekli, vrešt žnemi. Zaradi svoje pameti i poštejna spaštal je Blaž, a pojnem je i negva žena Jaga bila bomeć obiležena. Ni nijov posinek Mikić komu smu govorili Blažof, ni bole prolazil. Kad se zmislirn, mesto pomoći i razumevajna od svoje najbliže, ojdne i od pospanoga selskoga plemstva redovno su bili prezirani. Od vlasti pak posebno šikanerani i po rešte vlečeni. Nu dugoročno gledeč dragi Bog je ni ostavil, ni dal da se loza zatre. Ona i dale žive v našem kraju po Mikičovemi sini.

Kak sem zajdni put rekel, tu rabru obitel Mikića i Marića rodom z Odre od Zubakove, dragi Bog je nadaril z pet sinof. Imati tuliko glaf dece pri iže, ni bilo za onda niš leže nek je i denes. Ja se ne sećam da su ovi ludi nad životom jafkali. Iz lubavi su decu dali na svet. I onda koj i denes, pretežito jafčeju oni ki imaju po jeno dete. Nisu ni oko socijalne pomoći fektali, ke doduše za onda ni ni bilo.

Kat se iladudevetstodevedesetprve pokazal rat, Božek se opet našel na udaru med prvemi. Dragovolno! Zmed druge i nemu za falu, puno je ne nezasluženo dobilo peneze, slavu, društvene položaje, a nekteri i vojničke čine. Siguren sem da jem on natom ne zamerja, jerbo on premišla drukčeji način života.
Dok se oni veseliju ovozemalskomu, zgrjnaju peneze, fuliraju našemu narodu ki se još navek od krafskoga repa ni meknul i misliju da je iža katnica i železne špice okojne bogactvo, on je svoj život predal v službu pomagajna drugemi. Vutom je spoznal bogactvo ne za ovaj, nek za onaj drugi svet ki nas sve čeka. I traje večno! Pomaže tam de sat žive, a pomaže i svoje braće ku mi drugi slabo poznamu, a i ne pitamu zajne. Klicu dobrote nasleduval je po svojemi siromašnemi, ali poštenemi roditeli, i siguren sem da ga nebu sram kad se jenoga dana budu oči v oči, v duhu gledeli.

K Blažu se moglo dojti po putecu suprot škole, vuz Jure Gibajnaka vrt. Sat se već stoposto ne sećam jeli se morti tut jedino i išlo. Taj putec fpira v ižu Tomeka Rendulića. Vuto vreme, iladudevetstopedesetešezdesete pred školom je bila praznina, Pažulevi vrti. Do Tomekove iže i iže vuke sad žive Janek Tušak, čer Franceka Krilčić Špektorovoga, z mužom i decum, je bilo blato. Zajnemi je dale samo vijugala polska linijica, do linije ka je sat Velikomlačka vulica. Ižicu vuke žive Janek je prede šezdeset let sklepal sin Marka Kunić Pažulevoga, Tonča, i vujne živel z ženum Katićom i čerjum Barekom. Se dotlem dok se ni nastanil na Gorice, na grunteku i v kuplene ižice, za cirkvum. Katić je bila sestra Mikića Novosela, Sarinoga, pak su i ne potom tak govorili, Sara. Barek je poput matere bila visoka deklička, jedinica. Kat je dozrelela, k ne se priženil Jožek Hermanović z Vukomerića. Tonča i Katić su pomrli, a o ovemi "mlademi" niš dale neznam. Još dok smu mi, ja i moja sestra Janica išli na Mlaku f školu, tu ižicu doduše zidanu od Tonče je kupil Francek Špektorof kad su Špektorov grunt podelili zmed brata Iveka i sestre Mareka. Ne su dali špičujnek na Špektorovom gruntu, a setra Milka je već bila pri Štefcu v Dolence. Francekova žena Barica je bila čer Jankića Cundekovića Išćevoga, z male drevene, ali blagoslovlene ižice na Išćeve vuličke. Denes se ta vulička zove Matije Gupca.

Mi smu si govorili kume, jerbo je moja mama bila fermana kuma Barice, a puno let kešneje sestra Janica je vezala fermu Janeku. Eto tak! Do nijove ižice je bila mala, isto zidanica, z črlenum fasadum spomenutoga Tomeka Rendulića. Ja nega nis zapametil. Sećam se samo da su zajnega rekli da je bil sin z veze Rokičke poke je nosil prezime i Jože Glagolića. Pametim Tomekovu ženu Danicu, ka je, jer je Tomek rano mrl, bila dovica. Imali su dvoje dece. Stareja je bila čer Lubica, a mlajši je bil sin Branko teromu smu govorili Dundo. Ja niti do denes neznam otkut je Danica bila, ali se za života navek lepo spominala, i bila je onak, fina žena. Više koj gospa. Oni marve nisu nijakve imali kulko se sećam, možda samo kokoši ili kaj takvo. To je bilo oko iladudevetstopedesetdruge-trejte. Do denešne dani vute iže su se stanari mej nali. Kat se Lubica vdala nekam v Slavonski Brod, tu je živel Branko z ženum i decum se dok si ni naredil veliku zidanu ižu v vulice Hrvacke mladeži. Sad vujne žive Lubica ka je v međuvremenu odovela i žnum čer Vedrana. Prezime jem je Radotović.