Za onda ni naša Mlačka škola imala niti posebnoga igrališča niti nejakve sportske rekvizitof. Fiskultura se sprva obavlala vane, na dvorišču, mam vuz kak je bila pumpa za vodu. Ak je bilo lepo vreme, igralo se mačke i miša ili graničara. Dekle su se znale igrati škole, a kat je zmišlen plastični rajf igralo se žnem hula–hop. Tak se reklo. Rajf se vrtel oko pasa, bilo je važno da ga vrtiš čem duže. Kat se vučitelu zapovedalo da mora vrt zapustiti i on je tak naredil, onda je najnem narejeno malo igrališče ko je bilo za nogomet i za rukomet. I goli su narejeni kak treba, od nejakvoga prutja. Onda je rečeno zbogom botanike, oke nas je negda vučitel znal naširoko vučiti. Za nekuliko su let počeli drugi vetri puvati, došel je drugi duf. Počeli su prihajati vučiteli drukčejega mišlejna o svetu, teri su po finote i znajnu dalko zaostajali za nam dragem vučitelom Vinkom Jurkovićom. Nu, nemre se baš za se reći da nisu bili dobri. Nisu ni oni baš si došli po zadaće prisluškevajna, ni po drugom črnom poslu, ali se ipak dalo primetiti da ti vučiteli više vučiju, bumu rekli, po ideje bezbožničke, a ne onak kak se treba vučiti.

Naprimer, povijest ili hrvacki. Na nekteremi se primećuval nejakov duf ki ni bil koj duf naše ludi, niti našega kraja. To je počelo tam negde pedesettrejtečetrte XX.stoleća. Jeli prvi ot te vučitelof ili drugi, ne sećam se već točno, za vučitela je došel Svetozar Vulić. Otkut? Neznam! Zajnem Radojka Vujović, Mato Belobrk. F četrtom razredu mi je razrednica bila Nevenka Tomec. Nektero krajše vreme je vučila i Nevenka Majsec, z Jakušefca. Jakuševečkoga župnika Josipa Majseca brata čer. Nejak smu leže dihali kat su nas one vučile, one su hajt bile odozdek, našega duva. Najnemi se videlo da su duva ki je nam bliže. Potle sem videl i spoznal kakvo je to vreme bilo, ali i kak je i tem ludem bilo. Morti bi oni bili drukčeji da jem ni partija ke su se šteli klajnati takof straf za vrat dela. Sat se tekar nakon pedeset šezdeset let more rezebirati kakovo je to vreme bilo i komu se služilo. Prinami se zapraf niti jos ne otkriva se zlo toga časa kak v druge država. Tu se još dendenes zlikofci i ubojice mednami slobodno španceraju, i ni jem niti las zglave, radi zla tero su naredili, opala. I penzije dobivaju. Još navek se najlepši placi i vulice v nekteremi grade zoveji po temi barabi. V Nemačke i Polske čak i precedniki su završili v rešte. I to na fajn let.

Sećamu se kak je v Rumunske zišlo. Kak je se prinami zvrnuto, tak je i to. Prinami se sat loviju ovi ki su nam priskrbeli da imamu svoju Državu i da smemu po svojem jeziku govoriti. Kriminalci tiraju tem v Hak one ki su vojuvali, i svoje živote mestojne podvrgli. Nekteri ote su tak na visokemi položaji, da čak i strajnski ludi knem dohajaju.

Lepo se v miru toviju, samo jem nosi otečeju i dropci rasteju. Lače nemreju zakopčiti ni rubače potkopčiti. Vlast su! Eto, kaj ni to slično onomu od prede pedeset i više let, kat su isto tak gladni stirali site. Većina je hrvacke ludi sejnala da bu lepše i pošteneje. Nemre prinami drugoč dogot se služi lucke taštine, vuke se čoveka meće na mesto ko pripada nekomu većem ojdnega. Onomu, ki ga je stvoril. Tak je bilo, i nažalost ostalo!

Prvo kaj se zestalo kat si se vraćal ze škole je bila cirkva. Jeno vreme nas je držalo da smu posle škole išli hodit po cimenteranomu foldumentu ki je oko cirkve zbočen, a kat smu se zasitili toga, onda smu hodili po cirkvenomu plotu. Plot je okolo naokolo imal po gore zabite deske i moglo se bes prekida pojnem hoditi. I vrata ka su de i sat, ist su tak imala. To je trajalo dok nas ni kum Jura ili kuma Janič Kolaričkini zagledali. Revni čuvari cirkvenoga imutka, našpotali bi nas, i otut restirali. Po dogovoru smu znali domom torbe odnesti i vrnuti se natrak. Ozde de je sat ulaz na farof, tu je negda bila trava z mravijnaki, i pojne se moglo igrati nogomet. Se do onda, dok ni taj komačec i jos veći komat se do Pažulof, Pavek Bradašićef z merniki zmotal zasebe i natom vrt naredil. Onda smu se z nogometom preselili f cintor, kak se za cirkveno dvorišče reče. I tu smu opet imali iste neprilike kak i na školskom igrališču.

