Nu, zonem kaj sem ja zajdni put o Vučitelu Vinku Jurkoviću i negve familije napisal, ni se rečeno. Onda sem ga spomijnal koj vektara i po velikomu znajnu spametnoga čoveka. Mene je za onda, a i potle, i još dendenes me zadivleva kak je on v sirotijne, i samo ze svoje ruk i svoje glave otranil i zeškolal pet komadi dece, a naši domaći ludi ki su ipak sega više imali, su se bojali imati više ot jeno ili najviše dvoje glaf. Pak ni valda već za onda dok se još jela zdrava selska rana tuliko žen imalo slabe pantleke. Zgleda mi da je bela kuga oke je župnik propovedal načela i naš kraj. A znali su se naši ludi prčiti kak smu mi Turopolci, i plementaši, i z vrbarcof ki se nisu imali niti de poscati komediju delati. A vrbarci če i siromašneji ipak su više držali do strava Božega i pojnemi je opčuvana jezgra i na Mlake i v okolne plementaške sele. Sećam se kak se govorilo da su nektere žene napučevale nektere druge nek nimaju dece i tak su je napeluvale nek narediju čedomorstvo, greh. A i denes kak i onda, svećenstvo i nekteri ludi ki podržavaju cirkveni nauk vučiju, da je posejano zdravo seme budući rod. E sat, je li bu posejano na kamen, v živicu ili v dobru zemlu o tem ovisi je li bu ili ne bu žnega kaj zišlo. I prede i sat s takve propovednikof se smejeju. Čak i oni ki idu fcirkvu. Zato su one žene ke su one druge napučevale na čedomorstvo v grehu i nimaju svega mira, a puno put ne daju ni onem oko sebe. Bože milosrđe kat dojde taj čas nek jem pomore.

Za našega vučitela i negvu dragu gospođu Ludmilu ki nisu imali papere da su plemenitaši ili da su vrbarci, ili Turopolci, morem reći samo da su od noge naše ludi imali boli kršćanski foldument. Siguren sem da nem ni na kraj pameti ni bilo delati takof smrtni greh. Oni su već za onda prakticerali brojno i odgovorno roditelstvo. A sigurno jem ni bilo lefko živeti s petero dece i otrajnevati samo z vučitelovum plaćum ka je za onda bila otprilike takva kakve su i denes.

Dragi Bog jem je dal snagu i tuliko sega dost za život da je ipak nekak išlo. Če je baž život i ni miluval, vučitel Vinko je doživel jesen života, dočim je gospođa Ludmila mejne. Fčem je bil nijof recept? V skromnosti i lubavi spram daruvajnu životof! To je ono kaj dragi Bog prizna i preporučeva, a ludi preziraju. Kuliko put smu se mi doma ili kat bi se znekem na putu zestal znali spominati kak naš vučitel ima pokrpanu majcu ili stiskom zašite lačice.

Nu, če je roba najnem bila pošita i pokrpana, on je sejeno na sugovornika ostavlal utisek Gospona. Negve reči i negvo držajne bilo je jače ot krpe najnem, a če i pokrpano, najnem je navek se bilo čisto i dišeće. A ni za onda bilo niti faksa niti rubela, niti vešmašine. Gospođa je ne dva i su decu vret metala, tak da su navek imali čišće nek nogi odnas selske dečurlije.

Negda je jeden od đakof bil koj redar i pregledal je celi razlet jeli do ima vuši na glave. Bilo je vušive i dekel i dečkof. To se pripisevalo kumeru kakof je bil po iža i štala. Morda se varam, nekak mi se koj pričijna da su otpočetka kak sem ja krenul f skolu i oni imali pajceke f stale, i purice i kokoši v jenom dupelcu ot štale. Štala je bila nekak ozde za ovem križom ki je narejen na spomen hrvackem branitelom, desno, prama Đinekovomu plotu. Veće marše, koj naprimer kravu ili kojna, nisu držali, samo ovu živinu drobnoga zuba. Nu, f štale bi znal vučitel odvrći i one svoje milenike ki se nisu šteli vučiti ili su se žnem trucerali i bili mu neposlušni. Živi su, i budu se toga setili. On to ni delal niti z mržne niti od osvete ili žele za kažnevajnem, to je jenostavno vuto vreme bila praksa za disciplinerajne trdoglavcof i lenčine. Med temi kažneniki su bili samo negvi dečki. Nas druge, ak je teri bil zločest, moglo je dopasti klečajne pret pločum i šiba po prste ili po riti. Najfineja je kaštiga bila ak te je povlekel za vuho ili pocuknul za lasi pri vuve. Onda si se lepo polefko nadigal na prste, onak kak je negva ruka isla prama gore. Sećate se? Se je to delano za naše dobro i ot toga ni nikomu niš bilo. Ak bi vučitelu Vinku negdo i štel pripisati kakve falinge ke je poput sakoga odnas imal, ono dobro ko je ludem delal je spram toga nemerlivo.

