Lani se brojilo 680 let kaj je po Nikole, sinu Nikole sina Petra z Mlake, prvi put spomenuto naše selo. Prezime ovoga plementaša nis zapazil, barem vuve knige teru sem čital. Je li su ondajni zapisivači išli ot iže do iže, ili su jenostavno pri župniku na Odre zeli matice, to mene ni poznato. A ni niti važno.

Popise ke su najviše delali kanonski vizitatori z Kaptola, nem trebamu dati falu za spoznavajne naše korenof. Iza 1326. leta Mlačani se v povjesnice ovak po prezimene spomijnaju:

V iste knige se more prečitati da je v velikom ognu, oko polovice XIX. veka zgorelo puno dvorof mlačke plementašof, a i sirotijnske ižice vrbarcof. Zapisano je da je drvena zgrada cirkve Svete Barbare ostala cela, koj i vužnu općinska komara i školska hiža tera je bila otprilike na ovem placu kak je sat farof.

Neznam kak je taj ogen počel, i ščem je gaševan. Za pretpostaviti je da se vužgalo od groma, i da je gaševan z vodum, ke je sigurno bilo f sake grabe. A grabe i mlake po kemi se naše selo tak i zove, bilo je na sakom koraku.
Za gašejne bi se ludi poštantali jen vuz drugoga, zelo bi se škaf ili grohaču kaj bi već bilo pri ruke, zagrabilo vodu, i jeden drugom bi podavali z ruke v ruku. Spomenul sem posudje ko je bilo dreveno, jerbo za onda osim takvoga je moglo biti narejeno još od zemle, a to je bilo prekrfko za takvo delo.

Z čislom škafof naredil se zapraf mlaz vode, s kem se poput potoka ki teče ogen poleval. Verojatno je vuto vreme već negde po svetu i bilo pumpe ke su pogajnali motori, na vodenu paru. Ja si mislim da su za onda to mogli znati jedino svećenstvo i vučiteli. Oni su po svetu putuvali, mejnali sela i atrese, bili načitaneji ot naroda. Ojdne je najverovatneje pokrenuto i to: kak bi bilo dobro imati nejakof stroj, pumpu, s tere bi voda stalno i stalno stekala! Ak je v mojem detinstvu bilo tak da se župnik ostal negda i jenu vuru posle meše spominati z muži o gospodarije i o betegi ki su napadali blago i lude koj i denes, tak se pretpostavlam i prede sto let, 1907. leta, jena skupina mlačke mužof otkuražila da se bu na zvon s cirkvenoga turna, ili na trublejne trube dragovolno javlala na mesto de bi se kaj vužgalo, štala ili iža. Za onda je većina stajna bilo dreveno i šopom pokrito, tu i tam tera iža je bila z cigla zezidana i z črepom pokrita. Ja nis tak star, ali pametim da sem koj dečec f čudu gledel ondešne vatrogasne pumpe.

Prama staremi knigami, koreni mlačke pogorelcof Glagolićof sežeju v 1520. leto, ali v Vukomeriću. Po mojemu mišlejnu, oni se i jesu otut z bregof spustili na Mlaku. Prezime Glagolić se ftem obliku na Mlake spomijna 1782. leto. Lepo bi bilo, i točneje kat bi čovek imal čas i otišel malo pregrnuti župne matice v Dubrajnec, kam Vukomerić i den denes potpada. Onak, kat si bole zgruntam otkut sem, i otkoga sem, dojde mi f srcu milo. Vidim i osećam dobrotu Božu prama mene celi život. Taj breščec v Vukomeriću je na najlepšem mestu v ne baš tak male Vukomeričke gorica. Sežeju vuz reku Kupu ot Pisarovine na zapadu, do Letovanića tem pri Sisku, na istoku. Tam se smirevaju, i moć predaju kupske doline. Z juga one natkrilevaju poduž celo turopolsko pole i ves gorički kraj. Moje premišlajne je li se naš predak spustil na Mlaku baš otut mi zapraf da i to kaj se vrh brega v gruntovnice zove Glagolščak. Zgleda koj jen cofek na kapice oko teroga se po celi den toplo sunčece vrti. Z kleti koj na sake od ruke vidim dubrajnečku cirkvu Gospe Snežne, a na grobju pojdnum onaj ki ima malo bole oči skoro da more prečitati ime pokojne. Zemle na tere je grobje se reče Mrhunke. Kat sem teri put koj dečec spal fkleti, odonut smu poprečke, vuru hoda išli kmeše v Dubrajnce. Ak bi išli okolo čez Čubačku, bilo bi i dve vure hoda. Po stezami poprečke je znalo biti grdo, naročito ak bi se išla na friško potle kiše. Naročito na jesen ili v proleće, onda je bilo fest blato. A zemla ilovača se lepi za cipele, a po letu ak ideš bos zajde ti blato met prste na noga i mesi se.