Jenput mi je Jelič Pavekova odnesla torbu z knigami i morala je mama pojnu knem domom iti. Kaj je bilo? Lopta je preletela na kakti nijovo, a ja sem, rekli su, pogazil grede z šalatum kat sem po loptu išel. I to je bilo tak! A, kak je sat? Sat su oko nas nejakvi drugi ludi i druga kultura. Pitam dečeca ki bere črešne ili slive na mojem vrtu da do ga je poslal brat. On mi veli da ga je mama poslala. Pitam ga jeli zna čije je to? Veli da nezna, ali mu je mama rekla da je od nejakvoga dugoga čoveka ki mu nebu niš naredil. Pa pita se čovek tera to mama ide svoje dete poslati po tuđe. Pa doklem je to nasilje došlo i de je kraj? I ajde, kak sat usporediti ono jemajne torbe i strašejne radi gažejna gret, i ovo, kaj je zapravo napućevajne na krađu. Al ovi ludi to tak ne doživlevaju. Ova zemla oko farofa bila je negda grambava, dok ju ovi ki su ju obdelavali, nisu fajn poravnali. Od puta se prama severu spuščala v prevalinu, a kraj je bil otprilike meter-meteripol zdigneni. To je dale bilo Muženićevo. Prevalina je na levo išla do pot Pažulove iže, i oni su ju zvali Pod bregom. Išla je ona pred stotinu let i dale, prama Reliću, ali su ju tam dale ludi obdelavali i stem se automacki poravnuvala. To je zapraf najverovatneje bila ta graba poke se Mlaka tak zove. Na desnu stranu je išla do mosta na Muženićovo dvorišče.

Uf, znala je biti zapujnena zvodum tak, da nas je bilo strah jerbo su stalno govorili: sat se ozde ftopil ovaj, onde onaj. Kaj se vodostaja tiče najlepše je bilo na prelazu z jeseni na zimu. Onda se voda smrznula i naredil se led pokom smu se sajnkali. Da bi se cipele mejne drle, išli smo k šoštaru Luke Fajneku ili Pavlu Benceku da nam zabijeju odozdola cveke ili bar špicpleje. Od proleća pa do jeseni to je bil raj za stotine gusek i rac, ke su se čak od črdaka dogegale i tu uživale. A na večer se s te zabokrečine čula pesma tujnkačof, kak se spominaju i lubaf dogovarjaju. V ravnine kak je sat farof, samo izajnega, na sadajnem Muženićovom vrtu, bila je drevena iža. Žene ka je vujne živela su govorili Bela. Mislim da je to bila Lovreka Bradašićevoga sestra. Bila je vzamuže pri Petru Cvetkoviću, na ovem gruntu ozde de je sat Danica Pepeka Đinekova.

Mene se to možda samo pričijna ze spominkof, a se više mislim da ja tu ženu nis nigdar videl. Kam su stem drevjem ot iže, neznam. Možda si je Jurič Muženićof k štalice pridodelal kakvo dupelce, kakof obor za svijne ili paritek? Možda! Nekak mi je v glave kak se jemput više nas sajnkalo v grabe i negvomu Iviču negdo je rekel Idi. Jurič je to zel za žal, i najemput zletel iza ove sukašnice ka je još i sat, i mene ki jedini nis pobegel, klel i tukel.
Denes bi se radi toga odma išli zvat plavi telefon. Juričevoga oca, teromu je bilo ime Peter, ja nis poznal. A kak i bi, kat je on vubit v drugom sveckom ratu dok mene još ni bilo. Koj deca smu gledeli sliku Petrovu, brkastoga čoveka, na partizanskomu spomeniku ki je za onda stal ozde na Putine, de je potle narejeno igrališče, a sat se zove vulica Napredak i natom mestu je dućan – diskont. Nam je bilo nekaj gledeti te slike, jerbo za onda slike još nisu imale tuliko maha po grobju kak sat. To su samo bogateji kelili. Ne sećam se natom gruntu Juričove mame Mariča, Muženičke, ka je natom gruntu bila vdana za Petra. Nemrem dokučiti niti kak je, otkut i da to prezime dospelo med mlačka prezimena.

Kat sem delal v Gracke Mujnare, upoznal sem jenoga Zagorca ki se prezival Muženić. On mi je rekel da je v Kojnščine ima dost stem prezimenom. Tak sem skonstrueral da je mort pradet ili čukundet Petrof negda služil vuvom kraju, i tu ostal. Prama Turopolskom letopiscu, prezime Muženić se met prvemi na Mlake spomijna.

Žnemi smu izravni dodir imali na zemle Podovčice. Celi vugel te zemle je bil od Tomička Štefanovoga. Po delbe je del pripal Vidu, sinu teroga je Tomiček imal z mojum tecum Dorum Makovićevum, a drugi del dece ku je imal z prvum ženum Beničkum: Šimiču v Amerike i Mariču Muženičke. Na molbu teca Šimiča, prikom je moj tata v Amerike živel pet let, tata je četrdeset let obdelaval negof tal. Kat se počelo naslućevati da se bu ta ral mogla unofčiti, došla je Marič z nejakvemi paperi navirat da je je tu zemlu brat daruval. Bez otpora i suda na teroga su me nekteri napućevali, ja sem, jerbo mega oca već ni bilo živoga, zemlu prepustil ne na uživajne. Kuliko mi je za videti, oni kem ju je predala nisu se najne baš pretrgli, a čak mi se čini da je završila onak kak se naslućevalo.