Ma, i v denešne se vreme deca zeškolaju i postaneju vučiteli ili vučitelke, ali samo retki su i Gospoda. Naprimer, puno denešne vučitelof po kletvami ne zaostaje za onemi niže rangeranemi staleži vuke su negda računali kučijase. Kučijaše su nasleduvali traktoristi, šaferi. Vučitelke se mažeju poput lafre. I jeni i druge koj da su spram ondešne vučitelof preveć okrenuti od svega poslajna. Glediju zasebe, a nijovo poslajne je daruvajne sebe drugemi. Segde i stalno, dok su živi. Poput časnoga svećenstva. Fali žrtva, skromno služejne v poniznosti. Za skromnost i poniznost v denešne vreme ludi pitaju kaj to je, a kat veliš da je to, primerice, pater Cvek, onda se podsmejuvaju. Skoro si. I oni ki i ideju kak i oni ki nejdeju fcirkvu. A sat se vučiteli školaju točno za ovaj ili onaj predmet vučiti. Vučitel Vinko je bil erudit, kak se to veli za lude ki puno i opširno od sega znaju. Do se od nas ki smu bili negvi đaki ne seća negvoga prelepoga pisajna. Tenka crta gore debela crta dole. Za takvo pisajne se reklo krasnopis. I ocena se za pisajne dobivala. Za domaću zadaću si z krasnopisom moral prepisati, primerice, o caru Dušanu i carice Milice, na tri stranice, ili na više, možda na pet ak si bil slabeji v pisajnu. Kakvo je sat drlajne i črčkajne, po papere vidimu! Samo andrajne i se na oruk. A tak je i v glavami. Niš ni bogznakaj sređeno ni smireno. Se ti muka dojde kat vidiš taj jad. Dok se dete ili mladi čovek vučil pisati, moral si biti smiren, jerbo ti bi inače crte od slova pobegle šrek, levo desno, a ne točno pod kutom kak je bilo pravilno. Već odmala se potem najbole videlo fkakvom su stajnu čiji živci. Jer ak si zifčen ruke su ti drfturile. Do te denes zato pita. Samo se viče ni ovo važno, ni ono važno. I tusmu desmu. Nu, ni krasnopis najvežneji v životu. Vučitel je nas vučil i stvari ze života.

Ovaj komad zemle nakom je škola je negda bil skroz do ovoga puta kaj ide ot cirkve prama Pažule. Z drevenem plotom je bil ograjen, a tu de se pret ambulantum ostavlaju avuti, tu je bila pumpa za vodu i kopajna. S pumpe se voda pumpala i reznašala po vrtu. Zalevalo se rože i povrće za vruće dani, dok ni opala kišica. Na ovemi komadi de je ambulanta i ova iža vužnu negda smu kukuruzu okapali. Kešneje je tu narejen gol ot školskoga igrališča, totek, kak je sat iža ot Paveka Bradašićevoga nuke. Puno put smu bili srditi kat se lopta počesala po cimenteranom plotu teroga je Pavek naredil i pokom je pometal steklovijne i rezdrapila se. Negda nam je loptu znala zeti Jelič, Pavekova žena ili Gradica, ke se reklo stara majka, jer smu kakti po greda kvar delali. Ne znam točno na teri način je taj komat ot školskoga dvorišča, i ovaj kak je sat dvorišče ot farofa Pavek Krilčić sebe prepisal. To je negda se bila selska zemla, i potpadala je pod selski juš. Kak onda, i sat ni drugoč. On ni bil jedini. Bil je samo jeden od one ki su grmeli da cirkve treba zeti se do praga. Navek je bilo takve ki su lakomili. Za onda jem je zemla trebala da se budu imali na čemu više mučiti, a v denešne vreme jem treba da budu opskrbeli decu ili nukeke i nučice da budu oni imali kaj od dedovine restepati.

Ne sećam se točno je li se zato vreme kat smu okapali reklo sat ručnoga rada ili tjelesnoga odgoja. Na temi sati nas je vučitel vučil o vrednosti vode za naš život i o važnosti sunca i topline za napreduvajne sega kaj čovek v zemlu poseja. Vučil nas je i otom kak se dobiva vapno i kakva je se ojdnega korist. Si se sećamu vrčaka pret školum i rože ke smu sejali, a kat su zrasle onda okojne pleli drač, okapali je, a ot staroga cigla slagali rubnake vuz stezice po kemi se hodilo. Kak got on bil dober, ipak nas je sako leto zastrašilo kat je najavil da bu došel školski inšpektor. Ne sećam se točno do je jeno leto na zaprežne koli dopelal inšpektora z Gorice g. Šura. Mort je to bil općinski kučijaš, ovak kak su sat šaferi ki glavešine rezvažaju v avute. On je sakoga odnas nekaj pital i znašega znajna je mam videl kuliko nas je vučitel nafčil. Kak sem stareji, dojde mi žal kak se nismu spram vučitela ponesli kak treba, bar onda kat je doma ležal betežen. Nogi ga nisu došli niti pogledati. Nemu ni niš trebalo osim lepe reči, tere se raduje saki čovek, pa bi se tak i on. Ja se vučitelu Vinku zafalevam za saku žrtvu ku je za naše selo naredil. Ono mu je zafalilo tuliko kaj je jenu slepu vuličku pojnem nazvalo, a moj je predlok selske uprave bil onaj koga sem prede spomenul. Još je važneje da molimu Boga za negvu dušu, k tere se budu i naše jenoga dana pridružile.