Osim melena, teri je bil na struju, a opsluževali su ga Lackovići Jedani Todekovi, f selu je to bila jedina tehnika ku su koj svetijnu samo vatrogasci držali. Mlački su vatrogasci kuliko se sećam imali jenu pumpu z jenem, i drugu z dva cilindere. Pogajnali su je ručno, ili kak se to veli, na žgance. Potlem, fajn let kešneje, govorilo se da jem je Goričko vatrogasno društvo dalo pumpu z motorom teri je išel na benzin. Denes si more saki kupiti pumpu kakvu oće i spumpavati i prelevati kuliko oće. Za mega dosadajnega živlejna ognof je bilo po celom selu. Najveći je onaj bil kat je Paveku Krilčiću Bradašićevomu štala zgorela. Ki su ot Pažula gledeli, videli su kak se ognena strela odbila od gromobrana na cirkve, i žnega odletela ravno na Pavekovu štalu. Taj je ogen koštal života jenoga Goričkoga vatrogasca ki je išel tem v štalu da bu krave oslobodil od lancof. Na glavu mu se vrušila nagorela prosnica, i na mestu ga vubila. Čoveku su, čini mi se, govorili Đimbrek, a po prezimenu je bil Šipušić, ili morda Hrvačić. Hajt, potlem toga ogna ni f selu više bilo veće ognof, bar kaj bi ja znal. Jedini ogni su nastajali v glava nektere mužof oko Martijna, kat je već mošt dobro otkipel i rezal v grlu i pamet v glave mutil. V onem ognu oko polovice XIX. veka kaj ga knige spomijna povjesnik, zmed ostale ognof pogorelo je i stajne mojemi pri Glagoliće. Odonda, pa do stare Jugoslavije, nijova iža i Vajngetarovo stajne je f selu bilo jedino od cigla zidano i z črepom pokrito. Nu, to kaj je iza bila zidana ne znači da vujne ni bilo bokčije kak i pri drugemi ižami. Jedino je lušneje bilo to kaj su stene bile ravneje i z vapnom pomalane, spram drugemi, drevenemi ižami ke su z troftinum i krafskem drekom bile zapucane. Vute su iža stene bile grambave.

Puno odonoga kaj sem i znal sem pozabil, a o svemu tomu puno su mi toga pripovedali japa stari Jankič, i mama stara Jagica Glagolić. Fala jem na semu! Dragi Bog teromu su se celoga života molili i po negvomu nauku decu svoju brojnu v život fpućevali nek prigne vuho svoje i usliša molitve nijove. E, oni jesu decu svoju vučili životu po Božem nauku, a kuliko je teri ojdne štel potom živeti, ili pak svoju decu vučiti takvomu životu, to je pak na nijove duše i na nijove slobodne vole. A nijova slobodna vola se, kaj je i po Božem zakonu, podavala onemi skemi, i prikemi živeju.

Ja otom pišem sat, jerbo moj noćni spominek na postele pret spalo, kaj sem spomijnal kat sem počel pisati v Barke ovu kroniku, ide prama kraju. V denešne vreme spominkof med roditeli i decum više ni, jerbo dete tek kaj je pregleda v rodilištu, već ga čeka posebna soba. Nekteri narediju čak i ižu, koj primerice jeden meni poznati. On je svemu nukeku pol leta staromu kupil kojna, naredil ižu katnicu i z nameštajom namestil.